ಗಾಯಕಿ ಶ್ಯಾಮಲಾ ಜಾಗೀರ್‌ದಾರ್‌ ನಿಧನ

Team Udayavani, Dec 22, 2018, 12:17 PM IST

ಬೆಂಗಳೂರು: ವಯೋಸಹಜ ಸಮಸ್ಯೆಯಿಂದ ಬಳಲುತ್ತಿದ್ದ ಖ್ಯಾತ ಸುಗಮ ಸಂಗೀತ ಗಾಯಕಿ ಶ್ಯಾಮಲಾ ಜಾಗೀರ್‌ದಾರ್‌ (78) ಶುಕ್ರವಾರ ಮಧ್ಯಾಹ್ನ ನಗರದಲ್ಲಿ ನಿಧನರಾದರು. ಗುರುವಾರ ನಗರದ ಆಸ್ಪತ್ರೆಗೆ ದಾಖಲಾಗಿದ್ದ ಅವರು, ಶುಕ್ರವಾರ ಮಧ್ಯಾಹ್ನ 2.30ಕ್ಕೆ ಇಹಲೋಕ ತ್ಯಜಿಸಿದರು. ಮೃತರಿಗೆ ಒಬ್ಬ ಪುತ್ರ ಹಾಗೂ ಅಪಾರ ಶಿಷ್ಯವೃಂದವಿದೆ.

ಮೃತರ ಅಂತ್ಯಕ್ರಿಯೆ ಶನಿವಾರ ಬೆಳಗ್ಗೆ 10.30ಕ್ಕೆ ಟಿ.ಆರ್‌.ಮಿಲ್‌ ಬಳಿಯ ಸ್ಮಶಾನದಲ್ಲಿ ನೆರವೇರಲಿದೆ ಎಂದು ಕುಟುಂಬದ ಮೂಲಗಳು ತಿಳಿಸಿವೆ. ಸುಗಮ ಸಂಗೀತ ಲೋಕದಲ್ಲಿ ಛಾಪು ಮೂಡಿಸಿದ್ದ ಶ್ಯಾಮಲಾ ಜಾಗೀರ್‌ದಾರ್‌ “ರಾಗ ರಂಜಿನಿ’, “ಸ್ವೀಟ್‌ ವಾಯ್ಸ ಆಫ್ ಮೈಸೂರು’ ಸೇರಿದಂತೆ ಹಲವು ಪ್ರಶಸ್ತಿಗೆ ಭಾಜರಾಗಿದ್ದರು.