ಅರೆಕಾ ಟೀ ಆಯ್ತು ಈಗ ಅಡಕೆ ಮಿಲ್ಕ್ ಶೇಕ್‌ ಸರದಿ

Team Udayavani, Nov 5, 2022, 12:25 PM IST

ಬೆಂಗಳೂರು: ಅರೆಕಾ ಟೀ ಆಯ್ತು. ಈಗ ಅರೆಕಾ ಹೆಲ್ತ್‌ ಬೂಸ್ಟರ್‌ ಮಿಲ್ಕ್  ಶೇಕ್‌ ಸರದಿ…! ಹೆಚ್ಚಾಗಿ ಗುಟ್ಕಾ, ಪಾನ್‌ ಬೀಡಾದಲ್ಲಿ ಉಪಯೋಗಿಸುವ ಅಡಕೆಯ ಮೌಲ್ಯವರ್ಧಿತ ಉತ್ಪನ್ನ “ಅರೆಕಾ ಟೀ’ ಇತ್ತೀಚಿನ ದಿನಗಳಲ್ಲಿ ಜನಪ್ರಿಯತೆ ಗಳಿಸಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಇದರ ಪಟ್ಟಿಗೆ ಅರೆಕಾ ಹೆಲ್ತ್‌ ಬೂಸ್ಟರ್‌ ಸೇರಿದಂತೆ ಹಲವು ಉತ್ಪನ್ನಗಳು ಮಾರುಕಟ್ಟೆಗೆ ಲಗ್ಗೆ ಇಟ್ಟಿವೆ.

ಅಡಕೆ ಬೆಳೆಯುವ ಪ್ರದೇಶ ಶಿರಸಿ ಮೂಲದ ಅವಿನಾಶ್‌ ಎಂಬುವರು ಈ ಅರೆಕಾ ಮಿಲ್ಕ್  ಶೇಕ್‌ ಅನ್ನು ಪರಿಚಯಿಸಿದ್ದಾರೆ. ಇದರ ಜತೆಗೆ ಬ್ಲ್ಯಾಕ್‌ ಟೀ ಮತ್ತು ಹಾಲಿನೊಂದಿಗಿನ ಹಾಟ್‌ ಚಾಯ್‌ ಸವಿಯನ್ನೂ ನೀವು ಸವಿಯಬಹುದು. “ಒಜಾಸ್‌- ಹೆಲ್ತ್‌ ಬೂಸ್ಟರ್‌’ ಬ್ರ್ಯಾಂಡ್‌ನ‌ಡಿ ವೆನಿಲ್ಲಾ, ಚೋಕೊ, ನನ್ನಾರಿ ಮತ್ತು ಜಾಯಿಕಾಯಿ ಸೇರಿದಂತೆ ನಾಲ್ಕು ಸ್ವಾದಗಳಲ್ಲಿ ಈ ಉತ್ಪನ್ನಗಳು ಲಭ್ಯ ಇವೆ.

ಒಂದು ಗ್ರಾಂ ಒಜಾಸ್‌ ಮಿಲ್ಕ್ಶೇಕ್‌ ಅನ್ನು 120 ಮಿ.ಲೀ. ಹಾಲು ಅಥವಾ ಬಿಸಿ ನೀರಿನೊಂದಿಗೆ ಮಿಶ್ರಣ ಮಾಡಿ ಕುಡಿಯಬಹುದು. 2019ರಲ್ಲಿ ಈ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದ್ದು, ಮಾಸಿಕ 1.5 ಲಕ್ಷ ಆದಾಯ ಬರುತ್ತಿದೆ. ಮುಂಬರುವ ದಿನಗಳಲ್ಲಿ ಅರೆಕಾ ಕಾಫಿ ಪರಿಚಯಿಸಲು ಉದ್ದೇಶಿಸಲಾಗಿದೆ ಎಂದು ಒಜಾಸ್‌ನ ಸಹ ಸಂಸ್ಥಾಪಕ ಅವಿನಾಶ್‌ ತಿಳಿಸಿದರು.