ರಿಯಲ್‌ ಎಸ್ಟೇಟ್‌ ಉದ್ಯಮಿ ಕೊಲೆ

Team Udayavani, Nov 25, 2018, 12:34 PM IST

ಬೆಂಗಳೂರು: ನಾಪತ್ತೆಯಾಗಿದ್ದ ರಿಯಲ್‌ ಎಸ್ಟೇಟ್‌ ಉದ್ಯಮಿಯೊಬ್ಬರು ಶವವಾಗಿ ಪತ್ತೆಯಾಗಿರುವ ಘಟನೆ ಯಲಹಂಕ ಉಪ ನಗರ ಠಾಣಾ ವ್ಯಾಪ್ತಿಯಲ್ಲಿ ಶನಿವಾರ ನಡೆದಿದೆ. ಸಂಪಿಗೆಹಳ್ಳಿಯ ವೆಂಕಟೇಶ್ವರನಗರದ ವೆಂಕಟಪತಿ (57) ಕೊಲೆಯಾದ ಉದ್ಯಮಿ.

ಉಸಿರುಗಟ್ಟಿಸಿ ಹತ್ಯೆಗೈದಿರುವ ದುಷ್ಕರ್ಮಿಗಳು ಇವರ ಮೈಮೇಲಿದ್ದ ಚಿನ್ನಾಭರಣಗಳನ್ನು ದೋಚಿ ಪರಾರಿಯಾಗಿದ್ದಾರೆ. ಸಂಪಿಗೆಹಳ್ಳಿಯಲ್ಲಿ ಬಾಡಿಗೆ ಮನೆಗಳು ಹಾಗೂ ರಿಯಲ್‌ ಎಸ್ಟೇಟ್‌ ಉದ್ಯಮಿಯಾಗಿರುವ ವೆಂಕಟಪತಿ ಶುಕ್ರವಾರ ಮಧ್ಯಾಹ್ನ 3 ಗಂಟೆ ಸುಮಾರಿಗೆ ನಾಪತ್ತೆಯಾಗಿದ್ದು, ತಡರಾತ್ರಿ 2 ಗಂಟೆ ಸುಮಾರಿಗೆ ದೊಡ್ಡಬಳ್ಳಾಪುರ ಸಿಆರ್‌ಪಿಎಫ್ ರಸ್ತೆಯಿಂದ ಮಾವಳ್ಳಿಪುರ ಮಾರ್ಗದಲ್ಲಿ ಶವವಾಗಿ ಪತ್ತೆಯಾಗಿದ್ದರು.

ಸಾರ್ವಜನಿಕರಿಂದ ಮಾಹಿತಿ: ತಡರಾತ್ರಿಯಾದರೂ ವೆಂಕಟಪತಿ ಮನೆಗೆ ಬಾರದರಿಂದ ಆತಂಕಗೊಂಡ ಇವರ ಅಳಿಯ ಅವಿನಾಶ್‌ ಸಂಪಿಗೆಹಳ್ಳಿ ಪೊಲೀಸ್‌ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಿಸಿದ್ದರು. ಈ ಸಂಬಂಧ ಹತ್ತಿರದ ಠಾಣೆಗಳಿಗೆ ವೆಂಕಟಪತಿ ನಾಪತ್ತೆ ಬಗ್ಗೆ ಮಾಹಿತಿ ನೀಡಲಾಗಿತ್ತು. ಮತ್ತೂಂದೆಡೆ ಯಲಹಂಕ ಉಪನಗರ ಠಾಣೆಯ ಹೊಯ್ಸಳ ಸಿಬ್ಬಂದಿ ರಾತ್ರಿ ಗಸ್ತು ತಿರುಗುತ್ತಿದ್ದರು.

ಇದೇ ವೇಳೆ ಸಾರ್ವಜನಿಕರೊಬ್ಬರು ಪೊಲೀಸ್‌ ಸಹಾಯವಾಣಿಗೆ ಕರೆ ಮಾಡಿ ಸಿಆರ್‌ಪಿಎಫ್ ರಸ್ತೆ ಬದಿ ಅಪರಿಚಿತ ಶವ ಪತ್ತೆಯಾಗಿರುವ ಕುರಿತು ಮಾಹಿತಿ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಧಾವಿಸಿದ ಯಲಹಂಕ ಉಪನಗರ ಪೊಲೀಸರು ಪರಿಶೀಲಿಸಿದಾಗ ವೆಂಕಟಪತಿ ಎಂಬುದು ಗೊತ್ತಾಗಿದೆ.

ಮೃತರ ಮೈಮೇಲೆ ಯಾವುದೇ ಹಲ್ಲೆ ಅಥವಾ ಇತರೆ ಯಾವುದೇ ಗಾಯದ ಗುರುತುಗಳು ಪತ್ತೆಯಾಗಿಲ್ಲ. ಹೀಗಾಗಿ ಬೇರೆಡೆ ಉಸಿರುಗಟ್ಟಿಸಿ ಕೊಲೆ ಮಾಡಿ ಬಳಿಕ ಶವವನ್ನು ಸಿಆರ್‌ಪಿಎಫ್ ರಸ್ತೆ ಬದಿ ತಂದು ಬಿಸಾಡಿರುವ ಸಾಧ್ಯತೆಗಳಿವೆ. ಕೃತ್ಯದಲ್ಲಿ ಮೃತರ ಪರಿಚಿತರು ಅಥವಾ ಸ್ನೇಹಿತರು ಭಾಗಿಯಾಗಿರುವ ಶಂಕೆಯಿದೆ ಎಂದು ಪೊಲೀಸರು ಹೇಳಿದರು.

ಮನೆ ಬಳಿಯೇ ಕಾರು ಪತ್ತೆ: ಶುಕ್ರವಾರ ಮಧ್ಯಾಹ್ನ ವೆಂಕಟಪತಿ ಕೊಂಡೊಯ್ದಿದ್ದ ಕಾರು ಮನೆಯಿಂದ ಕೇವಲ 2 ಕಿ.ಮೀಟರ್‌ ದೂರದಲ್ಲೇ ಪತ್ತೆಯಾಗಿದೆ. ಹೀಗಾಗಿ ಪ್ರಕರಣದಲ್ಲಿ ಹಲವು ಅನುಮಾನಗಳು ವ್ಯಕ್ತವಾಗಿದ್ದು, ಪರಿಚಯಸ್ಥರೇ ಕೃತ್ಯವೆಸಗಿರುವ ಸಾಧ್ಯತೆಯಿದೆ ಎಂದು ಪೊಲೀಸರು ಹೇಳಿದರು.

ಚಿನ್ನದ ಮೇಲೆ ವ್ಯಾಮೋಹ: ವೆಂಕಟಪತಿ ಅವರಿಗೆ ಚಿನ್ನಾಭರಣಗಳ ಮೇಲೆ ಅತಿಯಾದ ವ್ಯಾಮೋಹ ಇದ್ದರಿಂದ ಯಾವಾಗಲೂ ಆಭರಣ ಧರಿಸಿಕೊಂಡೆ ಓಡಾಡುತ್ತಿದ್ದರು. ಶುಕ್ರವಾರ ಮಧ್ಯಾಹ್ನ ಕೂಡ ತಮ್ಮ ಐಷಾರಾಮಿ ಕಾರಿನಲ್ಲಿ ಮನೆಯಿಂದ ಹೊರಡುವಾಗಲೂ 8 ಬೆರಳುಗಳಿಗೆ ಉಂಗುರ, ಕೊರಳಿಗೆ ಚಿನ್ನದ ಸರ, ಬ್ರಾಸ್‌ ಲೈಟ್‌ ಹಾಗೂ ದುಬಾರಿ ಮೌಲ್ಯದ ವಾಚ್‌ನ್ನು ಹಾಕಿಕೊಂಡೆ ಹೋಗಿದ್ದರು ಎಂದು ಅಳಿಯ ಅವಿನಾಶ್‌ ದೂರಿನಲ್ಲಿ ತಿಳಿಸಿದ್ದಾರೆ ಎಂದು ಪೊಲೀಸರು ಹೇಳಿದರು.