ಅನುಕಂಪದ ನೌಕರಿ ನೀಡುವಂತೆ ಮೃತ ಲೋಕಾ ಎಸ್ಪಿ ಪತ್ನಿ ಮನವಿ

Team Udayavani, Mar 25, 2017, 11:26 AM IST

ಬೆಂಗಳೂರು: ರಸ್ತೆ ಅಪಘಾತ ಪ್ರಕರಣ­ದಲ್ಲಿ ಮೃತಪಟ್ಟ ಮೈಸೂರು ಲೋಕಾ­ಯುಕ್ತ ಎಸ್‌ಪಿ ಎಸ್‌. ರವಿಕುಮಾರ್‌, ಪತ್ನಿ ಅನಿತಾ ಶುಕ್ರವಾರ ಲೋಕಾಯು­ಕ್ತರನ್ನು ಭೇಟಿ ಮಾಡಿ ಅನುಕಂಪದ ಉದ್ಯೋಗಕ್ಕಾಗಿ ಮನವಿ ಮಾಡಿದರು.

ಒಂದು ತಿಂಗಳ ಹಸುಗೂಸಿನೊಂದಿಗೆ ಲೋಕಾಯುಕ್ತ ಕಚೇರಿಗೆ ಆಗಮಿಸಿದ್ದ ಅನಿತಾ, ಲೋಕಾಯುಕ್ತ ಪಿ. ವಿಶ್ವನಾಥ ಶೆಟ್ಟಿ, ಇಬ್ಬರು ಉಪಲೋಕಾಯುಕ್ತರು, ರಿಜಿಸ್ಟ್ರಾರ್‌, ಲೋಕಾಯುಕ್ತ, ಎಡಿಜಿಪಿ ಅವರನ್ನು ಪ್ರತ್ಯೇಕವಾಗಿ ಭೇಟಿಯಾಗಿ ಪತಿಯ ಸಾವಿನ ಹಿನ್ನೆಲೆ ತಮಗೆ ಆನುಕಂಪದ ಆಧಾರದಲ್ಲಿ ಉದ್ಯೋಗ ಕೊಡುವ ಬಗ್ಗೆ ಸರ್ಕಾರಕ್ಕೆ ಶಿಫಾರಸು ಮಾಡುವಂತೆ ಕೋರಿದರು.

“ಉದಯವಾಣಿ’ ಜತೆ ಮಾತನಾಡಿದ ರವಿಕುಮಾರ್‌ ಅವರ ಸಹೋದರ ಉಮೇಶ್‌ ಕುಮಾರ್‌, ಸಹೋದರ ರವಿ­ಕುಮಾರ್‌ ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಬಳಿಕ ಅವರ ಪತ್ನಿ ಅನಿತಾ ಅವರಿಗೆ ಅನುಕಂಪದ ಆಧಾರದಲ್ಲಿ ಉದ್ಯೋಗ ನೀಡುವ ಬಗ್ಗೆ ಶಿಫಾರಸು ಪ್ರಕ್ರಿಯೆಗಳ ಬಗ್ಗೆ ಲೋಕಾಯುಕ್ತ ಸಂಸ್ಥೆಯ ಉನ್ನತ ಅಧಿಕಾರಿಗಳನ್ನು ಭೇಟಿಯಾಗಿ ಮನವಿ ಸಲ್ಲಿಸಲಾಯಿತು.

ಲೋಕಾಯುಕ್ತರಾದ ಪಿ. ವಿಶ್ವನಾಥ ಶೆಟ್ಟಿ , ಅನುಕಂಪದ ಆಧಾರದಲ್ಲಿ ಅನಿತಾ ಅವರಿಗೆ ಉದ್ಯೋಗ ಕೊಡಿಸಲು ಸಂಸ್ಥೆ ವತಿಯಿಂದ ಬೇಕಾದ ಎಲ್ಲ ಪ್ರಕ್ರಿಯೆಗಳನ್ನು ಶೀಘ್ರದಲ್ಲಿಯೇ ಪೂರ್ಣಗೊಳಿಸಿ ರಾಜ್ಯ ಸರ್ಕಾರಕ್ಕೆ  ಶಿಫಾರಸು ಮಾಡಲಾಗುವುದು. ಜತೆಗೆ ಸಂಸ್ಥೆ ವತಿಯಿಂದ ಸಿಗಬೇಕಾಗಿರುವ  ಸೌಲಭ್ಯಗಳನ್ನು ನೀಡುವುದಾಗಿ ಭರವಸೆ ನೀಡಿದ್ದಾರೆ ಎಂದು ತಿಳಿಸಿದರು.