ನಿರ್ಮಾಣ್‌ ಶೆಲ್ಟರ್ಸ್‌ ಭೀಮ ನಮನ

Team Udayavani, Jan 29, 2019, 6:43 AM IST

ಬೆಂಗಳೂರು: ಹಿಂದೂಸ್ತಾನಿ ಗಾಯಕ, ಭಾರತ ರತ್ನ ಪಂಡಿತ ಭೀಮಸೇನ ಜೋಷಿಯವರ ಗೌರವಾರ್ಥ ಬನ್ನೇರುಘಟ್ಟ ಸಮೀಪದ ನಿಸರ್ಗ ಬಡಾವಣೆಯಲ್ಲಿ ಇತೀ¤ಚೆಗೆ 8ನೇ ವರ್ಷದ “ಭೀಮ ನಮನ’ ಸ್ಮರಣಾಂಜಲಿ ಕಾರ್ಯಕ್ರಮ ನಡೆಯಿತು.

ಪಂಡಿತ್‌ ಭೀಮಸೇನ ಜೋಶಿಯವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡಿ ದೀಪ ಬೆಳಗುವ ಮೂಲಕ ಭೀಮ ನಮ ಕಾರ್ಯಕ್ರಮಕ್ಕೆ ನಿರ್ಮಾಣ್‌ ಸಂಸ್ಥೆಯ ಸಂಸ್ಥಾಪಕ ವಿ. ಲಕ್ಷ್ಮಿನಾರಾಯಣ್‌ ಹಾಗೂ ಗಾಯಕಿ ಸಂಗೀತಾ ಕಟ್ಟಿಯವರು ಚಾಲನೆ ನೀಡಿದರು.

ನಂತರ ವಿ. ಲಕ್ಷ್ಮಿನಾರಾಯಣ್‌ ಮಾತನಾಡಿ, ಭಾರತ ರತ್ನ ಪಂಡಿತ್‌ ಭೀಮಸೇನ ಜೋಶಿಯವರು ಕನ್ನಡನಾಡಿನ ಹೆಮ್ಮೆಯ ಪುತ್ರ, ಇಂದಿಗೂ ಕೂಡ ಅವರ ಲೋಕಪ್ರಿಯ ಗಾಯನ ಭಾಗ್ಯದ ಲಕ್ಷ್ಮಿ ಬಾರಮ್ಮ ಜನಪ್ರಿಯವಾಗಿದೆ ಎಂಬುದನ್ನು ಸ್ಮರಿಸಿದರು.

ಸಂಗೀತಾ ಕಟ್ಟಿಯವರು ತಮ್ಮ ವಿಶಿಷ್ಟ ಗಾಯನದ ಮೂಲಕ ಸಭಿಕರನ್ನು ರಂಜಿಸಿದರು. ಸಂಸ್ಥೆ ವತಿಯಿಂದ ಅವರಿಗೆ ನೆನಪಿನ ಕಾಣಿಕೆ ನೀಡಿ ಸನ್ಮಾನಿಸಲಾಯಿತು. ಸಾಹಿತಿ ದಂಪತಿ ನಾಡೋಜ ಹಂಪ ನಾಗರಾಜಯ್ಯ, ಕಮಲಾ ಹಂಪನಾ, ವಿಎಲ್‌ಎನ್‌ ಪ್ರಬುದ್ಧಾಲಯದ ನಿರ್ದೇಶಕಿ ಸುಷ್ಮಾ ಮೂರ್ತಿ, ಹಿರಿಯ ಅಧಿಕಾರಿ ರವಿರಾಜ್‌ ಭಟ್‌ ಇತರರು ಉಪಸ್ಥಿತರಿದ್ದರು.