ಎಚ್‌ಡಿಕೆಗೆ ತಿರುಗೇಟು ನೀಡಿದ ಎಂ.ಬಿ ಪಾಟೀಲ್‌

Team Udayavani, Jan 20, 2018, 6:15 AM IST

ಬೆಂಗಳೂರು: ಉತ್ತರ ಕರ್ನಾಟಕದಲ್ಲಿ ಚುನಾವಣೆಗೆ ಎಂ.ಬಿ.ಪಾಟೀಲರ ಹೆಲಿಕ್ಯಾಪ್ಟರ್‌ ಹಾರಾಟ ಜೋರಾಗಿದೆ
ಎಂದು ಟೀಕಿಸಿದ್ದ ಜೆಡಿಎಸ್‌ ರಾಜ್ಯಾಧ್ಯಕ್ಷ ಎಚ್‌.ಡಿ.ಕುಮಾರಸ್ವಾಮಿಗೆ ಜಲ ಸಂಪನ್ಮೂಲ ಸಚಿವ ಎಂ.ಬಿ. ಪಾಟೀಲ್‌ ತಿರುಗೇಟು ನೀಡಿದ್ದಾರೆ. 

ರಾಜ್ಯ ಕಾಂಗ್ರೆಸ್‌ ಉಸ್ತುವಾರಿ ಕೆ.ಸಿ. ವೇಣುಗೋಪಾಲ್‌ ಪಕ್ಷದ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ಮುದ್ದೇಬಿಹಾಳಕ್ಕೆ
ತೆರಳಬೇಕಿತ್ತು. ಅವರಿಗೆ ಪಕ್ಷದ ವತಿಯಿಂದ ಹೆಲಿಕ್ಯಾಪ್ಟರ್‌ ವ್ಯವಸ್ಥೆ ಮಾಡಿದ್ದರು. ಅದರಲ್ಲಿ ನಾನೂ ಕಾರ್ಯಕ್ರಮಕ್ಕೆ
ತೆರಳಿದ್ದೇನೆ. ವೇಣುಗೋಪಾಲ್‌ ಮುದ್ದೇಬಿಹಾಳ ಕಾರ್ಯಕ್ರಮ ಮುಗಿಸಿ ಅದೇ ಹೆಲಿಕ್ಯಾಪ್ಟರ್‌ ಮೂಲಕ ಬೆಂಗಳೂರಿಗೆ ತೆರಳಿದ್ದಾರೆ. ಚುನಾವಣೆ ವೇಳೆ ಅನುಕೂಲಕ್ಕಾಗಿ ಹೆಲಿಕ್ಯಾಪ್ಟರ್‌ ಬಳಸುವುದು ಸಾಮಾನ್ಯ.

ಚುನಾವಣೆ ಘೋಷಣೆ ಆದ ಮೇಲೆ ಅದರ ಖರ್ಚು ವೆಚ್ಚವನ್ನೆಲ್ಲಾ ಚುನಾವಣಾ ಆಯೋಗಕ್ಕೆ ನೀಡಲಾಗುತ್ತದೆ. ಕುಮಾರಸ್ವಾಮಿ ಮುಖ್ಯಮಂತ್ರಿಯಾಗಿದ್ದವರು. ಅವರು ಚುನಾವಣೆ ಸಂದರ್ಭದಲ್ಲಿ ಹೆಲಿಕ್ಯಾಪ್ಟರ್‌ ಬಳಕೆ ಮಾಡಿಲ್ಲವೇ ಎಂದು ಎಂ.ಬಿ. ಪಾಟೀಲ್‌ ಪ್ರಶ್ನಿಸಿದ್ದಾರೆ.