ಪಾರ್ಕಿಂಗ್‌ ಗಲಾಟೆ: ಈಶಾನ್ಯ ಭಾರತೀಯನ ಮೇಲೆ ಹಲ್ಲೆ

Team Udayavani, Jan 12, 2017, 11:45 AM IST

ಬೆಂಗಳೂರು: ಮನೆ ಮುಂದೆ ವಾಹನ ನಿಲುಗಡೆ ವಿಚಾರವಾಗಿ ಇತ್ತೀಚೆಗೆ ಈಶಾನ್ಯ ಭಾರತೀಯ ಮೂಲದ ಯುವಕನ ಮೇಲೆ ಹಲ್ಲೆ ನಡೆಸಿದ ಆರೋಪ ಸಂಬಂಧ 80 ವರ್ಷದ ವಯೋವೃದ್ಧ ಸೇರಿದಂತೆ ಒಂದೇ ಕುಟುಂಬದ ಮೂವರನ್ನು ಬಂಧಿಸಿದ ಬಾಣಸವಾಡಿ ಪೊಲೀಸರು ಬಳಿಕ ಆರೋಪಿಗಳನ್ನು ಠಾಣಾ ಜಾಮೀನ ಮೇಲೆ ಬಿಡುಗಡೆ ಮಾಡಿದ್ದಾರೆ.

ಅಕ್ಕಯ್ಯಮ್ಮ ಲೇಔಟ್‌ ನಿವಾಸಿಗಳಾದ ಕ್ಲಿಪೋರ್ಡ್‌ ವಿಲ್ಸನ್‌, ಅವರ ಪುತ್ರ ಕಾರ್ಲ್ಟನ್‌ ವಿಲ್ಸನ್‌ ಹಾಗೂ ಸೊಸೆ ಲೀನ್‌ ವಿಲ್ಸನ್‌ ಬಂಧಿತರು. ಡಿ. 26ರಂದು ವಾಹನ ನಿಲುಗಡೆ ವಿಚಾರಕ್ಕೆ ನೆರೆಮನೆಯ ಮಿಜೋರಾಂ ಮೂಲದ ಝರ್ರಿ ಎಂಬುವರ ಮೇಲೆ ವಿಲ್ಸನ್‌ ಕುಟುಂಬ ಹಲ್ಲೆ ನಡೆಸಿತ್ತು. ಈ ಗಲಾಟೆಯನ್ನು ತನ್ನ ಮೊಬೈಲ್‌ನಲ್ಲಿ ಚಿತ್ರೀಕರಿಸಿಕೊಂಡಿದ್ದ ಯುವಕನೊಬ್ಬ ವಾಟ್ಸ್‌ಆ್ಯಪ್‌ ಮೂಲಕ ಪೊಲೀಸರಿಗೆ ಕಳುಹಿಸಿದ್ದ. ಇದನ್ನು ಗಂಭೀರವಾಗಿ ಪರಿಗಣಿಸಿದ ಪೊಲೀಸರು, ಸ್ವಯಂ ಪ್ರೇರಿತವಾಗಿ ಪ್ರಕರಣ ದಾಖಲಿಸಿಕೊಂಡು ವಿಲ್ಸನ್‌ ಕುಟುಂಬವನ್ನು ಬಂಧಿಸಿದ್ದಾರೆ.

ಬಳಿಕ ಇಂತಹ ದುಂಡಾವರ್ತನೆ ಮರುಕಳಿಸಬಾರದು ಎಂದು ಎಚ್ಚರಿಕೆ ನೀಡಿ ಠಾಣಾ ಜಾಮೀನು ಆಧರಿಸಿ ಬಿಡುಗಡೆ ಮಾಡಿರುವುದಾಗಿ ಅಧಿಕಾರಿಗಳು ಹೇಳಿದ್ದಾರೆ.  ಬೈಕ್‌ ಬೀಳಿಸಿದ ವಿಚಾರಕ್ಕೆ ನಮಗೆ ಝರ್ರಿ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದ. ಅಲ್ಲದೆ, ಮಧ್ಯರಾತ್ರಿಯಾಗಿದ್ದು, ಬೆಳಗ್ಗೆ ಬಂದು ಮಾತನಾಡುವಂತೆ ಹೇಳಿದರೂ ಕೇಳದೆ ಅತಿರೇಕವಾಗಿ ವರ್ತಿಸಿದ್ದ. ಹೀಗಾಗಿ ಆತನ ಮೇಲೆ ಹಲ್ಲೆ ನಡೆಸಿದ್ದಾಗಿ ವಿಲ್ಸನ್‌ ಕುಟುಂಬ ವಿಚಾರಣೆ ವೇಳೆ ಹೇಳಿಕೆ ನೀಡಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 

ಮಧ್ಯೆ ರಾತ್ರಿ ಗಲಾಟೆ: ಕಳೆದ ನಾಲ್ಕು ತಿಂಗಳಿನಿಂದ ಅಕ್ಕಯ್ಯಮ್ಮ ಲೇಔಟ್‌ನಲ್ಲಿ ವಿಲ್ಸನ್‌ ನೆರೆಮನೆಯಲ್ಲಿ ಝರ್ರಿ ವಾಸವಾಗಿದ್ದು, ಮನೆ ಹತ್ತಿರದ ಕೌÒರದ ಅಂಗಡಿಯಲ್ಲಿ ಕೆಲಸ ಮಾಡುತ್ತಿದ್ದ. ವಿಲ್ಸನ್‌ ಮನೆಯ ಕಾಂಪೌಂಡ್‌ ಬಳಿಯೇ ಆತ ತನ್ನ ಬೈಕ್‌ ನಿಲ್ಲಿಸುತ್ತಿದ್ದ. ಇದಕ್ಕೆ ಆಕ್ಷೇಪಿಸಿದ್ದ ವಿಲ್ಸನ್‌, ತಮ್ಮ ಮನೆ ಬಳಿ ಬೈಕ್‌ ನಿಲ್ಲಿಸದಂತೆ ತಾಕೀತು ಮಾಡಿದ್ದರು. ಈ ಸಂಬಂಧ ಹಲವು ಬಾರಿ ಅವರಲ್ಲಿ ಗಲಾಟೆಗಳಾಗಿದ್ದವು. 

ಡಿಸೆಂಬರ್‌ 26ರಂದು ರಾತ್ರಿ ಝರ್ರಿ ಹಾಗೂ ಅವನ ಸ್ನೇಹಿತ ತಮ್ಮ ಬೈಕ್‌ಗಳನ್ನು ವಿಲ್ಸನ್‌ ಮನೆ ಬಳಿ ನಿಲ್ಲಿಸಿದ್ದರು. ಕೆಲ ಹೊತ್ತಿನ ನಂತರ ವಾಪಸ್‌ ಬಂದಾಗ ಬೈಕ್‌ಗಳು ಕೆಳಗೆ ಬಿದ್ದಿದ್ದು, ಇದರಿಂದ ಕೆರಳಿದ ಝರ್ರಿ, ಬೈಕ್‌ಗಳನ್ನು ವಿಲ್ಸನ್‌ ಕುಟುಂಬದವರೇ ಬೀಳಿಸಿದ್ದಾರೆ ಎಂದು ಅನುಮಾನಿಸಿದ್ದ. ಈ ಬಗ್ಗೆ ಪ್ರಶ್ನಿಸಲು ಅವರ ಮನೆ ಬಾಗಿಲು ಬಡಿದು ಜೋರು ದನಿಯಲ್ಲಿ ಕೂಗಾಡಿದ್ದಾನೆ.

ಮಧ್ಯರಾತ್ರಿ ಗಾಢ ನಿದ್ದೆಯಲ್ಲಿದ್ದ ವಿಲ್ಸನ್‌ ಕುಟುಂಬ ಎದ್ದು ಹೊರಬಂದಾಗ, ಬೈಕ್‌ ಬೀಳಿಸಿದ್ದೇಕೆ? ಎಂದು ಪ್ರಶ್ನಿಸಿದ್ದ. ಇದಕ್ಕೆ ಪ್ರತಿಕ್ರಿಯಿಸಿದ ಕುಟುಂಬದ ಸದಸ್ಯರು, ನಾವು ಬೈಕ್‌ಗಳನ್ನು ಬೀಳಿಸಿಲ್ಲ. ಬೆಳಗ್ಗೆ ಬಾ ಮಾತನಾಡೋಣ ಎಂದು ಹೇಳಿದ್ದರು. ಆದರೆ, ಇದರಿಂದ ಸಮಾಧಾನಗೊಳ್ಳದ ಆತ “ನೀವೇ ಬೈಕ್‌ ಬೀಳಿಸಿದ್ದೀರಿ’ ಎಂದು ಮತ್ತೆ ಕೂಗಾಟ ಶುರು ಮಾಡಿದ್ದಾನೆ. ಇದರಿಂದ ಕೆರಳಿದ ವಿಲ್ಸನ್‌ ಕುಟುಂಬದವರು ಕೆನ್ನೆಗೆ ಬಾರಿಸಿದ್ದಲ್ಲದೆ, ಕೋಲಿನಿಂದ ಹೊಡೆದಿದ್ದರು.

ಈ ಗಲಾಟೆ ದೃಶ್ಯಾವಳಿಗಳನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿಕೊಂಡಿದ್ದ ಪಕ್ಕದ ಕಟ್ಟಡದ ಯುವಕನೊಬ್ಬ, ಅದನ್ನು ಬಾಣಸವಾಡಿ ಠಾಣೆ ಇನ್ಸ್‌ಪೆಕ್ಟರ್‌ಗೆ ವಾಟ್ಸ್‌ಆ್ಯಪ್‌ ಮೂಲಕ ಕಳುಹಿಸಿದ್ದ. ಇದನ್ನು ಆಧರಿಸಿ ಜ.6 ರಂದು ಸ್ವಯಂಪ್ರೇರಿತ ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳನ್ನು ಬಂಧಿಸಲಾಗಿತ್ತು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.