ನಾಗ, ಪುತ್ರರಿಗೆ ಜೂ.7ರ ವರೆಗೆ ನ್ಯಾಯಾಂಗ ಬಂಧನ 

Team Udayavani, May 26, 2017, 12:18 PM IST

ಬೆಂಗಳೂರು: ಅಪಹರಣ, ಜೀವ ಬೆದರಿಕೆ, ಬ್ಲ್ಯಾಕ್‌ ಆ್ಯಂಡ್‌  ವೈಟ್‌ ದಂಧೆ ಪ್ರಕರಣಗಳ ಆರೋಪಿ ಮಾಜಿ ಕಾರ್ಪೋರೇಟರ್‌ ವಿ. ನಾಗರಾಜು ಹಾಗೂ ಆತನ ಇಬ್ಬರು ಮಕ್ಕಳನ್ನು ಜೂನ್‌ 7ರವರೆಗೆ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿ 11ನೇ ಸಿಟಿಸಿವಿಲ್‌ ಕೋರ್ಟ್‌ ಆದೇಶಿಸಿದೆ.

ನಾಗರಾಜು ಹಾಗೂ ಆತನ ಮಕ್ಕಳಾದ ಶಾಸ್ತ್ರೀ,ಗಾಂಧೀಯನ್ನು ಬಂಧಿಸಿ 14 ದಿನಗಳಿಂದ ವಿಚಾರಣೆ ನಡೆಸುತ್ತಿದ್ದ ಹೆಣ್ಣೂರು ಠಾಣೆ ಪೊಲೀಸರು ಗುರುವಾರ ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು. ಆದರೆ, ನಾಗರಾಜ ಹಾಗೂ ಆತನ ಮಕ್ಕಳ ಜಾಮೀನು ಮನವಿಯನ್ನು ತಿರಸ್ಕರಿಸಿದ ನ್ಯಾಯಾಲಯ ಜೂನ್‌ 7ರವರೆಗೆ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿ ಆದೇಶ ನೀಡಲಾಯಿತು. 

ನಾಗನನ್ನು ಸದ್ಯದಲ್ಲಿಯೇ ಕೆಂಗೇರಿ ಹಾಗೂ ಶ್ರೀರಾಂಪುರ ಠಾಣೆ ಪೊಲೀಸರು ವಶಕ್ಕೆ ಪಡೆದುಕೊಳ್ಳಲಿದ್ದಾರೆ. ವಂಚನೆ ಹಾಗೂ ಕೊಲೆಬೆದರಿಕೆ ಸಂಬಂಧ ನಾಗನ ವಿರುದ್ಧ ಎರಡೂ ಠಾಣೆಗಳಲ್ಲಿ ಪ್ರಕರಣಗಳು ದಾಖಲಾಗಿವೆ.