ಭಲೇ ಚಾಲಾಕಿ : ಕದ್ದು ಮನೆಯೊಡತಿಗೆ ಸಬೂಬು ಹೇಳಿ ಹೋದ!

Team Udayavani, Jan 1, 2017, 12:53 PM IST

 ಬೆಂಗಳೂರು: ಬೀಗ ಹಾಕಿದ್ದ ಮನೆ ಕಳವು ಮಾಡಿ ಹೋಗುತ್ತಿದ್ದ ಕಳ್ಳ ಮನೆಯ ಒಡತಿಗೆ ಸಬೂಬು ಹೇಳಿ ಪರಾರಿಯಾಗಿರುವ ಘಟನೆ ಉತ್ತರಹಳ್ಳಿ ಮುಖ್ಯರಸ್ತೆ ಪೂರ್ಣ ಪ್ರಜ್ಞಾ ಲೇಔಟ್‌ನಲ್ಲಿ ಶುಕ್ರವಾರ ನಡೆದಿದೆ. ಶುಕ್ರವಾರ ಸುಷ್ಮಾ ಎಂಬುವರ ಮನೆಯಲ್ಲಿ ನಡೆದಿದೆ.

ಬೆಳಗ್ಗೆ 9 ಗಂಟೆಗೆ ಸುಷ್ಮಾ ಮನೆಗೆ ಬೀಗ ಹಾಕಿಕೊಂಡು ದೇವಸ್ಥಾನಕ್ಕೆ ತೆರಳಿದ್ದರು. ಅಡುಗೆ ಮನೆ ವೆಂಟಿಲೇಟರ್‌ ಮುರಿದು ಕಳ್ಳ ಮನೆ ಪ್ರವೇಶಿಸಿ ಬೀರುವಿನಲ್ಲಿದ್ದ ಚಿನ್ನಾಭರಣ ದೋಚಿದ್ದಾನೆ. ಅಷ್ಟರಲ್ಲಿ ದೇವಸ್ಥಾನದಿಂದ ಬಂದಿರುವ ಸುಷ್ಮಾ ಮನೆ ಬಾಗಿಲು ತೆಗೆದು ಒಳಗೆ ಪ್ರವೇಶಿಸುತ್ತಿದಂತೆ ಕಳ್ಳ ಎದುರಾಗಿದ್ದಾನೆ. ಹೆದರಿದ ಸುಷ್ಮಾ”ಯಾರು ನೀನು?’ ಎಂದು ಪ್ರಶ್ನಿಸಿದಾಗ ಕಳ್ಳ “ಮನೆಗೆಲಸ ಮಾಡುತ್ತಿದ್ದೇನೆ’ ಎಂದು ಹೇಳುತ್ತಾ ಮುಂಬಾಗಿಲಿನಿಂದ ಹೊರ ಹೋಗಿದ್ದಾನೆ. ಬೀಗ ಹಾಕಿದ್ದ ಮನೆಗೆ ಅಪರಿಚಿತ ವ್ಯಕ್ತಿ ಹೇಗೆ ಪ್ರವೇಶಿಸಿದ ಎಂದು ಗಾಬರಿಗೊಂಡು ಮಲಗುವ ಕೋಣೆಗೆ ಹೋಗಿ ಪರಿಶೀಲಿಸಿದಾಗ ಬೀರುವಿನ 20 ಗ್ರಾಂ ಚಿನ್ನಾಭರಣ ಕಳವಾಗಿರುವುದು ಬೆಳಕಿಗೆ ಬಂದಿದೆ. 

ಅಷ್ಟರಲ್ಲಿ ಖತರ್‌ನಾಕ್‌ ಕಳ್ಳ ಪರಾರಿಯಾಗಿದ್ದ. ಈ ಸಂಬಂಧ ಸುಷ್ಮಾ ಅವರು ದೂರು ದಾಖಲಿಸಿದ್ದು, ಬೆರಳಚ್ಚು ತಜ್ಞರು ಮತ್ತು ಶ್ವಾನದಳದ ಸಿಬ್ಬಂದಿ ಸ್ಥಳ ಪರಿಶೀಲನೆ ನಡೆಸಿದ್ದಾರೆ. ಹಳೇ ಆರೋಪಿಗಳ ಬಗ್ಗೆಯೂ ನಿಗಾವಹಿಸಿದ್ದು, ಕಳ್ಳನ ಪತ್ತೆಗೆ ಶೋಧ ಕಾರ್ಯ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.