ವಿವಿಯಲ್ಲಿ ಉದ್ಯೋಗ ಬ್ರೋಕರ್‌ಗಳ ಹಾವಳಿ

Team Udayavani, Aug 16, 2019, 3:09 AM IST

ಬೆಂಗಳೂರು: ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಮಧ್ಯವರ್ತಿಗಳ ಹಾವಳಿ ಹೆಚ್ಚಾಗಿದೆ. ಈವರೆಗೆ ಕಾಲೇಜುಗಳಲ್ಲಿ ಸೀಟು ಕೊಡಿಸುವುದಾಗಿ ವಂಚನೆ ಮಾಡುತಿದ್ದ ವಂಚಕರು, ಈಗ ಕೆಲಸ ಕೊಡಿಸುವುದಾಗಿ ಹೇಳಿ ಲಕ್ಷ ಲಕ್ಷ ಹಣ ಪಡೆದುಕೊಂಡು ಪರಾರಿಯಾಗುತ್ತಿದ್ದಾರೆ.

ವಿ.ವಿ.ಯಲ್ಲಿ ನೇಮಕಾತಿ ಅಧಿಸೂಚನೆ ಹೊರಡಿಸುವ ಮುನ್ನ ಹತ್ತು ಗ್ರೇಡ್‌-1 ಅಧಿಕಾರಿಗಳ ಹುದ್ದೆಗೆ ವಿಶ್ವವಿದ್ಯಾಲಯದಲ್ಲಿ ನೇರ ನೇಮಕಾತಿ ಮಾಡಿಸುವುದಾಗಿ ಹೇಳಿ ಹಣ ಪಡೆದುಕೊಂಡಿರುವ ಮಧ್ಯವರ್ತಿಗಳು, ಕುಲಪತಿ ಹಾಗೂ ಕುಲಸಚಿವರ ಫೋರ್ಜರಿ ಸಹಿ ಇರುವ ನಕಲಿ ಆದೇಶ ಪ್ರತಿ ನೀಡಿ ತಲೆ ಮರೆಸಿಕೊಂಡಿದ್ದಾರೆ.

ಆದೇಶ ಪ್ರತಿಯಲ್ಲಿ “ಜೂನ್‌ 25 ಅಥವಾ ಜುಲೈ 15ರಂದು ವಿಶ್ವವಿದ್ಯಾಲಯದ ಕಚೇರಿ ಅಧೀಕ್ಷಕರಾಗಿ ಕರ್ತವ್ಯಕ್ಕೆ ಹಾಜರಾಗಲು ಸಿಂಡಿಕೇಟ್‌ ಸಭೆ ಮತ್ತು ವಿಶ್ವವಿದ್ಯಾಲಯ ಧನ ಸಹಾಯ ಆಯೋಗ (ಯುಜಿಸಿ) ಸೂಚಿಸಿದೆ,’ ಎಂದು ನಮೂದಿಸಲಾಗಿದೆ. ಅದರಂತೆ ಆದೇಶ ಪ್ರತಿ ಪಡೆದ ಅಭ್ಯರ್ಥಿಗಳು ಬೆಂಗಳೂರು ವಿವಿ ಕೇಂದ್ರ ಕಚೇರಿಯಲ್ಲಿ ಅಧಿಕಾರ ವಹಿಸಿಕೊಳ್ಳಲು ಹೋದಾಗ ತಾವು ವಂಚನೆಗೊಳಗಾಗಿರುವುದು ತಿಳಿದುಬಂದಿದೆ.

ವಂಚನೆಗೊಳಗಾದ ಅಭ್ಯರ್ಥಿಗಳು ಜ್ಞಾನಭಾರತಿ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ವಂಚಕನಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ವಂಚಕ ನೀಡಿದ್ದ ಆದೇಶದ ಒಂದು ಪ್ರತಿಯನ್ನು ಬೆಂಗಳೂರು ವಿ.ವಿ.ಗೆ ನೀಡಿದ್ದು, ಆದೇಶ ಪತ್ರದಲ್ಲಿರುವ ಕುಲಪತಿ ಹಾಗೂ ಕುಲಸಚಿವರ ಸಹಿ ಅಸಲಿಯೋ ಅಥವಾ ನಕಲಿ ಎಂದು ಪರಿಶೀಲಿಸಿ ವರದಿ ನೀಡುವಂತೆ ಪೊಲೀಸರು ಕೋರಿದ್ದಾರೆ. ಸಹಿಗಳು ನಕಲಿ ಎಂದು ಬೆಂಗಳೂರು ವಿವಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಹೀಗಾಗಿ ಆದೇಶ ಪತ್ರವನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದ್ದು, ವರದಿ ಬಂದ ಕೂಡಲೆ ಸತ್ಯ ಹೊರಬೀಳಲಿದೆ.

ವಿವಿ ಸಿಬ್ಬಂದಿ ಕೈವಾಡ?: ಬೆಂಗಳೂರು ವಿವಿಯ ಲೆಟರ್‌ ಹೆಡ್‌ ಬಳಸಿ ಆದೇಶ ಪ್ರತಿ ನೀಡಿರುವ ವಂಚಕನ ಮಾಸ್ಟರ್‌ ಪ್ಲಾನ್‌ ಹಿಂದೆ ವಿವಿ ಸಿಬ್ಬಂದಿಯ ಕೈವಾಡವಿರಬಹುದು, ಜತೆಗೆ ಲೆಟರ್‌ ಹೆಡ್‌ನ‌ಲ್ಲಿರುವ ಕುಲಪತಿ, ಕುಲಸಿಚವರ ಸಹಿಗಳ ಕೆಳಗೆ ವಿಶ್ವವಿದ್ಯಾಲಯದ ಮುದ್ರೆ ಕೂಡ ಬಳಸಲಾಗಿದೆ. ಹೀಗಾಗಿ ವಿವಿ ಸಿಬ್ಬಂದಿ ಪಾತ್ರ ಇರಬಹುದು ಎಂದು ಇಲಾಖಾ ಮೂಲಗಳು ಅನುಮಾನಿಸಿವೆ.

ಪತ್ರದಲ್ಲೇನಿದೆ?: ಬೆಂಗಳೂರು ವಿವಿ ಲೆಟರ್‌ ಹೆಡ್‌ ಬಳಸಿರುವ ವಂಚಕ, ಪತ್ರದಲ್ಲಿ ವಿಶ್ವವಿದ್ಯಾಲಯದ ಕುಲಪತಿ, ನಾಮನಿರ್ದೇಶಿತ ಸದಸ್ಯ, ಕುಲಸಚಿವ, ಉನ್ನತ ಶಿಕ್ಷಣ ಸಚಿವ, ಮುಖ್ಯಮಂತ್ರಿಗಳ ಆದೇಶ ಮತ್ತು ರಾಜ್ಯಪಾಲರ ಕಚೇರಿಗಳ ನಕಲಿ ಆದೇಶ ಸಂಖ್ಯೆ ಉಲ್ಲೇಖೀಸಿದ್ದಾನೆ. ಆದೇಶ ಪ್ರತಿ, ಅನುಮೋದನೆ ಪತ್ರ, ಕರ್ನಾಟಕ ರಾಜ್ಯಪಾಲರ ನಾಮ ನಿರ್ದೇಶಕ ಸದಸ್ಯರ ನಿರಾಕ್ಷೇಪಣಾ ಪ್ರಮಾಣ ಪತ್ರ, ಜಿಲ್ಲಾ ವರಿಷ್ಠಾಧಿಕಾರಿಗಳ ದೃಢೀಕರಣ ಪತ್ರ, ಆರೋಗ್ಯ ಪ್ರಮಾಣ ಪತ್ರ, ಸಿಂಧುತ್ವ ಪತ್ರ ಸೇರಿದಂತೆ ಹಲವು ಅಗತ್ಯ ದಾಖಲೆಗಳೊಂದಿಗೆ ಕೆಲಸಕ್ಕೆ ಹಾಜರಾಗುವಂತೆ ಸೂಚಿಸಲಾಗಿತ್ತು.

2007ರಲ್ಲಿ ಕಾಣಿಸಿಕೊಂಡಿದ್ದ ವಂಚಕರು: ಕೆಲಸ ಕೊಡಿಸುವುದಾಗಿ ಹೇಳಿ ಬೆಂಗಳೂರು ವಿವಿ ಸಿಬ್ಬಂದಿಯೇ ವಂಚನೆ ಮಾಡಿದ್ದ ಪ್ರಕರಣ 2007ರಲ್ಲಿ ಬೆಳಕಿಗೆ ಬಂದಿತ್ತು. ನಂತರ ಅನಧಿಕೃತ ವ್ಯಕ್ತಿಗಳು ವಿವಿ ಆವರಣ ಪ್ರವೇಶಿಸದಂತೆ ಎಚ್ಚರ ವಹಿಸಲಾಗಿತ್ತು. ಆದರೆ ಇತ್ತೀಚೆಗೆ ಮತ್ತೆ ವಿವಿ ಆವರಣದಲ್ಲಿ ಮಧ್ಯವರ್ತಿಗಳ ಹಾವಳಿ ಹೆಚ್ಚಾಗಿದ್ದು, ಸೀಟು, ಪದವಿ, ಕೆಲಸ ಕೊಡಿಸುವುದಾಗಿ ಹೇಳಿ ಹಣ ದೋಚುತ್ತಿರುವುದಾಗಿ ವಂಚನೆಗೊಳಗಾದ ವ್ಯಕ್ತಿ ಆರೋಪಿಸಿದ್ದಾರೆ.

ವಿವಿ ನಿರ್ಲಕ್ಷ್ಯವೇ ಕಾರಣ: ವಿಶ್ವವಿದ್ಯಾಲಯದ ಆವರಣಕ್ಕೆ ಪ್ರತಿನಿತ್ಯ ನೂರಾರು ಅನಧಿಕೃತ ವ್ಯಕ್ತಿಗಳು ಬರುತಿದ್ದು, ದೂರದ ಊರುಗಳಿಂದ ಬರುವ ವಿದ್ಯಾರ್ಥಿಗಳಿಗೆ ನೆರವಾಗುವ ಸೋಗಿನಲ್ಲಿ ವಂಚನೆ ಮಾಡುತಿದ್ದಾರೆ. ಈ ಸಂಬಂಧ ವಿಶ್ವವಿದ್ಯಾಲಯ ಎಚ್ಚರಿಕೆ ವಹಿಸಬೇಕಿದ್ದು, ಅಂತಹ ಮಧ್ಯವರ್ತಿಗಳು ಕಂಡುಬಂದ ಕೂಡಲೆ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡುವ ಕೆಲಸ ಮಾಡಬೇಕಿದೆ. ವಿವಿಯ ಕೇಂದ್ರ ಕಚೇರಿ, ಪರೀಕ್ಷಾ ಭವನ ಸೇರಿ ಹಲವೆಡೆ ಮಧ್ಯವರ್ತಿಗಳು ಕಂಡುಬಂದಲ್ಲಿ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡುವಂತೆ ಸಾರ್ವಜನಿಕ ಪ್ರಕಟಣೆಗಳನ್ನು ಪ್ರದರ್ಶಿಸಬೇಕು ಎಂದು ಬೆಂಗಳೂರು ವಿವಿ ಸ್ನಾತಕೋತ್ತರ ಮತ್ತು ಸಶೋಧನಾ ವಿದ್ಯಾರ್ಥಿಗಳ ಸಂಘದ ಅಧ್ಯಕ್ಷ ಎಂ.ವೆಂಕಟಾಚಲ ಆಗ್ರಹಿಸಿದ್ದಾರೆ.

ಕುಲಪತಿ ಮತ್ತು ಕುಲಸಚಿವರ ಸಹಿ ನಕಲು ಮಾಡಿ ಉದ್ಯೋಗಾಕಾಂಕ್ಷಿಗಳನ್ನು ವಂಚಿಸಿರುವುದು ತಿಳಿದು ಬಂದಿದೆ. ವಿಶ್ವವಿದ್ಯಾಲಯದ ಆವರಣದಲ್ಲಿ ಇಂತಹ ವಂಚನೆಗಳಿಗೆ ಅವಕಾಶ ನೀಡದಂತೆ ಕ್ರಮ ಕೈಗೊಳ್ಳುತ್ತೇವೆ.
-ಪ್ರೊ.ಕೆ.ಆರ್‌.ವೇಣುಗೋಪಾಲ್‌, ಬೆಂಗಳೂರು ವಿವಿ ಕುಲಪತಿ

* ಲೋಕೇಶ್‌ ರಾಮ್‌