ಗಣೇಶ ಮೂರ್ತಿಗಳ ಸಾಮೂಹಿಕ ವಿಸರ್ಜನೆ

Team Udayavani, Sep 17, 2018, 12:23 PM IST

ಬೆಂಗಳೂರು: ನಗರದ ದಂಡು ಪ್ರದೇಶದ ವ್ಯಾಪ್ತಿಯಲ್ಲಿ ಗಣೇಶ ಹಬ್ಬದ ಪ್ರಯುಕ್ತ ಪ್ರತಿಷ್ಠಾಪಿಸಲಾಗಿದ್ದ 251 ಗಣೇಶ ಮೂರ್ತಿಗಳನ್ನು ಭಾನುವಾರ ಮೆರವಣಿಗೆ ಮೂಲಕ ವಿಸರ್ಜಿಸಲಾಯಿತು. ಜಾನಪದ ಕಲಾತಂಡಗಳ ಪ್ರದರ್ಶನದೊಂದಿಗೆ ಶಿವಾಜಿನಗರ, ಕಾಮರಾಜ್‌ ರಸ್ತೆ ಮೂಲಕ ಮೆರವಣಿಗೆಯಲ್ಲಿ ಸಾಗಿ ಅಲಸೂರು ಕರೆಯಲ್ಲಿ ವಿಸರ್ಜಿಸಲಾಯಿತು.

ಉತ್ಸವ ಉದ್ದೇಶಿಸಿ ಮಾತನಾಡಿದ ಅಖೀಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ಅಭಿನವ ಚನ್ನಬಸವರಾಧ್ಯ ಶಿವಚಾರ್ಯ , ಶಿವಾಜಿನಗರದಲ್ಲಿ ಜಾತಿ, ಮತ ಭೇದವಿಲ್ಲದೇ 27ವರ್ಷದಿಂದ ಸಾರ್ವಜನಿಕ ಗಣೇಶೋತ್ಸವ ಆಚರಿಸಲಾಗುತ್ತಿದೆ. ಅಂಕಲ ಸಿದ್ದೇಶ್ವರ ಸ್ವಾಮಿ ಜಂಗಮ ಮಠದ ಸಮ್ಮುಖದಲ್ಲಿ ಗಣೇಶೋತ್ಸವ ನಡೆಯುತ್ತದೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಮಾಜಿ ಶಾಸಕ ನಿರ್ಮಲ್‌ ಕುಮಾರ್‌ ಸುರಾನ, ವಸಂತ ನಗರ ವಾರ್ಡ್‌ನ ಪಾಲಿಕೆ  ಸದಸ್ಯ ಸಂಪತ್‌ಕುಮಾರ್‌, ಭಾರತ ಮಾತಾ ಆಶ್ರಮದ ಸಾಧುರಂಗರಾಜನ್‌, ಸುಬ್ರಹ್ಮಣ್ಯ ದೇವಸ್ಥಾನದ ಪ್ರಧಾನ ಅರ್ಚಕ ರಾಜಗಣಪತಿ ಗುರುಕ್ಕಲ್‌, ವಿವಿಧ  ಸಂಘಟನೆಗಳ ಕಾರ್ಯಕರ್ತರು ಭಾಗವಹಿಸಿದ್ದರು.

ಶನಿವಾರ 1,19,410 ಮೂರ್ತಿಗಳ ವಿಸರ್ಜನೆ: ಗಣೇಶ ಮೂರ್ತಿ ಪ್ರತಿಷ್ಠಾಪಿಸಿ ಮೂರು ದಿನಗಳು ಕಳೆದ ಹಿನ್ನೆಲೆಯಲ್ಲಿ ಶನಿವಾರ ನಗರದ ವಿವಿಧ ಕೆರೆಗಳಲ್ಲಿ ಒಟ್ಟು 1,19,410 ಗಣೇಶ ಮೂರ್ತಿಗಳ ವಿಸರ್ಜನೆಯಾಗಿದೆ. ಈ ಪೈಕಿ ಪಾಲಿಕೆ ದಕ್ಷಿಣ ವಲಯದ ಕೆರೆಗಳಲ್ಲಿ 19,425, ಪೂರ್ವ ವಲಯ 39,892, ಪಶ್ಚಿಮ 31,935, ಯಲಹಂಕ ವಲಯ 10,470, ಮಹದೇವಪುರ ವಲಯ 9,789, ಬೊಮ್ಮನಹಳ್ಳಿ ವಲಯ 2,842, ರಾಜರಾಜೇಶ್ವರಿ ನಗರ ವಲಯ 3,313, ದಾಸರಹಳ್ಳಿ ವಲಯದಲ್ಲಿ 1,744 ಮೂರ್ತಿಗಳು ವಿಸರ್ಜಜನೆಯಾಗಿವೆ. ಇವುಗಳಲ್ಲಿ 7 ಸಾವಿರ ಪಿಒಪಿ ಮೂರ್ತಿಗಳಿದ್ದವು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.