10 ಸಾವಿರ ಕೋಟಿ ಬಜೆಟ್‌ಗೆ ಪಾಲಿಕೆ ಸಿದ್ಧತೆ

Team Udayavani, Mar 11, 2017, 12:04 PM IST

ಬೆಂಗಳೂರು: ರಾಜ್ಯ ಬಜೆಟ್‌ ಬೆನ್ನಲ್ಲೇ ಮಾರ್ಚ್‌ ಕೊನೆಯ ವಾರದಲ್ಲಿ ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ ಬಜೆಟ್‌ ಕೂಡ ಮಂಡನೆಯಾಗಲಿದ್ದು, ಬಜೆಟ್‌ ಗಾತ್ರ 10 ಸಾವಿರ ಕೋಟಿ ರೂ. ಮೀರಲಿದೆ ಎನ್ನಲಾಗಿದೆ. ಮುಂದಿನ ವರ್ಷ ವಿಧಾನಸಭೆ ಚುನಾವಣೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಬಿಬಿಎಂಪಿ ಬಜೆಟ್‌ನಲ್ಲೂ ಜನಪ್ರಿಯ ಕಾರ್ಯಕ್ರಮಗಳ ಮಂತ್ರ ಜಪಿಸುವ ಸಾಧ್ಯತೆಯಿದೆ.

ಹಲವು ವರ್ಷಗಳಿಂದ ಸ್ಥಗಿತಗೊಂಡಿದ್ದ,  ಬಡ ಹೆಣ್ಣು ಮಕ್ಕಳಿಗೆ ಹೊಲಿಗೆ ಯಂತ್ರವನ್ನು ನೇರವಾಗಿ ವಿತರಿಸುವ ಯೋಜನೆಗೆ ಮರು ಚಾಲನೆ ನೀಡುವುದು, ಯುವ ಸಮೂಹಕ್ಕೆ ಬಹುಪಯೋಗಿ ಸೈಕಲ್‌ ವಿತರಿಸುವುದು, ಪೌರ ಕಾರ್ಮಿಕರು ಹಾಗೂ ಹಿಂದುಳಿದ, ಅಲ್ಪಸಂಖ್ಯಾತರ, ಪರಿಶಿಷ್ಟ ಜಾತಿ, ವರ್ಗಗಳ ಅಭಿವೃದ್ಧಿಗೆ ಈ ಬಾರಿಯ ಬಜೆಟ್‌ನಲ್ಲಿ ಹೆಚ್ಚು ಒತ್ತು ನೀಡುವ ನಿರೀಕ್ಷೆಯಿದೆ.

ಕಳೆದ ವರ್ಷ ಆದ ಆಸ್ತಿ ತೆರಿಗೆ ಪರಿಷ್ಕರಣೆ ಹಿನ್ನೆಲೆಯಲ್ಲಿ ಈ ವರ್ಷ ತೆರಿಗೆ ಹೆಚ್ಚಳಗೊಂಡಿದೆ. ಆದರೆ, ಆಸ್ತಿ ತೆರಿಗೆ ವ್ಯಾಪ್ತಿಯಿಂದ ಹೊರಗುಳಿದಿರುವ ಆಸ್ತಿಗಳನ್ನು ಪತ್ತೆ ಮಾಡಿ ದಂಡ ಸಹಿತ ತೆರಿಗೆ ವಸೂಲು ಹಾಗೂ ತಪ್ಪು ಮಾಹಿತಿ ನೀಡಿ ತೆರಿಗೆ ವಂಚಿಸಿರುವ ಕಟ್ಟಡಗಳ ತಪಾಸಣೆಗೆ ಜಾಗೃತ ದಳ ರಚನೆ, ಪಾರ್ಕಿಂಗ್‌ ಶುಲ್ಕ ಮತ್ತೆ ಜಾರಿಗೊಳಿಸುವ ಕ್ರಮಗಳ ಮೂಲಕ ಸಂಪನ್ಮೂಲ ಕ್ರೋಢೀಕರಣಕ್ಕೆ ಆದ್ಯತೆ ನೀಡಲಾಗುತ್ತದೆ ಎಂದು ಪಾಲಿಕೆಯ ಮೂಲಗಳು ತಿಳಿಸಿವೆ.

ಈ ಬಾರಿಯೂ ಮೇಯರ್‌ ಅನುದಾನ 100 ಕೋಟಿ ರೂ., ಉಪ ಮೇಯರ್‌ ಅನುದಾನ 50 ಕೋಟಿ ರೂ., ಜಿಲ್ಲಾ ಉಸ್ತುವಾರಿ ಸಚಿವರ ಅನುದಾನ 150 ಕೋಟಿ ರೂ. ಹಾಗೂ ಶಾಸಕರ ನಿಧಿ (ವಿಧಾನಸಭೆ ಕ್ಷೇತ್ರಾವಾರು ಅಭಿವೃದ್ಧಿ ಹೆಸರಿನಲ್ಲಿ ತಲಾ 5 ಕೋಟಿ ರೂ.) 500 ಕೋಟಿ ರೂ. ನೀಡುವ ಸಾಧ್ಯತೆಗಳಿವೆ. 

2015ರ ಪಾಲಿಕೆ ಚುನಾವಣೆ ನಂತರ ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಮೈತ್ರಿ ಆಡಳಿತದ ಎರಡನೇ ಬಜೆಟ್‌ ಇದಾಗಿದ್ದು, ಆಡಳಿತಕ್ಕೆ ಜತೆಗೂಡಿರುವ ಜೆಡಿಎಸ್‌ ಸಹ ಬಜೆಟ್‌ಗೆ ಬೇಡಿಕೆಗಳ ಪಟ್ಟಿ ನೀಡಿದೆ. ಜೆಡಿಎಸ್‌ನ ಸಲಹೆಗಳನ್ನು ಪರಿಗಣಿಸಿ ಬಜೆಟ್‌ ಮಂಡನೆ ಮಾಡುವ ಅನಿವಾರ್ಯತೆಯೂ ಸೃಷ್ಟಿಯಾಗಿದೆ. 

ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಆಸ್ತಿ ತೆರಿಗೆ ಸಂಗ್ರಹದಲ್ಲಿ ಇದೇ ಮೊದಲ ಬಾರಿ ಪಾಲಿಕೆಗೆ 2 ಸಾವಿರ ಕೋಟಿ ರೂಪಾಯಿಗೂ ಹೆಚ್ಚಿನ ಆದಾಯ ಸಂಗ್ರಹವಾಗಿದೆ. ಜತೆಗೆ ಜಾಹೀರಾತು, ಒಎಫ್ಸಿ, ಮಾರುಕಟ್ಟೆ ಹೀಗೆ ವಿವಿಧ ಮೂಲಗಳಿಂದ ಬರುವ ಆದಾಯದ ಪ್ರಮಾಣದಲ್ಲಿ ಸ್ವಲ್ಪಮಟ್ಟಿಗೆ ಹೆಚ್ಚಳವಾದ ಹಿನ್ನೆಲೆಯಲ್ಲಿ ಬಜೆಟ್‌ ಗಾತ್ರ 10 ಸಾವಿರ ಕೋಟಿ ಮೀರುವ ನಿರೀಕ್ಷೆಗಳಿವೆ. 

ಹೊಲಿಗೆ ಯಂತ್ರ: ಬಡ ಹಾಗೂ ಮಧ್ಯಮ ವರ್ಗದ ಮಹಿಳೆಯರಿಗೆ ಸ್ವಯಂ ಉದ್ಯೋಗ ದೊರಕಿಸಿ ಕೊಡುವ ಉದ್ದೇಶದಿಂದ ನೀಡಲಾಗುತ್ತಿದ್ದ ಹೊಲಿಗೆ ಯಂತ್ರ ವಿತರಣೆ ಕಾರ್ಯಕ್ರಮ ಹಲವು ವರ್ಷಗಳಿಂದ ಸ್ಥಗಿತಗೊಂಡಿತ್ತು. ಚೆಕ್‌ ಮೂಲಕ ಹೊಲಿಗೆ ಯಂತ್ರದ ಮೊತ್ತ ನೀಡಲಾಗುತ್ತಿತ್ತಾದರೂ ಅದು ಕಾರಣಾಂತರಗಳಿಂದ ನಿಂತಿತ್ತು.  ಈ ವರ್ಷದ ಬಜೆಟ್‌ನಲ್ಲಿ ಹೊಲಿಗೆ ಯಂತ್ರ ವಿತರಣೆ ಮತ್ತೆ ಆರಂಭಿಸಲು ನಿರ್ಧರಿಸಲಾಗಿದೆ. ಮೇಯರ್‌ ಪದ್ಮಾವತಿ ಈ ವಿಚಾರದಲ್ಲಿ ಹೆಚ್ಚು ಆಸಕ್ತಿ ವಹಿಸಿದ್ದು, ಪಕ್ಷಾತೀತವಾಗಿ ಇತರೆ ಮಹಿಳಾ ಸದಸ್ಯೆಯರ ಒತ್ತಾಯವೂ ಇದೆ ಎಂದು ಹೇಳಲಾಗಿದೆ.

ಮಾಲಿನ್ಯ ತಡೆಗೆ ಬೈಸಿಕಲ್‌: ಪ್ರತಿ ವಾರ್ಡ್‌ನಲ್ಲಿರುವ 50 ಯುವಕರಿಗೆ ಬಹುಪಯೋಗಿ ಬೈಸಿಕಲ್‌ ವಿತರಿಸುವ ಯೋಜನೆಯನ್ನು ಬಜೆಟ್‌ನಲ್ಲಿ ಘೋಷಿಸಲಾಗುವುದು ಎಂದು ತಿಳಿದು ಬಂದಿದೆ. ಬಿಬಿಎಂಪಿ ವ್ಯಾಪ್ತಿಯಲ್ಲಿರುವ ರುದ್ರಭೂಮಿಗಳು ಮೂಲ ಸೌಲಭ್ಯಗಳಿಲ್ಲದೆ ಸೊರಗುತ್ತಿರುವ ಬಗ್ಗೆ ಸಾರ್ವಜನಿಕರಿಂದ ದೂರುಗಳು ಬಂದ ಹಿನ್ನೆಲೆಯಲ್ಲಿ 2017ಧಿ-18 ಸಾಲಿನ ಬಜೆಟ್‌ನಲ್ಲಿ ನಗರದಲ್ಲಿರುವ ಎಲ್ಲ ರುದ್ರಭೂಮಿಗಳ ಅಭಿವೃದ್ಧಿಗೆ ವಿಶೇಷ ಕಾರ್ಯಕ್ರಮ ಘೊಷಣೆಯಾಗಲಿದೆ.

ಈ ಬಾರಿಯ ಬಜೆಟ್‌ನಲ್ಲಿ ಸ್ತ್ರೀಸಬಲೀಕರಣಕ್ಕೆ ಹೆಚ್ಚಿನ ಒತ್ತು ನೀಡಲಾಗುವುದು. ಬಡವರು ಹಾಗೂ ಯುವ ಸಮೂಹಕ್ಕೆ ಅನುಕೂಲವಾಗುವ ಕಾರ್ಯಕ್ರಮಗಳನ್ನು ರೂಪಿಸಲು ಚಿಂತನೆ ನಡೆಸಲಾಗಿದೆ. ಜತೆಗೆ ಪರಿಸರ ಸಂರಕ್ಷಣೆಗೆ ಹೆಚ್ಚು ಆದ್ಯತೆ ನೀಡಲು ಹಸಿರು ಉಳಿಸುವ ಯೋಜನೆಗಳಿಗೆ ಹೆಚ್ಚು ಒತ್ತು ನೀಡಲಾಗುವುದು.  
-ಜಿ.ಪದ್ಮಾವತಿ, ಮೇಯರ್‌

ಬಿಬಿಎಂಪಿಯಲ್ಲಿ ಅನಗತ್ಯ ವೆಚ್ಚ ಸೋರಿಕೆ ತಡೆಗಟ್ಟಿ ಸಂಪನ್ಮೂಲ ಕ್ರೋಢೀಕರಣಕ್ಕೆ ಹೆಚ್ಚು ಒತ್ತು ನೀಡುವುದು. ಆಡಳಿತ ಚುರುಕುಗೊಳಿಸಲು ಖಾಲಿ ಹುದ್ದೆಗಳ ಭರ್ತಿ ಮಾಡಿಕೊಳ್ಳುವುದು. ಜನಪರ ಕಾರ್ಯಕ್ರಮಗಳಿಗೆ ಹೆಚ್ಚು ಒತ್ತು ಕೊಡುವ ವಾಸ್ತವ ಬಜೆಟ್‌ ಮಂಡಿಸಲಾಗುವುದು. 
-ಎಂ.ಕೆ.ಗುಣಶೇಖರ್‌, ಬಿಬಿಎಂಪಿ ತೆರಿಗೆ ಮತ್ತು ಆರ್ಥಿಕ ಸ್ಥಾಯಿ ಸಮಿತಿ ಅಧ್ಯಕ್ಷ 

* ವೆಂ.ಸುನೀಲ್‌ಕುಮಾರ್‌