Bengaluru: 40000 ರೂ. ಲಂಚ ಸ್ವೀಕರಿಸುವಾಗ ಎಎಸ್‌ಐ ಸೇರಿ ಇಬ್ಬರು ಲೋಕಾ ಬಲೆಗೆ

Team Udayavani, Jan 5, 2025, 9:38 AM IST

ಬೆಂಗಳೂರು: ಅಕ್ರಮವಾಗಿ ವಶಪಡಿಸಿಕೊಂಡ ಆಟೋವನ್ನು ಬಿಡುಗಡೆ ಮಾಡಲು 50 ಸಾವಿರ ರೂ. ಲಂಚಕ್ಕೆ ಬೇಡಿಕೆಯಿಟ್ಟ ಸಂಜಯ್‌ ನಗರ ಪೊಲೀಸ್‌ ಠಾಣೆಯ ಎಎಸ್‌ಐ ಸೇರಿದಂತೆ ಇಬ್ಬ ರನ್ನು ಲೋಕಾಯುಕ್ತ ಪೊಲೀಸರು ಬಂಧಿಸಿದ್ದಾರೆ.

ಸಂಜಯ್‌ ನಗರ ಪೊಲೀಸ್‌ ಠಾಣೆಯ ಎಎಸ್‌ಐ ವಿಜಯ್‌ ಕುಮಾರ್‌ ಹಾಗೂ ಲಂಚ ಪಡೆಯಲು ಸಹಕರಿಸಿದ ಸಾರ್ವಜನಿಕ ವ್ಯಕ್ತಿ ಸಯ್ಯದ್‌ ರಿಜ್ವಾನ್‌ ಬಂಧಿತರು. ಕೆ.ಜಿ.ಹಳ್ಳಿಯ ನಿವಾಸಿ ಆಟೋ ಚಾಲಕ ಮಹಮ್ಮದ್‌ ಸುಜಾತ್‌ ದೂರುದಾರರು.

ಮಹಮ್ಮದ್‌ ಸುಜಾತ್‌ ಅವರಿಗೆ ಸೇರಿದ ಆಟೋವನ್ನು ಅಕ್ರಮವಾಗಿ ಸಂಜಯ್‌ ನಗರ ಠಾಣೆ ಪೊಲೀಸರು ವಶಪಡಿಸಿಕೊಂಡಿದ್ದರು ಎನ್ನಲಾಗಿದೆ. ಆ ಆಟೋವನ್ನು ಬಿಡುಗಡೆ ಮಾಡಲು ರಿಜ್ವಾನ್‌ ಮೂಲಕ ಎಎಸ್‌ಐ ವಿಜಯ್‌ ಕುಮಾರ್‌ ಅವರು ಸುಜಾತ್‌ ಬಳಿ 50 ಸಾವಿರ ರೂ. ಲಂಚಕ್ಕೆ ಬೇಡಿಕೆಯಿಟ್ಟಿದ್ದರು. ಆದರೆ, ಲಂಚ ನೀಡಲು ಇಚ್ಛಿಸದ ಸುಜಾತ್‌ ಈ ಬಗ್ಗೆ ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದರು. ಶನಿವಾರ ವಿಜಯ್‌ ಕುಮಾರ್‌ ಹಾಗೂ ಸಯ್ಯದ್‌ ರಿಜ್ವಾನ್‌ 40000 ರೂ. ಲಂಚ ಪಡೆಯುತ್ತಿದ್ದಾಗ ಲೋಕಾ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ.