ಮೆಟ್ರೋ 2ನೇ ಹಂತ; 684 ಮರಗಳ ತೆರವು

Team Udayavani, Nov 6, 2019, 10:07 AM IST

ಬೆಂಗಳೂರು: “ನಮ್ಮ ಮೆಟ್ರೋ’ ಎರಡನೇ ಹಂತದಲ್ಲಿ ಒಟ್ಟಾರೆ 684 ಮರಗಳನ್ನು ತೆರವುಗೊಳಿಸಲು ಉದ್ದೇಶಿಸಿದ್ದು, ಈ ಪೈಕಿ 107 ಮರಗಳನ್ನು ಈಗಾಗಲೇ ತೆರವುಗೊಳಿಸಲಾಗಿದೆ ಎಂದು ಬೆಂಗಳೂರು ಮೆಟ್ರೋ ರೈಲು ನಿಗಮ (ಬಿಎಂಆರ್‌ಸಿಎಲ್‌) ಸ್ಪಷ್ಟಪಡಿಸಿದೆ.

ಮಂಗಳವಾರ ತನ್ನ ವೆಬ್‌ಸೈಟ್‌ನಲ್ಲಿ ಸೆಪ್ಟೆಂಬರ್‌ ಮಾಸಿಕ ಪತ್ರ ಹೊರಡಿಸಿರುವ ಬಿಎಂಆರ್‌ಸಿಎಲ್‌, ಮೆಟ್ರೋ ನಿರ್ಮಾಣಕ್ಕಾಗಿ 684 ಮರಗಳ ತೆರವುಗೊಳಿಸಬೇಕಾಗುತ್ತದೆ. ಈ ಪೈಕಿ 222 ಮರಗಳ ತೆರವಿಗೆ ಯಾವುದೇ ಅನುಮತಿ ಅವಶ್ಯಕತೆ ಇಲ್ಲ. ಇನ್ನು 107 ಮರಗಳನ್ನು ಈಗಾಗಲೇ ಕಡಿಯಲಾಗಿದ್ದು, ಉಳಿದ 355 ತೆರವುಗೊಳಿಸುವ ಕಾರ್ಯ ನಡೆದಿದೆ. ಇದಕ್ಕೆ ಪ್ರತಿಯಾಗಿ ಬಿಎಂಆರ್‌ಸಿಎಲ್‌, ಬಿಬಿಎಂಪಿ ಹಾಗೂ ಅರಣ್ಯ ಇಲಾಖೆ ಸಹಯೋಗದಲ್ಲಿ ಎಂಟು ಸಾವಿರ ಸಸಿಗಳನ್ನು ನೆಡಲು ಉದ್ದೇಶಿಸಿದ್ದು, ಈ ಸಂಬಂಧ ನಿಗಮವು 63.37 ಲಕ್ಷ ರೂ. ಪಾಲಿಕೆಯಲ್ಲಿ ಠೇವಣಿ ಇಟ್ಟಿದೆ.

ಇನ್ನು ಮರಗಳ ತೆರವಿಗೆ ಹೈಕೋರ್ಟ್‌ ಸೂಚನೆಯಂತೆ ಮರಗಳ ತಜ್ಞರ ಸಮಿತಿ ರಚಿಸಲಾಗಿದ್ದು, ಅವರ ಅನುಮತಿ ಪಡೆದು ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದೆ. ಅದೇ ರೀತಿ, ಹೊರವರ್ತುಲ ರಸ್ತೆ, ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮಾರ್ಗವೂ ಸೇರಿದಂತೆ ಎರಡನೇ ಹಂತದಲ್ಲಿ ಸರ್ಕಾರ ಮತ್ತು ಖಾಸಗಿ ಒಳಗೊಂಡಂತೆ 3,224 ಸ್ಥಿರಾಸ್ತಿಗಳ ತೆರವುಗೊಳಿಸುವ ಅವಶ್ಯಕತೆ ಇದೆ. ಈ ಪೈಕಿ 2,735 ಆಸ್ತಿಗಳ ಸ್ವಾಧೀನಪಡಿಸಿಕೊಳ್ಳಲಾಗಿದೆ. ಇದರಲ್ಲಿ 2,462 ಸಂಬಂಧಪಟ್ಟ ಎಂಜಿನಿಯರ್‌ ಗಳಿಗೆ ಹಸ್ತಾಂತರಿಸಲಾಗಿದೆ. ಉಳಿದ 767 ಆಸ್ತಿಗಳನ್ನು ಸ್ವಾಧೀನ ಪಡಿಸಿಕೊಳ್ಳಬೇಕಿದೆ.ಇದರಲ್ಲಿ 686 ಖಾಸಗಿ ಆಸ್ತಿಗಳಾಗಿವೆ.

ಮೆಟ್ರೋ ಪ್ರಯಾಣ: ಹೆಚ್ಚಿದ ಆದಾಯ: ಇಡೀ ಸೆಪ್ಟೆಂಬರ್‌ನಲ್ಲಿ ಒಟ್ಟಾರೆ 1,19,16,426 ಜನ ಮೆಟ್ರೋದಲ್ಲಿ ಪ್ರಯಾಣಿಸಿದ್ದು, ಇದರಿಂದ 31,53,30,704 ರೂ. ಆದಾಯ ಹರಿದುಬಂದಿದೆ ಎಂದು ಮಾಸಿಕ ಪತ್ರದಲ್ಲಿ ಬಿಎಂಆರ್‌ಸಿಎಲ್‌ ತಿಳಿಸಿದೆ. ಆ ತಿಂಗಳಲ್ಲಿ ಶೇ. 62.12 ಸ್ಮಾರ್ಟ್‌ ಕಾರ್ಡ್‌ನಿಂದ ಹಾಗೂ ಶೇ. 37.80 ಟೋಕನ್‌ ಮೂಲಕ ಆದಾಯ ಬಂದಿದೆ. ಶೇ. 0.08 ಮಾತ್ರ ಗುಂಪು ಟಿಕೆಟ್‌ ಖರೀದಿಯಾಗಿದೆ. ಕಾರ್ಯಾಚರಣೆ ದಕ್ಷತೆ ಶೇ. 99.98ರಷ್ಟಿದೆ ಎಂದು ಹೇಳಿದೆ.