ಆರ್ಡರ್ಲಿ ಬದಲಿಗೆ ಫಾಲೋವರ್ಸ್‌: ಪರಂ

Team Udayavani, Jun 11, 2017, 3:45 AM IST

ಬೆಂಗಳೂರು: ಆರ್ಡಲಿ ಪದ್ಧತಿ ರದ್ದು ಮಾಡಿರುವುದರಿಂದ ಹೊಸದಾಗಿ “ಫಾಲೋವರ್ಸ್‌’ ಹುದ್ದೆಗಳ ನೇಮಕಕ್ಕೆ ಸರ್ಕಾರ ತೀರ್ಮಾನಿಸಿದೆ ಎಂದು ಗೃಹ ಸಚಿವ ಡಾ.ಜಿ.ಪರಮೇಶ್ವರ್‌ ತಿಳಿಸಿದ್ದಾರೆ.

ಶನಿವಾರ ಕಾರ್ಯಕ್ರಮವೊಂದರ ನಂತರ ಸುದ್ದಿಗಾರರ ಜತೆ ಮಾತನಾಡಿದ ಅವರು, ಫಾಲೋವರ್ಸ್‌ ಹುದ್ದೆಗೆ ಡಿ ಗ್ರೂಪ್‌  ಶ್ರೇಣಿಯಲ್ಲಿ ನೇಮಕಾತಿ ಮಾಡಿಕೊಳ್ಳಲಾಗುವುದು ಎಂದು ಹೇಳಿದರು.

ರಾಜ್ಯ ಸರ್ಕಾರ ಎರಡು ತಿಂಗಳ ಹಿಂದೆಯೇ ಆರ್ಡರ್ಲಿ ಪದ್ಧತಿಯನ್ನು ರದ್ದು ಮಾಡಿದ್ದು, ಹಿರಿಯ ಪೊಲೀಸರ ಸಹಾಯಕ್ಕೆ ಡಿ ಗ್ರೂಪ್‌ ಶ್ರೇಣಿಯ  ನೌಕರರನ್ನು ನೇಮಕ ಮಾಡಿಕೊಂಡು “ಫಾಲೋವರ್ಸ್‌’ಎಂಬ ಹುದ್ದೆ ಸೃಷ್ಟಿಸಲಿದೆ ಎಂದು ತಿಳಿಸಿದರು.

ಸುಮಾರು 3 ಸಾವಿರ ಮಂದಿ ಆರ್ಡರ್ಲಿ ಸಿಬ್ಬಂದಿಯನ್ನು ಬಿಡುಗಡೆ ಮಾಡಿ ಅವರ ಜಾಗಕ್ಕೆ ಫಾಲೋವರ್ಸ್‌ ನೇಮಕ ಮಾಡಲಾಗುವುದು.  ಈ ಬಗ್ಗೆ ಮುಖ್ಯಮಂತ್ರಿಗಳಿಗೆ ಈಗಾಗಲೇ ಶಿಫಾರಸು ಮಾಡಲಾಗಿದೆ ಎಂದು ಹೇಳಿದರು.