Organ Donation; ಸಾವಿನ ನಂತರವೂ ನೆರವಾದ ಜೀವ: 5 ಜೀವ ಉಳಿಸಿದ ಅಂಗಾಂಗ ದಾನ

Team Udayavani, Nov 7, 2024, 11:28 AM IST

ಬೆಂಗಳೂರು: ವೈದ್ಯಕೀಯ ತುರ್ತು ಪರಿಸ್ಥಿತಿಯಿಂದ ಅನಿರೀಕ್ಷಿತವಾಗಿ ನಿಧನರಾದ 43 ವರ್ಷದ ಬಡಗಿ ಮಾರ್ಕಂಡ ಅವರ ಕುಟುಂಬವು ಅಂಗಗಳನ್ನು ದಾನ ಮಾಡಿ ಮಾದರಿಯಾಗಿದೆ.

ಮಾರ್ಕಂಡ ಅವರು ಕೆಲವು ದಿನಗಳಿಂದ ಜ್ವರದಿಂದ ಬಳಲುತ್ತಿದ್ದು, ತೀವ್ರ ತಲೆನೋವಿನಿಂದ ಕೆಲಸದಲ್ಲಿ ಕುಸಿದುಬಿದ್ದರು ಮತ್ತು ತಕ್ಷಣ ಅವರನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಮೆದುಳಿನಲ್ಲಿ ದೊಡ್ಡ ಇಂಟ್ರಾಕ್ರೇನಿಯಲ್ ರಕ್ತಸ್ರಾವವಾಗಿದ್ದು ಸಿಟಿ ಸ್ಕ್ಯಾನ್ ನಲ್ಲಿ ಪತ್ತೆಯಾಗಿತ್ತು.

ಆದರೆ ಚಿಕಿತ್ಸೆಯ ಹೊರತಾಗಿಯೂ ಬ್ರೈನ್ ಡೆಡ್ ಆಗಿತ್ತು. ಹೀಗಾಗಿ ಮಾರ್ಕಂಡ ಅವರ ಕುಟುಂಬ ಅಂಗಗಳನ್ನು ದಾನ ಮಾಡಲು ನಿರ್ಧರಿಸಿದೆ. ಆ ಮೂಲಕ ಅವರು ಸತ್ತ ನಂತರವೂ ಇತರರಿಗೆ ಸಹಾಯ ಮಾಡಲು ಮುಂದಾಗಿ ಮಾದರಿಯಾದರು.

ಮಣಿಪಾಲ್ ಆಸ್ಪತ್ರೆಯ ವೈದ್ಯಕೀಯ ತಂಡವು ಅವರ ಯಕೃತ್ತು, ಎರಡು ಮೂತ್ರಪಿಂಡಗಳು ಮತ್ತು ಕಾರ್ನಿಯಾಗಳನ್ನು ಯಶಸ್ವಿಯಾಗಿ ಕಸಿ ಮಾಡಲು ತೆಗೆದುಕೊಳ್ಳಲಾಗಿದೆ, ಆ ಮೂಲಕ ಜೀವ ಉಳಿಸುವ ಶಸ್ತ್ರಚಿಕಿತ್ಸೆಯ ಅಗತ್ಯವಿರುವ ಐದು ಜನರಿಗೆ ಹೊಸ ಭರವಸೆಯನ್ನು ನೀಡಿದೆ.

ಹಳೆ ವಿಮಾನ ನಿಲ್ದಾಣ ರಸ್ತೆಯಲ್ಲಿರುವ ಮಣಿಪಾಲ್ ಆಸ್ಪತ್ರೆಯ ಕನ್ಸಲ್ಟೆಂಟ್ –   ಕ್ರಿಟಿಕಲ್ ಕೇರ್ ಮತ್ತು ಐಸಿಯು ಡಾ.ನಾರಾಯಣ ಸ್ವಾಮಿ ಮೂಲಾ ಮಾತನಾಡಿ, “ಸಾವಿನ ನಂತರ ಒಬ್ಬ ವ್ಯಕ್ತಿಯು ತನ್ನ ಅಂಗಗಳನ್ನು ದಾನ ಮಾಡುವ ಮೂಲಕ ಹೇಗೆ ದೊಡ್ಡ ಬದಲಾವಣೆಯನ್ನು ಮಾಡಬಹುದು ಎಂಬುದನ್ನು ಈ ಪ್ರಕರಣವು ತೋರಿಸುತ್ತದೆ. ಅವರ ಕುಟುಂಬದ ನಿರ್ಧಾರವು ಇಂತಹ ದುಃಖದ ಸಮಯದಲ್ಲಿ ಕೂಡ ಇತರರಿಗೆ ಭರವಸೆ ನೀಡುವ ಉದಾತ್ತ ಭಾವನೆಯನ್ನು ತೋರಿಸುತ್ತದೆ. ಜೀವಗಳನ್ನು ಉಳಿಸಲು ಅಂಗಾಂಗ ದಾನದ ಬಗ್ಗೆ ಯೋಚಿಸಲು ಮತ್ತು ಈ ಪ್ರಮುಖ ವಿಷಯದ ಬಗ್ಗೆ ಮಾತನಾಡಲು ನಾವು ಪ್ರತಿಯೊಬ್ಬರನ್ನು ಒತ್ತಾಯಿಸುತ್ತೇವೆ” ಎಂದರು.

ಈ ನಿಸ್ವಾರ್ಥ ಕಾರ್ಯದ ಮೂಲಕ, ಮಾರ್ಕಂಡ ಅವರ ಪತ್ನಿ (ಬೇಬಿ), ತಾಯಿ (ಜಯಮ್ಮ), ಮತ್ತು ಸಹೋದರ (ಕೃಷ್ಣಾಚಾರಿ) ಐದು ಜನರಿಗೆ ಭರವಸೆಯನ್ನು ನೀಡುವ ಜೊತೆಗೆ ಅಂಗಾಂಗ ದಾನದ ಮಹತ್ವದ ಬಗ್ಗೆ ಯೋಚಿಸಲು ಅನೇಕರಿಗೆ ಪ್ರೇರಣೆ ನೀಡಿದ್ದಾರೆ.