ಪಿಒಪಿ ಗಣೇಶ ನಿಷೇಧಿಸುವಲ್ಲಿ ಅಲ್ಪ ಪ್ರಗತಿ

Team Udayavani, Sep 4, 2019, 10:59 AM IST

ಬೆಂಗಳೂರು: ಪರಿಸರಕ್ಕೆ ಹಾನಿಯಾಗುವ ಪ್ಲಾಸ್ಟರ್‌ ಆಫ್ ಪ್ಯಾರಿಸ್‌ ಗಣೇಶ (ಪಿಒಪಿ) ಮೂರ್ತಿಗಳ ಬಳಕೆಯನ್ನು ಸಂಪೂರ್ಣವಾಗಿ ತಡೆಯುವಲ್ಲಿ ಬಿಬಿಎಂಪಿ ಈ ಬಾರಿಯೂ ವಿಫ‌ಲವಾದರೂ, ಸ್ವಲ್ಪ ಮಟ್ಟದ ಪ್ರಗತಿ ಸಾಧಿಸಿದೆ.

ಪಿಒಪಿ ಗಣೇಶ ಮೂರ್ತಿ ಗಳನ್ನು ಈ ಬಾರಿ ಯಾವು ದೇ ಕಾರಣಕ್ಕೂ ವಿಸರ್ಜನೆ ಮಾಡುವುದಕ್ಕೆ ಅವಕಾಶ ನೀಡುವುದಿಲ್ಲ. ಪಿಒಪಿ ಗಣೇಶ ಮೂರ್ತಿಗಳನ್ನು ಬಳಸಿದರೆ 10 ಸಾವಿರಾರು ರೂ. ದಂಡ ಮತ್ತು ಜೈಲು ಶಿಕ್ಷೆ ವಿಧಿಸುವುದಾಗಿ ಬಿಬಿಎಂಪಿ ಹಾಗೂ ಮಾಲಿನ್ಯ ನಿಯಂತ್ರಣ ಮಂಡಳಿ ಎಚ್ಚರಿಕೆ ನೀಡಿತ್ತು.

ಸೋಮವಾರ ನಗರದ ವಿವಿಧ ಕೆರೆ, ಸಂಚಾರಿ ಟ್ಯಾಂಕರ್‌ಗಳಲ್ಲಿ 1,60,781 ಗಣೇಶ ಮೂರ್ತಿಗಳು ವಿಸರ್ಜನೆ ಯಾಗಿವೆ. ಅದರಲ್ಲಿ 2,962 ಪಿಒಪಿ ಮೂರ್ತಿಗಳು ಸೇರಿವೆ

ಕೆರೆಗಳಲ್ಲೂ ಪಿಒಪಿ ವಿಸರ್ಜನೆ: ಒಪಿ ಮೂರ್ತಿಗಳನ್ನು ಕೆರೆ ಹಾಗೂ ಸಂಚಾರ ಟ್ಯಾಂಕರ್‌ಗಳ ಒಳಗೆ ತೆಗೆದುಕೊಂಡು ಹೋಗದಂತೆ ನಿಷೇಧ ಹೇರಲಾಗುತ್ತದೆ ಎಂದು ಬಿಬಿಎಂಪಿಯ ಅಧಿಕಾರಿಗಳು ತಿಳಿಸಿದ್ದರು. ಆದರೆ, ಕೆರೆ ಮತ್ತು ಸಂಚಾರ ಟ್ಯಾಂಕರ್‌ಗಳಲ್ಲಿ ನೇಮಕಗೊಂಡಿರುವ ಸಿಬ್ಬಂದಿ ಪಿಒಪಿ ಮೂರ್ತಿಗಳನ್ನು ವಿಸರ್ಜನೆಗೆ ಅವಕಾಶ ಮಾಡಿಕೊಟ್ಟಿದ್ದಾರೆ. ಹೀಗಾಗಿ, ಈ ಬಾರಿಯೂ ಬಿಎಂಪಿ ಮತ್ತು ಮಾಲಿನ್ಯ ನಿಯಂತ್ರಣ ಮಂಡಳಿ ತೆಗೆದುಕೊಂಡಿದ್ದ ಮುಂಜಾಗ್ರತಾ ಕ್ರಮಗಳು ವಿಫ‌ಲ ಹಂತ ತಲುಪಿದೆ.