10ರಂದು ಮಲ್ಲಿಕಾರ್ಜುನಪ್ಪ 70 ಅಭಿನಂದನೆ ಕಾರ್ಯಕ್ರಮ

Team Udayavani, Oct 6, 2017, 11:43 AM IST

ಬೆಂಗಳೂರು: ಕನ್ನಡ ಸಾಹಿತ್ಯ ಪರಿಷತ್‌ ಗೌರವ ಕೋಶಾದ್ಯಕ್ಷ ಪಿ.ಮಲ್ಲಿಕಾರ್ಜುನಪ್ಪ ಅವರಿಗೆ 70 ವರ್ಷ ತುಂಬುತ್ತಿರುವ ಹಿನ್ನೆಲೆಯಲ್ಲಿ ಕನ್ನಡ ಕಾರ್ಯಕರ್ತರ ಬಳಗದಿಂದ ಅ.10ರಂದು ಪಿ.ಮಲ್ಲಿಕಾರ್ಜುನಪ್ಪ ಅಭಿನಂದನೆ ಮತ್ತು “ನಿರಾಳರಾಗ’ ಕೃತಿ ಬಿಡುಗಡೆ ಸಮಾರಂಭ ಆಯೋಜಿಸಲಾಗಿದೆ.

ಕನ್ನಡ ಸಾಹಿತ್ಯ ಪರಿಷತ್‌ ಅಧ್ಯಕ್ಷ ಡಾ.ಮನು ಬಳಿಗಾರ್‌ ಅಧ್ಯಕ್ಷತೆಯಲ್ಲಿ ಅಂದು ಸಂಜೆ 5.30ಕ್ಕೆ ಸಾಹಿತ್ಯ ಪರಿಷತ್‌ನ ಶ್ರೀಕೃಷ್ಣರಾಜ ಪರಿಷನ್ಮಂದಿರದಲ್ಲಿ ಕಾರ್ಯಕ್ರಮ ನಡೆಯಲಿದ್ದು, ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಮಾಜಿ ಆಧ್ಯಕ್ಷ ಡಾ.ಸಿದ್ದಲಿಂಗಯ್ಯ ಅವರು ಮಲ್ಲಿಕಾರ್ಜುನಪ್ಪ ಅವರನ್ನು ಅಭಿನಂದಿಸಲಿದ್ದಾರೆ. ಇದೇ ವೇಳೆ  ಮಲ್ಲಿಕಾರ್ಜುನಪ್ಪ ಅವರ ಸಮಗ್ರ ಸಾಹಿತ್ಯ ಕುರಿತು ಡಾ.ಚಿತ್ತಯ್ಯ ಪೂಜಾರ್‌ ಅವರು ಸಂಪಾದಿಸಿರುವ ‘ನಿರಾಳರಾಗ’ ಕೃತಿ ಲೋಕಾರ್ಪಣೆ ಮಾಡಲಾಗುವುದು. 

ಮೂಲತಃ ಮಂಡ್ಯ ಜಿಲ್ಲೆ ಮಲವಳ್ಳಿ ತಾಲೂಕು ಕಿರುಗಾವಲಿನ ನಾಗಮ್ಮ-ಪುಟ್ಟಮಲ್ಲಪ್ಪ ದಂಪತಿ ಹಿರಿಯ ಪುತ್ರ ಮಲ್ಲಿಕಾರ್ಜುನಪ್ಪ ಅವರು 400ಕ್ಕೂ ಹೆಚ್ಚು ಕತೆಗಳನ್ನು ರಚಿಸಿದ್ದಾರೆ. ಜಿ.ನಾರಾಯಣರ ನೇತೃತ್ವದಲ್ಲಿ ಕನ್ನಡ ಪರಿಚಾರಿಕೆಯನ್ನು ಆರಂಭಿಸಿ ಅದನ್ನು ಇಂದಿಗೂ ಪರಿಪಾಲಿಸಿಕೊಂಡು ಬಂದಿದ್ದಾರೆ. ಇದುವರೆಗೆ ಅವರ 14 ಕವನ ಸಂಕಲನಗಳು ಪ್ರಕಟವಾಗಿವೆ.