ಸಂತ ಮೇರಿಯಮ್ಮನ ಅದ್ಧೂರಿ ರಥೋತ್ಸವ

Team Udayavani, Sep 9, 2017, 11:28 AM IST

ಬೆಂಗಳೂರು: ಶಿವಾಜಿನಗರದಲ್ಲಿರುವ ಸೇಂಟ್‌ ಬೆಸಿಲಿಕಾ ಚರ್ಚ್‌ನಲ್ಲಿ ಹಲವು ದಿನಗಳಿಂದ ನಡೆದಿದ್ದ ಸಂತ ಮೇರಿ ಉತ್ಸವವು ಶುಕ್ರವಾರ ಅದ್ಧೂರಿ ರಥೋತ್ಸವದೊಂದಿಗೆ ತೆರೆ ಕಂಡಿತು. ಸಾವಿರಾರು ಭಕ್ತರು ರಥೋತ್ಸವದಲ್ಲಿ ಪಾಲ್ಗೊಂಡು ಸಂಭ್ರಮಿಸಿದರು.

ಉತ್ಸವದ ಹಿನ್ನೆಲೆಯಲ್ಲಿ ಶುಕ್ರವಾರ ಬೆಳಗ್ಗೆಯಿಂದಲೇ ವಿಶೇಷ ಪ್ರಾರ್ಥನೆ ನಡೆದಿತ್ತು. ಕನಕಾಂಬರ ಬಣ್ಣದ ಉಡುಪು ಧರಿಸಿದ್ದ ಭಕ್ತರು ಸಾಲಿನಲ್ಲಿ ನಿಂತು ಮೇರಿಯಮ್ಮನ ದರ್ಶನ ಪಡೆದರು. ಪರಸ್ಪರರಿಗೆ ಸಿಹಿ, ಇತರೆ ತಿನಿಸು ನೀಡಿ ಶುಭ ಕೋರಿದರು.

ಶಿವಾಜಿನಗರ, ಭಾರತಿನಗರ, ಫ್ರೆಜರ್‌ಟೌನ್‌, ಕಾಕ್ಸ್‌ಟೌನ್‌, ಟ್ಯಾನರಿ ರಸ್ತೆ, ಕಾಡುಗೊಂಡನಹಳ್ಳಿ, ಕಲ್ಯಾಣನಗರ ಸುತ್ತಮುತ್ತಲಿನ ಪ್ರದೇಶದ ಜನ ಭಾರಿ ಸಂಖ್ಯೆಯಲ್ಲಿ ಸೇರಿದ್ದರು. ಕ್ರೈಸ್ತರು ಮಾತ್ರವಲ್ಲದೆ ನಾನಾ ಧರ್ಮೀಯರು ಉತ್ಸವದಲ್ಲಿ ಪಾಲ್ಗೊಳ್ಳುವ ಮೂಲಕ ಸೌಹಾರ್ದತೆ, ಭ್ರಾತೃತ್ವ ಸಂದೇಶ ಸಾರಲಾಯಿತು.

ಸಂಜೆ ನಡೆದ ಅದ್ಧೂರಿ ರಥೋತ್ಸವಕ್ಕೆ ಭಾರಿ ಸಂಖ್ಯೆಯಲ್ಲಿ ಭಕ್ತರು ಸೇರಿದ್ದರು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ರಥೋತ್ಸವಕ್ಕೆ ಚಾಲನೆ ನೀಡಿ ಶುಭಾಷಯ ಕೋರಿದರು. ಸಚಿವ ಕೆ.ಜೆ.ಜಾರ್ಜ್‌ ಸೇರಿದಂತೆ ಹಲವು ಗಣ್ಯರು ಪಾಲ್ಗೊಂಡಿದ್ದರು.