ಮೆಟ್ರೋ ಪ್ರಯಾಣಿಕರೊಂದಿಗೆ ಸೆಲ್ಫಿ

Team Udayavani, Apr 9, 2018, 12:07 PM IST

ಬೆಂಗಳೂರು: ಸಾಮಾನ್ಯ ಪ್ರಯಾಣಿಕರೊಂದಿಗೆ ನಮ್ಮ ಮೆಟ್ರೋ ಪ್ರಯಾಣ, ಸಾರ್ವಜನಿಕರೊಂದಿಗೆ ಸೆಲ್ಫಿ, ಪುಸ್ತಕಗಳ ಶಾಪಿಂಗ್‌, ಮಗುವಿನೊಂದಿಗೆ ಫೋಟೋಗೆ ಫೋಸ್‌… ನಗರದಲ್ಲಿ ಆಯೋಜಿಸಿದ್ದ “ಜನಾಶೀರ್ವಾದ ಯಾತ್ರೆ’ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಲು ಆಗಮಿಸಿರುವ ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ, ನಗರದಲ್ಲಿ ಭಾನುವಾರ ಕಾಣಿಸಿಕೊಂಡಿದ್ದು ಹೀಗೆ. 

ವಿಧಾನಸೌಧದ ಗಾಂಧಿ ಪ್ರತಿಮೆ ಬಳಿಯ ಮೆಟ್ರೋ ನಿಲ್ದಾಣದಿಂದ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಕೆಪಿಸಿಸಿ ಅಧ್ಯಕ್ಷ ಡಾ.ಜಿ.ಪರಮೇಶ್ವರ್‌ ಹಾಗೂ ರಾಜ್ಯ ಉಸ್ತುವಾರಿ ವೇಣುಗೋಪಾಲ್‌ ಸೇರಿ ರಾಜ್ಯದ ನಾಯಕರೊಂದಿಗೆ ನಮ್ಮ ಮೆಟ್ರೋ ರೈಲಿನಲ್ಲಿ ಪ್ರಯಾಣಿಸಿದ ರಾಹುಲ್‌ಗಾಂಧಿ, ಮೊದಲಿಗೆ ಮೆಟ್ರೋ ಟಿಕೆಟ್‌ ಕೌಂಟರ್‌ ಬಳಿ ಪಕ್ಷ ನಾಯಕರೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಂಡರು. ಈ ವೇಳೆ ಮುಖ್ಯಮಂತ್ರಿಗಳೇ ಎಲ್ಲರಿಗೂ ಟಿಕೆಟ್‌ ಖರೀದಿಸಿದ್ದು ವಿಶೇಷವಾಗಿತ್ತು.

ಮೆಟ್ರೋದಲ್ಲಿ ಪ್ರಯಾಣಿಸುವ ವೇಳೆ ಸಾರ್ವಜನಿಕರೊಂದಿಗೆ ಮಾತುಕತೆ ನಡೆಸಿದರು. ರಾಹುಲ್‌ ರೈಲಿನಲ್ಲಿರುವ ವಿಷಯ ತಿಳಿಯುತ್ತಿದ್ದಂತೆ ಸಂತಸಗೊಂಡ ಪ್ರಯಾಣಿಕರು ರಾಹುಲ್‌ ಬಳಿ ಬಂದು ಸೆಲ್ಫಿ ಕ್ಲಿಕ್ಕಿಸಿಕೊಂಡರು. ಮಹಾತ್ಮಗಾಂಧಿ ರಸ್ತೆಗೆ ಬಂದಿಳಿದ ಎಐಸಿಸಿ ಅಧ್ಯಕ್ಷ, ಚರ್ಚ್‌ಸ್ಟ್ರೀಟ್‌ನಲ್ಲಿರುವ ಬುಕ್‌ವರ್ಮ್ ಪುಸ್ತಕ ಮಳಿಗೆಯಲ್ಲಿ ಸುಮಾರು 10 ನಿಮಿಷ ಸುತ್ತಾಡಿದರು.

ಈ ವೇಳೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು, “ಎ ಹಿಸ್ಟರಿ ಆಫ್ ಗಾಡ್‌’, “ದ ಗೋಟ್‌ ಥೀಫ್, “ಇಕಿಗೈ’, “ಥಿಚ್‌ ನಾತ್‌ ಹನ್‌Ø’ ಸೇರಿ ಒಟ್ಟು ಐದು ಪುಸ್ತಕಗಳನ್ನು ಖರೀದಿಸಿ, ರಾಹುಲ್‌ ಗಾಂಧಿ ಅವರಿಗೆ ಉಡುಗೊರೆಯಾಗಿ ನೀಡಿದರು.

ರಾಹುಲ್‌ ಗಾಂಧಿಯವರನ್ನು ನೋಡಲು ನೂರಾರು ಜನರು ಮಳಿಗೆಯ ಮುಂಭಾಗದಲ್ಲಿ ಜಮಾಯಿಸಿದ್ದರು. ಮಳಿಗೆಯಿಂದ ಹೊರ ಬಂದ ರಾಹುಲ್‌ ಅಲ್ಲಿಯೇ ನಿಂತಿದ್ದ ಪುಟ್ಟ ಬಾಲಕನನ್ನು ಎತ್ತಿಕೊಂಡು ತಮ್ಮ ಕಾರಿನ ಮುಂಭಾಗದಲ್ಲಿ ಕೂರಿಸಿಕೊಂಡು ಫೋಟೋಗೆ ಪೋಸು ನೀಡಿದರು. ಇದೇ ವೇಳೆ ಹಲವು ರಾಹುಲ್‌ ಅವರೊಂದಿಗೆ ಸೆಲ್ಫಿ ತೆಗೆದುಕೊಂಡರು.

ರಾಹುಲ್‌ ಗಮನ ಸೆಳೆದದ್ದು ಹೀಗೆ…
-ವೇದಿಕೆ ಏರದೆ ಪೌರ ಕಾರ್ಮಿಕರ ಎದುರೇ ಕುಳಿತು ಸಂವಾದ
-ಪೌರಕಾರ್ಮಿಕ ಮಹಿಳೆಯರ ಜತೆ ಫೋಟೋ ಸೆಷನ್‌
-ಮೆಟ್ರೋ ನಿಲ್ದಾಣದಲ್ಲಿ ಸಾರ್ವಜನಿಕರೊಂದಿಗೆ ಸೆಲ್ಫಿ ಸಮಯ
-ಮೆಟ್ರೋ ರೈಲು ಪ್ರಯಾಣದ ವೇಳೆ ಪ್ರಯಾಣಿಕರೊಂದಿಗೆ ಮಾತುಕತೆ
-ಚರ್ಚ್‌ ಸ್ಟ್ರೀಟ್‌ನ ಪುಸ್ತಕ ಮಳಿಗೆಯಲ್ಲಿ ಸುತ್ತಾಟ, ಸಿಎಂರಿಂದ ಪುಸ್ತಕ ಉಡುಗೊರೆ
-ಬಾಲಕನ ಎತ್ತಿಕೊಂಡು ತಮ್ಮ ಕಾರಿನ ಎದುರು ಫೋಟೋಗೆ ಪೋಸ್‌