“ಪ್ರತಾಪ್‌’ಗೆ ಸೇನಾ ಬೀಳ್ಕೊಡುಗೆ

Team Udayavani, Dec 18, 2017, 12:52 PM IST

ಬೆಂಗಳೂರು: ಕಳೆದ 45 ವರ್ಷಗಳ ಕಾಲ ಭಾರತೀಯ ವಾಯುಸೇನೆಯ ಅವಿಭಾಜ್ಯ ಅಂಗವಾಗಿ ಹತ್ತಾರು ಕಾರ್ಯಾಚರಣೆಗಳಲ್ಲಿ ಬಳಕೆಯಾಗಿದ್ದ ಎಂ-8 “ಪ್ರತಾಪ್‌’ ಹೆಲಿಕಾಪ್ಟರ್‌ಗೆ ಭಾನುವಾರ ಸೇವೆಯಿಂದ ಬೀಳ್ಕೊಡಲಾಯಿತು.

ವಾಯುಸೇನೆ ಕೈಗೊಂಡಿದ್ದ ಸಿಯಾಚಿನ್‌ ಹಿಮಪ್ರವಾಹ, ಶ್ರೀಲಂಕಾದ ಆಪರೇಷನ್‌ ಪವನ್‌ ಸೇರಿದಂತೆ ಪ್ರಮುಖ ಕಾರ್ಯಾಚರಣೆಗಳಲ್ಲಿ ಎಂ-8 “ಪ್ರತಾಪ್‌’ ತನ್ನ ಪಾತ್ರ ನಿಭಾಯಿಸಿತ್ತು. ಇದಲ್ಲದೆ ದೇಶದ ವಿವಿಧೆಡೆ ನಡೆದ ಪ್ರವಾಹ ಹಾಗೂ ತುರ್ತು ಸಂಧರ್ಭಗಳಲ್ಲಿ ಸೇನೆ ನಡೆಸಿದ ವಿಪತ್ತು ನಿರ್ವಹಣಾ ಕಾರ್ಯದಲ್ಲಿಯೂ ಬಳಕೆಯಾಗಿತ್ತು. ಜೊತೆಗೆ ದೇಶದ ಗಣ್ಯರ/ಅತಿಗಣ್ಯರ ಪ್ರಯಣಕ್ಕೂ ದಶಕಗಳ ಕಾಲ ಬಳಕೆಯಾಗಿದ್ದು ವಿಶೇಷ.

ಯಲಹಂಕದ ವಾಯುನೆಲೆಯಲ್ಲಿ ನಡೆದ ” ಪ್ರತಾಪ್‌’ ಸೇನಾಬೀಳ್ಕೊಡುಗೆ ಕಾರ್ಯಕ್ರಮದಲ್ಲಿ ನಿವೃತ್ತ  ಏರ್‌ಚೀಫ್ ಮಾರ್ಷಲ್‌  ಮೇಜರ್‌ ಫಾಲಿ ಹೋಮಿ ಸೇರಿದಂತೆ ವಾಯುಸೇನೆಯ ಅಧಿಕಾರಿಗಳು, ಸೇನಾ ಸಿಬ್ಬಂದಿ ಪಾಲ್ಗೊಂಡಿದ್ದರು.