ಸಾಮಾಜಿಕ ಜಾಲತಾಣಗಳಲ್ಲಿ ಸುಧಾಮೂರ್ತಿ ಸಂಚಲನ

Team Udayavani, Nov 28, 2019, 3:05 AM IST

ಬೆಂಗಳೂರು: ಸೋನಿ ಟೀವಿಯಲ್ಲಿ ಪ್ರಸಾರವಾಗುತ್ತಿರುವ ಕೌನ್‌ ಬನೇಗಾ ಕರೋಡ್‌ಪತಿ-11ನೇ ಆವೃತ್ತಿಯ ಕಡೇ ಸಂಚಿಕೆ ನ.29ರಂದು ಪ್ರಸಾರವಾಗಲಿದ್ದು, ಇದರಲ್ಲಿ ಇನ್ಫೋಸಿಸ್‌ ಪ್ರತಿಷ್ಠಾನದ ಅಧ್ಯಕ್ಷೆ ಸುಧಾ ಮೂರ್ತಿ ಭಾಗವಹಿಸಿದ್ದಾರೆ.

ವಾಹಿನಿ ಈ ಕಾರ್ಯಕ್ರಮಕ್ಕೆ ಸಂಬಂಧಿಸಿದ 5 ನಿಮಿಷದ ಟೀಸರನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಬಿಡುಗಡೆ ಮಾಡಿದೆ. ಈ ಟೀಸರ್‌ ಈಗಾಗಲೇ ಜಾಲತಾಣಗಳಲ್ಲಿ ಸಂಚಲನ ಉಂಟುಮಾಡಿದೆ. ಕಾರ್ಯಕ್ರಮದ ನಿರೂಪಕ ನಟ ಅಮಿತಾಭ್‌ ಬಚ್ಚನ್‌ ಅವರು ಸುಧಾ ಮೂರ್ತಿ ಅವರನ್ನು ಲೇಖಕಿ, ಲೋಕೋಪಕಾರಿ, ಇನ್ಫೋಸಿಸ್‌ ಪ್ರತಿಷ್ಠಾನದ ಅಧ್ಯಕ್ಷೆ ಎಂದು ಪರಿಚಯಿಸುತ್ತಾರೆ. ಬಳಿಕ ಸುಧಾ ತಮ್ಮ ಕಾಲೇಜಿನ ಅನುಭವದ ಕುರಿತು ಮಾತನಾಡುತ್ತಾರೆ. ತಾವು 599 ಪುರುಷ ವಿದ್ಯಾರ್ಥಿಗಳಿದ್ದ ಕಾಲೇಜಿನಲ್ಲಿ ಏಕೈಕ ವಿದ್ಯಾರ್ಥಿನಿ ಎಂದು ಹೇಳಿಕೊಂಡಿದ್ದಾರೆ.

ಹುಬ್ಬಳ್ಳಿಯ ಇಂಜಿನಿಯರಿಂಗ್‌ ಕಾಲೇಜಿಗೆ ದಾಖಲಾದ ಆರಂಭದಲ್ಲಿ ಕಾಲೇಜಿನ ಪ್ರಾಂಶುಪಾಲರು ತಮಗೆ ಹುಡುಗರ ಜತೆ ಮಾತನಾಡದಂತೆ, ಕಾಲೇಜಿಗೆ ಸೀರೆ ಉಟ್ಟು ಬರುವಂತೆ ಮತ್ತು ಕ್ಯಾಂಟೀನ್‌ಗೆ ಹೋಗದಂತೆ ಷರತ್ತು ವಿಧಿಸಿದ್ದರು. 2ನೇ ವರ್ಷದಲ್ಲಿ ಇರುವಾಗ ನಾನು ಮೊದಲ ರ್‍ಯಾಂಕ್‌ ಪಡೆದಿರುವುದು ತಿಳಿದು ಹುಡುಗರೇ ನನ್ನನ್ನು ಮಾತನಾಡಿಸಲು ಬರುತ್ತಿದ್ದರು ಎಂದಿದ್ದಾರೆ. ಈ ವಿಡಿಯೋ ಸಾಕಷ್ಟು ಮೆಚ್ಚುಗೆಗೆ ಪಾತ್ರವಾಗಿದೆ.