ಮುಂದುವರಿದ ವರ್ಷಧಾರೆ

Team Udayavani, Mar 17, 2018, 6:05 AM IST

ಬೆಂಗಳೂರು: ಅರಬ್ಬಿ ಸಮುದ್ರದಲ್ಲಿ ಕಂಡುಬಂದ ತೀವ್ರ ವಾಯುಭಾರ ಕುಸಿತದಿಂದ ರಾಜ್ಯಾದ್ಯಂತ ಮಳೆಯ ಆಟಾಟೋಪ ಮುಂದುವರಿದಿದ್ದು, ಶನಿವಾರ ಕೂಡ ಇದೇ ವಾತಾವರಣ ಇರಲಿದೆ.

ಬೆಂಗಳೂರು ಸೇರಿ ರಾಜ್ಯದ ಬಹುತೇಕ ಎಲ್ಲ ಕಡೆಗಳಲ್ಲಿ ಗುರುವಾರಕ್ಕೆ ಹೋಲಿಸಿದರೆ, ಶುಕ್ರವಾರ ಮಳೆ ಅಬ್ಬರ ತುಸು ಹೆಚ್ಚಿತ್ತು. ಮಂಡ್ಯ ಮತ್ತು ಮೈಸೂರಿನಲ್ಲಿ ಗರಿಷ್ಠ ಮಳೆ ದಾಖಲಾಗಿದೆ. ಇದರಿಂದ ರಾಜ್ಯಾದ್ಯಂತ ತಾಪಮಾನ ಗಣನೀಯ ಪ್ರಮಾಣದಲ್ಲಿ ಕುಸಿದಿದೆ.

ಸಾಮಾನ್ಯವಾಗಿ ಮಾರ್ಚ್‌ನಲ್ಲಿ ಉತ್ತರ ಕರ್ನಾಟಕದಲ್ಲಿ ಉಷ್ಣಾಂಶ ಸಾಮಾನ್ಯಕ್ಕಿಂತ 2-3 ಡಿ.ಸೆ. ಹೆಚ್ಚಿರುತ್ತದೆ. ಆದರೆ, ಸತತ ಮೂರು ದಿನಗಳ ಮಳೆ ಮತ್ತು ಮೋಡಕವಿದ ವಾತಾವರಣದಿಂದ ತಾಪಮಾನ 5ರಿಂದ 6 ಡಿ.ಸೆ.ಕುಸಿತ ಕಂಡಿದೆ. ಬೆಳಗ್ಗೆಯಿಂದ ಎಲ್ಲೆಡೆ ಬಿಸಿಲು ಇತ್ತು. ಸಂಜೆ ಒಮ್ಮೆಲೇ ಧಾರಾಕಾರವಾಗಿ ಮಳೆ ಸುರಿಯಿತು.

ಎಲ್ಲೆಲ್ಲಿ ಎಷ್ಟು ಮಳೆ?: ವಾಯುಭಾರ ಕುಸಿತದ ಪ್ರಭಾವ ದಕ್ಷಿಣ ಒಳನಾಡಿನಲ್ಲಿ ಹೆಚ್ಚು ಇರುವುದರಿಂದ ಹಳೇ ಮೈಸೂರು ಭಾಗದಲ್ಲಿ ಮಳೆ ಅಬ್ಬರ ಅಧಿಕವಾಗಿದೆ. ಮಂಡ್ಯ 128 ಮಿ.ಮೀ., ಮೈಸೂರು 103 ಮಿ.ಮೀ., ಚಾಮರಾಜನಗರ 55.5 ಮಿ.ಮೀ., ಬೆಂಗಳೂರು ನಗರ 58.5 ಮಿ.ಮೀ., ಬೆಂ.ಗ್ರಾಮಾಂತರ 77 ಮಿ.ಮೀ., ಹಾಸನ 23 ಮಿ.ಮೀ., ಚಿಕ್ಕಬಳ್ಳಾಪುರ 27 ಮಿ.ಮೀ. ಮಳೆಯಾಗಿದೆ. ಅದೇ ರೀತಿ ಚಿಕ್ಕಮಗಳೂರು 58.2, ಕೊಡಗು 13, ಶಿವಮೊಗ್ಗ 43.5, ಉತ್ತರ ಕನ್ನಡದಲ್ಲಿ 74.2, ದಾವಣಗೆರೆ 63, ಚಿತ್ರದುರ್ಗ 33.3, ಬೆಳಗಾವಿ 55.5, ತುಮಕೂರು 28.5, ಧಾರವಾಡ 48.5,ಹಾವೇರಿ 68, ಗದಗ 20 ಮಿ.ಮೀ. ಮಳೆ ದಾಖಲಾಗಿದೆ ಎಂದು ಹವಾಮಾನ ಇಲಾಖೆ ಬೆಂಗಳೂರು ಪ್ರಾದೇಶಿಕ ಕಚೇರಿ ಅಧಿಕಾರಿಗಳು ತಿಳಿಸಿದ್ದಾರೆ.