ಪಾದಚಾರಿಗಳಿಗೆ ನೋ ಎಂಟ್ರಿ!

ಋತುವಿಗೆ ತಕ್ಕಂತೆ ಬಗೆಬಗೆಯ ಮಾರುಕಟ್ಟೆಯಾಗುವ ಅರಮನೆ ರಸ್ತೆ ಪಾದಚಾರಿ ಮಾರ್ಗ

Team Udayavani, Aug 2, 2019, 8:44 AM IST

ಜಯಮಹಲ್ ರಸ್ತೆಯ ಟಿ.ವಿ.ಟವರ್‌ ಬಳಿ ನಿರ್ಮಾಣವಾಗಿರುವ ಕುರಿ ದೊಡ್ಡಿ.

ಬೆಂಗಳೂರು: ಈ ಪಾದಚಾರಿ ಮಾರ್ಗ ತಿಂಗಳಿಗೊಂದು ರೀತಿಯ ಮಾರುಕಟ್ಟೆಯಾಗಿ ಪರಿವರ್ತನೆ ಆಗುತ್ತದೆ. ಆದರೆ, ದಶಕ ಕಳೆದರೂ ಅದರ ಮೂಲ ಸ್ವರೂಪಕ್ಕೆ ಮಾತ್ರ ಮರಳುತ್ತಿಲ್ಲ. ಇದರಿಂದ ಉದ್ದೇಶಿತ ಮಾರ್ಗದಲ್ಲಿ ಪೀಕ್‌ ಅವರ್‌ನಲ್ಲಿ ಜನ ಜೀವ ಕೈಯಲ್ಲಿ ಹಿಡಿದು ಓಡಾಡುವಂತಾಗಿದೆ.

ಪ್ರತಿಷ್ಠಿತ ಜಯಮಹಲ್ ರಸ್ತೆಯ ಅರಮನೆ ಮೈದಾನದ ಕಾಂಪೌಂಡ್‌ ಉದ್ದಕ್ಕೂ ಸುಮಾರು ಒಂದೂವರೆಯಿಂದ ಎರಡು ಕಿ.ಮೀ. ಉದ್ದ ಫ‌ುಟ್ಪಾತ್‌ ನಿರ್ಮಿಸಲಾಗಿದೆ. ಆದರೆ, ನಿರ್ಮಾಣಗೊಂಡ ನಂತರದಿಂದ ಇದುವರೆಗೆ ಪಾದಚಾರಿ ಮಾರ್ಗವಾಗಿ ಅದು ಬಳಕೆ ಆಗೇ ಇಲ್ಲ. ಬದಲಿಗೆ ಬೇಸಿಗೆಯಲ್ಲಿ ಹಣ್ಣುಗಳು, ಚಳಿಗಾಲ ಬಂದರೆ ಬೆಚ್ಚನೆ ಹೊದಿಕೆಗಳು, ಮೇಕೆ ಮತ್ತು ಕುರಿಗಳ ಮಾರುಕಟ್ಟೆಯಾಗಿ ರೂಪುಗೊಳ್ಳುತ್ತಿದೆ. ಹೀಗೆ ಋತುಮಾನಕ್ಕೆ ತಕ್ಕಂತೆ ವಿವಿಧ ವರ್ಗದ ವ್ಯಾಪಾರಿಗಳಿಗೆ ವೇದಿಕೆಯಾಗುವ ಮಾರ್ಗದಲ್ಲಿ ಪಾದಚಾರಿಗಳಿಗೆ ನೋ ಎಂಟ್ರಿ.

ಖಾಲಿ ಜಾಗವೇಕೆ?: ಕಂಟೋನ್ಮೆಂಟ್ ರೈಲು ನಿಲ್ದಾಣದಿಂದ ಮೇಖ್ರೀ ವೃತ್ತದವರೆಗೆ 1.5ರಿಂದ 2 ಕಿ.ಮೀ. ಉದ್ದದ 50ರಿಂದ 60 ಅಡಿ ಅಗಲದ ಈ ರಸ್ತೆಯನ್ನು 150 ಅಡಿಗೆ ವಿಸ್ತರಿಸಲು ಕೆಲ ವರ್ಷಗಳ ಹಿಂದೆಯೇ ಬಿಬಿಎಂಪಿ ಯೋಜನೆ ಸಿದ್ಧಪಡಿಸಿದೆ. ಆದರೆ, ಅರಮನೆ ಮೈದಾನದ ಕಡೆ ವಿಸ್ತರಣೆ ಮಾಡಬೇಕಾದ ರಸ್ತೆಯು ರಾಜಮನೆತನಕ್ಕೆ ಸೇರಿದ್ದು, ಅಭಿವೃದ್ಧಿ ಹಕ್ಕು ವರ್ಗಾವಣೆ (ಟಿಡಿಆರ್‌) ಕಗ್ಗಂಟ್ಟಿನಿಂದ ಪ್ರಕರಣವು ಸುಪ್ರೀಂ ಕೋರ್ಟ್‌ ಮೆಟ್ಟಿಲೇರಿತ್ತು. ಪರಿಣಾಮ ಕಾಮಗಾರಿಗೆ ತಾತ್ಕಾಲಿಕ ಬ್ರೇಕ್‌ ಬಿದ್ದಿದೆ. ಬಳಿಕ ಆ ಜಾಗದಲ್ಲಿ ಒಂದೊಂದೇ ಮಳಿಗೆಗಳು ತಲೆಯೆತ್ತಿ ಈಗ ಕಿ.ಮೀ. ಉದ್ದದ ರಸ್ತೆ ಮಾರುಕಟ್ಟೆಯಂತಾಗಿದೆ.

ಈ ರಸ್ತೆ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವುದರಿಂದ ಹೆಚ್ಚಿನ ವಾಹನ ಸಂಚಾರ ದಟ್ಟಣೆ ಇರುತ್ತದೆ. ಇಲ್ಲಿನ ಮಳಿಗೆಗಳಲ್ಲಿ ವಹಿವಾಟು ನಡೆಸುವವರು ಪಾದಚಾರಿ ಮಾರ್ಗ ಅತಿಕ್ರಮಿಸಿಕೊಂಡಿದ್ದು, ಪಾದಚಾರಿಗಳು ಜೀವಭಯದಲ್ಲೇ ರಸ್ತೆ ಮೇಲೆ ನಡೆದಾಡುತ್ತಾರೆ. ಸಂಜೆ ಸಮಯದಲ್ಲಿ ಈ ಮಳಿಗೆಗಳಲ್ಲಿ ವಹಿವಾಟು ನಡೆಸುವ ಗ್ರಾಹಕರು ತಮ್ಮ ವಾಹನಗಳನ್ನು ರಸ್ತೆಯಲ್ಲೇ ನಿಲ್ಲಿಸುವುದರಿಂದ ಟ್ರಾಫಿಕ್‌ ಕಿರಿಕಿರಿ ಉಂಟಾಗುತ್ತಿದೆ.

ಕಟ್ಟಡ ತ್ಯಾಜ್ಯ ವಿಲೇವಾರಿ ಜಾಗ: ಜಯಮಹಲ್ ರಸ್ತೆಯ ಫ‌ನ್‌ವಲ್ಡ್ರ್ ಮುಂಭಾಗದಿಂದ ಮೇಖ್ರೀ ವೃತ್ತದವರೆಗೂ ರಸ್ತೆ ವಿಸ್ತರಣೆ ಬಿಟ್ಟಿರುವ ಜಾಗದಲ್ಲಿ ಅಕ್ರಮವಾಗಿ 200ಕ್ಕೂ ಹೆಚ್ಚು ಮಳಿಗೆಗಳು ತೆಲೆಯೆತ್ತಿದ್ದು, ನಿತ್ಯ ಇವುಗಳ ಸಂಖ್ಯೆ ಹೆಚ್ಚಾಗುತ್ತಲೇ ಇದೆ.

ಆರ್‌.ಟಿ.ನಗರ ಸುತ್ತಮುತ್ತಲ ಪ್ರದೇಶದಲ್ಲಿ ಉತ್ಪತ್ತಿಯಾಗುವ ಕಟ್ಟಡ ತ್ಯಾಜ್ಯವನ್ನು ಈ ಇದೇ ಜಾಗದಲ್ಲಿ ಅಕ್ರಮವಾಗಿ ಸುರಿಯುತ್ತಿದ್ದಾರೆ. ಈ ಹಿಂದೆ ರಸ್ತೆ ವಿಸ್ತರಣೆಗಾಗಿ ಈ ಜಾಗವನ್ನು ಸ್ವಚ್ಛ ಮಾಡಿದ್ದ ಬಿಬಿಎಂಪಿ, ಆ ತ್ಯಾಜ್ಯವನ್ನು ವಿಲೇವಾರಿ ಮಾಡದೆ ಅಲ್ಲಿಯೇ ಬಿಟ್ಟಿದೆ. ಜತೆಗೆ ಹಣ್ಣು ವ್ಯಾಪಾರ ಮಾಡುವರು ನಿತ್ಯ ಉತ್ಪತ್ತಿಯಾಗುವ ತ್ಯಾಜ್ಯವನ್ನು ಸರಿಯಾಗಿ ವಿಲೇವಾರಿ ಮಾಡದೆ, ರಸ್ತೆ ಪಕ್ಕದಲ್ಲೇ ಹಾಕುತ್ತಿದ್ದಾರೆ. ಇದರಿಂದ ಸೊಳ್ಳೆಗಳು ಹೆಚ್ಚಾಗುತ್ತಿದ್ದು, ದುರ್ವಾಸನೆ, ಅನಾರೋಗ್ಯ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸುತ್ತಾರೆ.

ಬೀದಿ ದೀಪದ ಸಮಸ್ಯೆ:

ಜಯಮಹಲ್ ರಸ್ತೆಯುದ್ದಕ್ಕೂ ಬೀದಿ ದೀಪದ ಸಮಸ್ಯೆ ಇದೆ. ವಿದ್ಯುತ್‌ ಕಂಬಗಳಿದ್ದರೂ ಬಲ್ಬ್ ಗಳು ಹಾಳಾಗಿವೆ. ಮೇಖ್ರೀ ವೃತ್ತದಿಂದ ಟಿ.ವಿ ಟವರ್‌ ಬರುವವರೆಗೆ ಸಂಪೂರ್ಣ ಕತ್ತಲೆ ಆವರಿಸಿರುತ್ತದೆ. ರಾತ್ರಿ ಸಮಯದಲ್ಲಿ ದ್ವಿಚಕ್ರವಾಹನ ಸವಾರರು, ಪಾದಚಾರಿಗಳು ಓಡಾಡಲು ಭಯಪಡುವ ಪರಿಸ್ಥಿತಿಯಿದೆ. ಜತೆಗೆ ರಾತ್ರಿ ವೇಳೆ ರಸ್ತೆ ಪಕ್ಕದಲ್ಲಿರುವ ಖಾಲಿ ಜಾಗದಲ್ಲಿ ಅಕ್ರಮ ಚಟುವಟಿಕೆಗಳು ನಡೆಯುತ್ತವೆ ಎಂದು ಸ್ಥಳೀಯರು ಆರೋಪಿಸುತ್ತಾರೆ.

ಈಗ ಕುರಿ-ಮೇಕೆ ಕೊಟ್ಟಿಗೆ:

ಜಯಮಹಲ್ ರಸ್ತೆಯ ಟಿ.ವಿ.ಟವರ್‌ ಬಳಿ ಈಗ ಕುರಿ-ಮೇಕೆ ಮಾರಾಟಗಾರರು ಬೀಡುಬಿಟ್ಟಿದ್ದಾರೆ. 30ಕ್ಕೂ ಹೆಚ್ಚು ಕುರಿ ಮೇಕೆ ಮಾರಾಟಗಾರರಿದ್ದು, ನೂರಕ್ಕೂ ಹೆಚ್ಚು ಮಾರಾಟ ಮಳಿಗೆಗಳು ಆರಂಭಗೊಳ್ಳುವ ನಿರೀಕ್ಷೆ ಇದೆ.

ಪೊಲೀಸ್ರು, ಪಾಲಿಕೆಗೆ ಹಣ ಕೊಡ್ತೀವಲ್ಲಾ…

ಜಯಮಹಲ್ ರಸ್ತೆ ಪಕ್ಕದಲ್ಲಿ ಜಾಗ ಬೇಕಿದ್ದರೆ, ಹತ್ತು ಸಾವಿರ ರೂ. ಕೊಟ್ಟರೆ ಸಾಕು, ಒಂದು ಋತುಮಾನಕ್ಕೆ ಬಿಟ್ಟುಕೊಡುತ್ತಾರೆ. ಜತೆಗೆ ಪೊಲೀಸ್‌ ಅಥವಾ ಬಿಬಿಎಂಪಿ ಅಧಿಕಾರಿಗಳ ಕಾಟ ಇರುವುದಿಲ್ಲ. ‘ನಾವು ಮಾವಿನ ಸೀಸನ್‌ ಆರಂಭವಾದಾಗ ಎಲ್ಲರೂ ಒಟ್ಟಾಗಿ ತಲಾ 10 ಸಾವಿರ ರೂ.ಗಳನ್ನು ನಮ್ಮಲ್ಲೆ ಹಿರಿಯ ವ್ಯಾಪಾರಿ ಒಬ್ಬರಿಗೆ ನೀಡುತ್ತೇವೆ. ಅವರು ಆ ಹಣವನ್ನು ಸಂಗ್ರಹಿಸಿ ಪೊಲೀಸರಿಗೆ ಹಾಗೂ ಬಿಬಿಎಂಪಿ ಅಧಿಕಾರಿಗಳಿಗೆ ಕೊಡುತ್ತಾರೆ. ಹೀಗಾಗಿ, ಟ್ರಾಫಿಕ್‌, ಅಕ್ರಮ ಜಾಗ ಎಂದು ಯಾರೂ ಪ್ರಶ್ನಿಸುವುದಿಲ್ಲ’ ಎಂದು ವ್ಯಾಪಾರಿಯೊಬ್ಬರು ಮಾಹಿತಿ ನೀಡಿದರು.