ಗನ್‌ಮ್ಯಾನ್‌ ರಿವಾಲ್ವರ್‌ ಕದ್ದವರ ಸೆರೆ

Team Udayavani, Mar 24, 2017, 12:25 PM IST

ಬೆಂಗಳೂರು: ಇತ್ತೀಚೆಗೆ ದೇವನಹಳ್ಳಿ ಶಾಸಕ ಪಿಳ್ಳ ಮುನಿಸ್ವಾಮಪ್ಪ ಅವರ ಅಂಗರಕ್ಷಕ ನರಸಿಂಹಮೂರ್ತಿ ಎಂಬುವರ ಸರ್ವೀಸ್‌ ರಿವಾಲ್ವಾರ್‌ ಕಳವು ಮಾಡಿ ದುಷ್ಕರ್ಮಿಗಳಿಗೆ ಮಾರಾಟ ಮಾಡಲು ಯತ್ನಿಸಿದ್ದ ಮಂಗಳೂರು ಮೂಲದ ಇಬ್ಬರು ಕುಖ್ಯಾತ ದರೋಡೆಕೋರರನ್ನು ಬೆಂಗಳೂರು ಪೊಲೀಸರು ಬಂಧಿಸಿದ್ದಾರೆ.

ಮಂಗಳೂರಿನ ಸೂರತ್ಕಲ್‌ ನಿವಾಸಿ ಧನುಷ್‌(19), ವಿಜಯ್‌ ಅಲಿಯಾಸ್‌ ಆಂಜನೇಯ (21) ಬಂಧಿತರು. ಆರೋಪಿಗಳಿಂದ ಒಂದು ಪಿಸ್ತೂಲ್‌, 16 ಮೊಬೈಲ್‌ಗ‌ಳನ್ನು ವಶಪಡಿಸಿಕೊಳ್ಳಲಾಗಿದೆ. ಇಬ್ಬರ ವಿರುದ್ಧವೂ ಮಂಗಳೂರಿನ ವಿವಿಧ ಠಾಣೆಗಳಲ್ಲಿ ದರೋಡೆ ಪ್ರಕರಣಗಳಿವೆ ಎಂದು ನಗರ ಪೊಲೀಸ್‌ ಆಯುಕ್ತ ಪ್ರವೀಸ್‌ ಸೂದ್‌ ತಿಳಿಸಿದ್ದಾರೆ.

ಜಾಲಿರೈಡ್‌ಗೆ ಬಂದಿದ್ದರು: ಧನುಷ್‌ ಮತ್ತು ವಿಜಯ್‌ ಮಂಗಳೂರಿನಲ್ಲಿ ಬೈಕ್‌ ಕದ್ದು ಬೆಂಗಳೂರಿಗೆ ಬಂದಿದ್ದರು. ಮೋಜು ಮಾಡಲು ಎಂ.ಎಸ್‌.ಪಾಳ್ಯ ಬಳಿಯ ಲಾಡ್ಜ್ವೊಂದರಲ್ಲಿ ಉಳಿದುಕೊಂಡಿದ್ದರು. ಫೆ.24ರಂದು ರಾತ್ರಿ ವಸತಿಗೃಹದಿಂದ ಕೆಲ ದೂರದಲ್ಲಿ ಮದ್ಯ ಸೇವಿಸಲು ಹೋಗಿದ್ದ ಅರೋಪಿಗಳು ಲಾಡ್ಜ್ಗೆ ಹಿಂದಿರುಗುವಾಗ ರಸ್ತೆಯಲ್ಲಿ ಪ್ರಜ್ಞೆತಪ್ಪಿ ಬಿದಿದ್ದ ನರಸಿಂಹಮೂರ್ತಿ ಅವರನ್ನು ದರೋಡೆ ಮಾಡಿ ಪರಾರಿಯಾಗಿದ್ದರು.

ಪಿಸ್ತೂಲ್‌ ಮಾರಾಟಕ್ಕೆ ಯತ್ನ: ಮಂಗಳೂರಿಗೆ ಹೋದ ಧನುಷ್‌ ಮತ್ತು ವಿಜಯ್‌ ಅಲ್ಲಿನ ಕೆಲ ದರೋಡೆಕೋರರು ಹಾಗೂ ಸುಪಾರಿ ಹಂತಕರಿಗೆ ಪಿಸ್ತೂಲ್‌ ಮಾರಾಟಕ್ಕೆ ಯತ್ನಿಸಿದ್ದರು. ಆದರೆ, ಪಿಸ್ತೂಲ್‌ ಮೇಲೆ ಸಿಎಆರ್‌ ಹಾಗೂ ಪೊಲೀಸ್‌ ಇಲಾಖೆಯ ನಂಬರ್‌ ಇದ್ದರಿಂದ ಹೆದರಿ ಯಾರೂ ಖರೀದಿಸಿರಲಿಲ್ಲ.

ಹೀಗೆ ಪಿಸ್ತೂಲ್‌ ಮಾರಾಟದ ಬಗ್ಗೆ ಗುಪ್ತಚರ ಅಧಿಕಾರಿಗಳಿಂದ ಮಾಹಿತಿ ಬಂದಿತ್ತು. ಜತೆಗೆ ಘಟನಾ ಸ್ಥಳದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಆರೋಪಿಗಳು ಸುಳಿವು ಪತ್ತೆಯಾಗಿತ್ತು ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಶಾಸಕರ ಗನ್‌ಮ್ಯಾನ್‌ ರಸ್ತೆಯಲ್ಲಿ ಬಿದ್ದಿದ್ದು ಏಕೆ?
ಫೆ. 23ರಂದು ದೇವನಹಳ್ಳಿಗೆ ತೆರಳುತ್ತಿದ್ದ ಶಾಸಕ ಪಿಳ್ಳ ಮುನಿಸ್ವಾಮಪ್ಪ ತಮ್ಮ ಅಂಗರಕ್ಷಕ ನರಸಿಂಹಮೂರ್ತಿ ಅವರನ್ನು ಎಂ.ಎಸ್‌.ಪಾಳ್ಯ ಬಳಿ ಇಳಿಸಿ ಆಟೋದಲ್ಲಿ ಮನೆಗೆ ಹೋಗುವಂತೆ ತಿಳಿಸಿದ್ದರು. ನರಸಿಂಹಮೂರ್ತಿ ಕೆಲಸದ ಒತ್ತಡದಿಂದ ಬಳಲಿದ್ದರು. ಸಿನಿಮಾ ನೋಡಿಕೊಂಡು ಹೋಗೋಣವೆಂದು ಆಟೋ ಹಿಡಿದು ಚಿತ್ರಮಂದಿರದ ಕಡೆ ಹೊರಟಿದ್ದರು. ಅದರಂತೆ ಚಿತ್ರಮಂದಿರ ಬಳಿ ಇಳಿದ ನರಸಿಂಹಮೂರ್ತಿ ಅಲ್ಲಯೇ ಪ್ರಜ್ಞೆತಪ್ಪಿ ಬಿದಿದ್ದಾರೆ.

ಇದರಿಂದ ಗಾಬರಿಗೊಂಡ ಆಟೋ ಚಾಲಕ ಓಡಿ ಹೋಗಿದ್ದಾನೆ. ನರಸಿಂಹಮೂರ್ತಿ ಅವರನ್ನು ಯಾರೂ ಗಮನಿಸಿರಲಿಲ್ಲ. ಇದೇ ವೇಳೆ ಮದ್ಯದ ಅಮಲಿನಲ್ಲಿ ಬರುತ್ತಿದ್ದ ಆರೋಪಿಗಳು ನರಸಿಂಹಮೂರ್ತಿ ಅವನ್ನು ಕಂಡು, ಅವರ ಜೇಬುಗಳನ್ನು ಹುಡುಕಿದ್ದಾರೆ. ಆಗ ಸಿಕ್ಕ ಸರ್ವಿಸ್‌ ಪಿಸ್ತೂಲ್‌ ಮತ್ತು ನಗದು ದೋಚಿ ಪರರಿಯಾಗಿದ್ದರು ಎಂದು ಡಿಸಿಪಿ ಡಾ ಪಿ.ಎಸ್‌. ಹರ್ಷಾ ತಿಳಿಸಿದರು.