ಮನೆಬಾಗಿಲಿಗೆ ಬರಲಿದೆ ನಂದಿನಿ ಉತ್ಪನ್ನ

Team Udayavani, May 6, 2017, 11:48 AM IST

ಬೆಂಗಳೂರು: ನೂತನ ತಂತ್ರಜ್ಞಾನ ಬಳಸಿಕೊಂಡು ಗ್ರಾಹಕರ ಮನೆ ಬಾಗಿಲಿಗೆ ನಂದಿನಿ ಹಾಲಿನ ಉತ್ಪನ್ನಗಳನ್ನು ತಲುಪಿಸಲು ಮುಂದಾಗಿರುವ ಕರ್ನಾಟಕ ಹಾಲು ಮಹಾಮಂಡಳಿ (ಕೆಎಂಎಫ್) “ಇ-ಡೇರಿ’ ಎಂಬ ಆನ್‌ಲೈನ್‌ ಸೇವೆಗೆ ಚಾಲನೆ ನೀಡಿದೆ.

“ಇ-ಡೇರಿ’ ಮೂಲಕ ಗ್ರಾಹಕರು ತಾವಿರುವ ಸ್ಥಳದಲ್ಲೇ ನಂದಿನಿ ಹಾಲಿನ ಉತ್ಪನ್ನಗಳನ್ನು ನಿಗದಿಪಡಿಸಿದ ಸಮಯಕ್ಕೆ ಮತ್ತು ನಿಗದಿತ ಅಳತೆಯಲ್ಲಿ ಬೇಡಿಕೆ ಸಲ್ಲಿಸಿ ತರಿಸಿಕೊಳ್ಳಬಹುದಾಗಿದೆ.  ಗ್ರಾಹಕರು ಬೇಡಿಕೆ ಸಲ್ಲಿಸಿರುವ ಉತ್ಪನ್ನಗಳನ್ನು ಕೆಎಂಎಫ್ನಿಂದ ನಿಯೋಜಿತವಾದ ಸಂಗ್ರಹಣಾ ಕೇಂದ್ರಗಳಿಂದ ವಿತರಿಸುವ ವ್ಯವಸ್ಥೆ ಮಾಡಿದೆ.

ಇ-ಡೇರಿಯ ಸಂಗ್ರಹಣಾ ಕೇಂದ್ರಗಳನ್ನು ಪ್ರಾಯೋಗಿಕವಾಗಿ ಬೆಂಗಳೂರಿನ ಎಲ್ಲ ಸ್ಥಳಗಳಲ್ಲೂ ಗ್ರಾಹಕರಿಗೆ ಅನುಕೂಲವಾಗುವ ರೀತಿಯಲ್ಲಿ ಸ್ಥಾಪಿಸಲಾಗಿದೆ. ಇದರ ಯಶಸ್ವಿ ನಂತರ ರಾಜ್ಯಾದ್ಯಂತ ವಿಸ್ತರಿಸಲಾಗುವುದು ಎಂದು “ಇ-ಡೇರಿ’ಗೆ ಚಾಲನೆ ನೀಡಿದ ಕೆಎಂಎಫ್ ವ್ಯವಸ್ಥಾಪಕ ನಿರ್ದೇಶಕ ರಾಕೇಶ್‌ಸಿಂಗ್‌ ತಿಳಿಸಿದರು.

ನಿತ್ಯ ಬೆಳಗ್ಗೆ ಮತ್ತು ಸಂಜೆಯಂತೆ ಈ ಸೇವೆ ಪಡೆಯಬಹುದು. ಸಂಗ್ರಹಣಾ ಕೇಂದ್ರಗಳ ವ್ಯವಸ್ಥಾಪಕರು ಹಾಲಿನ ಉತ್ಪನ್ನಗಳ ಗುಣಮಟ್ಟಗಳ ಉತ್ಕೃಷ್ಟತೆಯ ಕುರಿತು ಅತ್ಯಂತ ಜಾಗರೂಕರಾಗಿ ಇರಲಿದ್ದಾರೆ. ಸರಿಯಾದ ಸಮಯಕ್ಕೆ, ಸ್ಥಳಕ್ಕೆ ಮತ್ತು ನಿಖರವಾದ ಅಳತೆಯಲ್ಲಿ ಗ್ರಾಹಕರಿಗೆ ತಲುಪಿಸಲು ವ್ಯವಸ್ಥಿತವಾಗಿ ಕಾರ್ಯ ನಿರ್ವಹಿಸಲಿದ್ದಾರೆ. “ಇ-ಡೇರಿ’ಯ ವ್ಯವಸ್ಥಾಪಕರು ಹಾಗೂ ಅದರಲ್ಲಿ ನಿಯುಕ್ತಿಗೊಂಡ ಡೆಲಿವರಿ ಹುಡುಗರಿಗೆ ಸಮವಸ್ತ್ರ ಮತ್ತು ಪರಿಚಯ ಪತ್ರ (ಐಡಿ ಕಾರ್ಡ್‌)ಗಳನ್ನು ನೀಡಲಾಗಿದೆ ಎಂದು ರಾಕೇಶ್‌ ಸಿಂಗ್‌ ಹೇಳಿದ್ದಾರೆ. 

ಕಾರ್ಯಕ್ರಮಗಳಿಗೂ ಉತ್ಪನ್ನ ಪೂರೈಕೆ: “ಇ-ಡೇರಿ’ಯ ತಂತ್ರಜ್ಞಾನದಿಂದ ಹಾಲಿನ ಉತ್ಪನ್ನಗಳನ್ನು ದೊಡ್ಡ ಪ್ರಮಾಣದಲ್ಲಿ ಮನೆಯ ಕಾರ್ಯಕ್ರಮಗಳಿಗೆ, ಕ್ಯಾಂಟೀನ್‌ಗಳಿಗೆ, ಸಿಹಿ ಉಡುಗೊರೆಗೆ, ಹೋಟೆಲ್‌ ಉದ್ಯಮಗಳಿಗೆ, ಬಹುರಾಷ್ಟ್ರೀಯ ಕಂಪನಿಗಳಲ್ಲಿ ಭೋಜನ ವ್ಯವಸ್ಥೆ ಇರುವ ಕಡೆ ಮತ್ತು ಸಾಮೂಹಿಕ ಹಾಗೂ ಸಾಂಪ್ರದಾಯಿಕ ಭೋಜನ ವ್ಯವಸ್ಥೆಗಳಿಗೆ ಬೇಡಿಕೆ ಸಲ್ಲಿಸಿ ಉತ್ಪನ್ನಗಳನ್ನು ಪಡೆಯಬಹುದಾಗಿದೆ.

ಆನ್‌ಲೈನ್‌ ಸಂಪರ್ಕ
ಮೊಬೈಲ್‌, ಕಂಪ್ಯೂಟರ್‌ ಬಳಸಿ, ಫೇಸ್‌ಬುಕ್‌, ಟ್ವಿಟರ್‌, ಲಿಂಕ್‌ಡಿನ್‌, ಗೂಗಲ್‌ ಹಾಗೂ ಯೂಟ್ಯೂಬ್‌ಗಳ ಮುಖಾಂತರ “ಇ-ಡೇರಿ’ಯ ಸಂಪರ್ಕ ಸಾಧಿಸಬಹುದು. ಇ- ಡೇರಿಗೆ ಹಣ ಸಂದಾಯ ಮಾಡಲು “ಗೇಟ್‌ ವೇ’ ಮಾರ್ಗ ಅನುಸರಿಸಲಾಗಿದೆ ಎಂದು ಸಂಸ್ಥೆಯ ಎಂಡಿ ತಿಳಿಸಿದ್ದಾರೆ. 

ಮಾಹಿತಿಗೆ ಸಂಪರ್ಕಿಸಿ 
ಟೋಲ್‌ಫ್ರೀ ದೂರವಾಣಿ ಸಂಖ್ಯೆ: 1800-103-9073
ಸಹಾಯವಾಣಿ ಕೇಂದ್ರ: 080-4250 7100
ಇ-ಮೇಲ್‌: [email protected]
ವೆಬ್‌ಸೈಟ್‌ ವಿಳಾಸ: www.edairy.co.in