ರೌಡಿ ಶೀಟರ್‌ ಮೇಲಿನ ದಾಳಿಗೆ ಆತನ ಸಹಚರ ಗಿರಿಧರ್‌ ಬಲಿ

Team Udayavani, Jan 13, 2017, 11:16 AM IST

ಮಹದೇವಪುರ: ರೌಡಿ ಶೀಟರ್‌ ಮೇಲೆ ಮಾರಣಾಂತಿಕ ಹಲ್ಲೆ ಮಾಡಿ, ಆತನ ಸಹಚರನನ್ನು ಕೊಚ್ಚಿ ಕೊಲೆಗೈದಿರುವಘಟನೆ ವೈಟ್‌ಫೀಲ್ಡ್‌ ಪೊಲೀಸ್‌ ಠಾಣೆ ವ್ಯಾಪ್ತಿಯ ವರ್ತೂರು ಕೋಡಿ ಬಳಿ ನಡೆದಿದೆ. ಕಾಡು ಬೀಸನಹಳ್ಳಿ ನಿವಾಸಿ ಗಿರಿಧರ್‌ ಸಾವಿಗೀ ಡಾಗಿದ್ದು ಸೋಮು ಹಲ್ಲೆಗೊಳಗಾದ ವ್ಯಕ್ತಿ. ಸೋಮು ಈ ಹಿಂದೆ ಡಬ್ಬಲ್‌ ಮರ್ಡರ್‌ ಕೇಸ್‌ನಲ್ಲಿ ಪ್ರಮುಖ ಆರೋಪಿಯಾಗಿದ್ದು ಎಚ್‌ಎಎಲ್‌ ಪೊಲೀಸ್‌ ಠಾಣೆಯಲ್ಲಿ ರೌಡಿ ಶೀಟರ್‌ ಆಗಿದ್ದಾನೆ. ಇತ್ತೀಚೆಗೆ ತನ್ನ ಎಲ್ಲಾ ಕೃತ್ಯಗಳನ್ನು ಬಿಟ್ಟು ಕಾಂಗ್ರೆಸ್‌ ಪಕ್ಷದಲ್ಲಿ ಗುರುತಿಸಿಕೊಂಡಿದ್ದ.

ಗುರುವಾರ ಮಧ್ಯಾಹ್ನ ಸಹ ಕಾಂಗ್ರೆಸ್‌ ಪಕ್ಷದ ವತಿಯಿಂದ ಆಯೋಜಿಸಿದ್ದ ಸ್ವಾಮಿ ವಿವೇಕಾನಂದ ಜಯಂತಿ ಮತ್ತು ಕೆಪಿಸಿಸಿ ಕಾರ್ಯದರ್ಶಿ ಎ.ಸಿ. ಶ್ರೀನಿವಾಸ್‌ ಹುಟ್ಟುಹಬ್ಬ ಕಾರ್ಯಕ್ರಮದಲ್ಲಿ ಭಾಗವಹಿಸಿ ತನ್ನ ಸಹಚರರಾದ ಗಿರಿಧರ್‌, ಗಣೇಶ್‌, ಇನ್ನೊಬ್ಬನ ಜೊತೆ ಕಾರಿನಲ್ಲಿ ಹಿಂತಿರುಗಿ ಬರುವಾಗ ಹಿಂಬಾಲಿಸಿಕೊಂಡು ಬಂದ ಮತ್ತೂಂದು ರೌಡಿಗಳ ಗುಂಪು ಈತನ ಕಾರಿನ ಮೇಲೆ ನಡು ರಸ್ತೆಯಲ್ಲೇ ದಾಳಿ ನಡೆಸಿದೆ.

ಈ ವೇಳೇ ಬೇಕರಿ ಬಳಿ ಕಾರು ನಿಲ್ಲಿಸಿ ಸೋಮು ಹಾಗೂ ಆತನ ಇಬ್ಬರು ಸಹಚರರು ಪರಾರಿ ಆಗಿದ್ದು ತೀವ್ರವಾಗಿ ಗಾಯಗೊಂಡಿದ್ದ ಗಿರಿಧರ್‌ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾನೆ. ಮಾರತ್ತಹಳ್ಳಿ ಸಮೀಪದ ಮುನ್ನೇಕೊಳಲ ಗ್ರಾಮದ ರೋಹಿತ್‌ಗೌಡ ಎಂಬ ರೌಡಿಯ ಗುಂಪು ಹಳೆ ದ್ವೇಷದ ಹಿನ್ನೆಲೆಯಲ್ಲಿ ಸಂಚು ರೂಪಿಸಿ ಸೋಮನ ಮೇಲೆ ದಾಳಿ ನಡೆಸಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ವಿಷಯ ತಿಳಿದು ಸ್ಥಳಕ್ಕೆ ಭೇಟಿ ನೀಡಿದ ವೈಟ್‌ಫೀಲ್ಡ್‌ ಪೊಲೀಸರು ಸ್ಥಳ ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದು ಅರೋಪಿಗಳಿಗಾಗಿ ಬಲೆ ಬೀಸಿದ್ದಾರೆ.