ರಾಜ್ಯದಲ್ಲಿ ಮತ್ತೆ ದಲಿತ ಮುಖ್ಯಮಂತ್ರಿ ಚರ್ಚೆ

Team Udayavani, Mar 5, 2019, 12:30 AM IST

ಬೆಂಗಳೂರು: ರಾಜ್ಯ ರಾಜಕಾರಣದ 70 ವರ್ಷಗಳ ಇತಿಹಾಸದಲ್ಲಿ ಹಲವು ಬಾರಿ ದಲಿತರು ಮುಖ್ಯಮಂತ್ರಿ ಸ್ಥಾನವನ್ನು ಅಲಂಕರಿಸುವುದನ್ನು  ತಪ್ಪಿಸಲಾಗಿದೆ ಎಂದು ಹಲವು ಸಂದರ್ಭಗಳಲ್ಲಿ ಆರೋಪಿಸಲಾಗಿತ್ತು. ಉಪ- ಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ  ಕೂಡ ಕೆಲವು ದಿನಗಳ ಹಿಂದೆ ತಮಗೆ ಎರಡು ಬಾರಿ ಮುಖ್ಯಮಂತ್ರಿ ಹುದ್ದೆ ತಪ್ಪಿಸಲಾಗಿತ್ತು ಎಂದು ಹೇಳಿದ್ದು ಚರ್ಚೆಗೆ ಗ್ರಾಸವಾದ ಬೆನ್ನಲ್ಲೇ ಅದೇ  ವಿಚಾರ ಮತ್ತೆ ಮುನ್ನೆಲೆಗೆ ಬಂದಿದೆ.

ಛಲವಾದಿ ಮಹಾಸಭಾದ ರಾಜ್ಯ ಸಮಿತಿಯಿಂದ ಸೋಮವಾರ ಬೆಂಗಳೂರಿನಲ್ಲಿ ಆಯೋಜಿಸಲಾಗಿದ್ದ  ಕಾರ್ಯಕ್ರಮದಲ್ಲಿ ಮಾತನಾಡಿದ ಡಿಸಿಎಂ ಡಾ. ಜಿ. ಪರಮೇಶ್ವರ್‌, “ತನಗೆ ಎರಡು ಬಾರಿ ಮುಖ್ಯಮಂತ್ರಿ ಆಗುವ ಅವಕಾಶ ಕೈತಪ್ಪಿತು’ ಎಂಬ ಹೇಳಿಕೆಯನ್ನು ಪುನರುಚ್ಚರಿಸಿದರೆ, ಇದನ್ನು ಅನುಮೋದಿಸುವಂತೆ ಮಾತನಾಡಿದ ಮಾಜಿ ಸಚಿವ ಡಾ. ಎಚ್‌.ಸಿ. ಮಹದೇವಪ್ಪ, ಅರ್ಹತೆ ಮತ್ತು ಅವಕಾಶ ಇದ್ದಾಗಲೂ ನಮ್ಮ ರಾಜ್ಯದಲ್ಲಿ ದಲಿತರನ್ನು ಸಿಎಂ ಸ್ಥಾನದಿಂದ ವಂಚಿತರನ್ನಾಗಿ ಮಾಡಿರುವುದು ನಿಜ’ ಎಂದರು.

ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಡಿಸಿಎಂ ಡಾ. ಜಿ. ಪರಮೇಶ್ವರ್‌,  ಎಲ್ಲ ಸಾಮರ್ಥಯ ಇದ್ದರೂ ಬಿ. ಬಸವಲಿಂಗಪ್ಪ, ಕೆ.ಎಚ್‌. ರಂಗನಾಥ್‌ ಮುಖ್ಯಮಂತ್ರಿ ಹುದ್ದೆಯಿಂದ ವಂಚಿತರಾದರು. ನನ್ನ ಕಣ್ಣೆದುರೇ ಮಲ್ಲಿಕಾರ್ಜುನ ಖರ್ಗೆಯವರಿಗೆ 2 ಬಾರಿ ಸಿಎಂ ಆಗುವ ಅವಕಾಶ ಕೈ ತಪ್ಪಿತ್ತು. ನನಗೂ 2-3 ಬಾರಿ ಅವಕಾಶ ತಪ್ಪಿ ಹೋಯಿತು ಎಂದು ನಾನು ಹೇಳಿದ್ದು ನಿಜ. ಆ ಮಾತಿಗೆ ಈಗಲೂ ಬದ್ಧನಾಗಿದ್ದೇನೆ ಎಂದರು.

ಹೇಳಿಕೆಗೆ ಬದ್ಧ: ಹಿಂದಿನ  ಹೇಳಿಕೆಗೆ “ನೀವು ಆ ರೀತಿ ಹೇಳಬಾರದಿತ್ತು ಎಂದು ನಮ್ಮವರೇ ಹೇಳಿದರು. ಅದರ ವಿರುದ್ಧ ದೆಹಲಿ ವರೆಗೆ ದೂರು ಹೋಯಿತು. ಅಲ್ಲಿ ಪ್ರಶ್ನೆ ಮಾಡಿದಾಗ ಆ ರೀತಿ ಹೇಳಿದ್ದು ನಿಜ. ಮುಂದೆ ಸಂದರ್ಭ ಬಂದರೆ ಅದನ್ನು ಪುನರುತ್ಛರಿಸಲು ಸಿದ್ಧ ಎಂದು  ತಿಳಿಸಿದೆ. ನನ್ನ ಮಾತು ಮತ್ತು ಯೋಚನೆ ಮೃದು ಆಗುವುದಿಲ್ಲ.  ಅಂಬೇಡ್ಕರ್‌ ವಿಚಾರಗಳೊಂದಿಗೆ ರಾಜಿ ಮಾಡಿಕೊಳ್ಳುವ ಪ್ರಶ್ನೆಯೇ ಇಲ್ಲ ಎಂದರು ಡಿಸಿಎಂ.

ದಲಿತರನ್ನು ಸಿಎಂ ಮಾಡಿಲ್ಲ: ಇದಕ್ಕೂ ಮೊದಲು ಮಾತನಾಡಿದ್ದ  ಮಾಜಿ ಸಚಿವ ಡಾ. ಎಚ್‌.ಸಿ. ಮಹದೇವಪ್ಪ, ದಲಿತರು ಸಿಎಂ ಆಗಬೇಕು ಎಂದು ಹೇಳಿದ್ದೆ ಎಂದು ಹಲವರು ಹೇಳುತ್ತಿದ್ದಾರೆ ಅದೆಲ್ಲ ಕಟ್ಟು ಕತೆಗಳು ಎಂದಿದ್ದಾರೆ. 2004ರಲ್ಲಿ ಖರ್ಗೆ ಪರ ಯಾರೂ ಮಾತನಾಡಲಿಲ್ಲ. 2008ರಲ್ಲಿ ನಮ್ಮನ್ನು ಯಾರೂ ಕೇಳಿಲ್ಲ. 2013ರಲ್ಲಿ ಸಿದ್ದರಾಮಯ್ಯ ಹಾಗೂ ಪರಮೇಶ್ವರ್‌ ಅವರ ನಡುವೆ ಅಧಿಕಾರ ಹಂಚಿಕೆ ಆಗುವಂತೆ ಪ್ರಯತ್ನ ಮಾಡಿದ್ದೆ. ಆದರೆ ಸನ್ನಿವೇಶ ಹಾಗೂ ಫ‌ಲಿತಾಂಶ ಬೇರೆ ಆಯಿತು. 70 ವರ್ಷಗಳಲ್ಲಿ ಈಗ ದಲಿತರೊಬ್ಬರಿಗೆ ಡಿಸಿಎಂ ಸ್ಥಾನ ಸಿಕ್ಕಿದೆ ಎಂದರು.

“ಕೈ’ಗೆ ಪರಂ ಸಿಎಂ
ಕಾರ್ಯಕ್ರಮದಲ್ಲಿ ಮಾತನಾಡಿದ ಛಲವಾದಿ ಮಹಾಸಭಾದ ಮುಖಂಡ ಎಚ್‌.ಕೆ. ಬಸವರಾಜ್‌, ರಾಜ್ಯದ 70 ವರ್ಷಗಳ ರಾಜಕೀಯ ಇತಿಹಾಸದಲ್ಲಿ ದಲಿತ (ಛಲವಾದಿ) ಸಮುದಾಯಕ್ಕೆ ಸೇರಿದವರೊಬ್ಬರು ಉಪ ಮುಖ್ಯಮಂತ್ರಿ ಆಗಿದ್ದಾರೆ. ಪರಮೇಶ್ವರ್‌ ಅವರು ಮೈತ್ರಿ ಸರ್ಕಾರದಲ್ಲಿ ಡಿಸಿಎಂ ಆಗಿರಬಹುದು. ಆದರೆ, ಕಾಂಗ್ರೆಸ್‌ ಪಕ್ಷದ ವಿಚಾರಕ್ಕೆ ಬಂದಾಗ ಅವರೇ ಸಿಎಂ. ಕುಮಾರಸ್ವಾಮಿ ಸಿಎಂ ಆಗಬೇಕಾದಾಗ ಇಡೀ ಒಕ್ಕಲಿಗ ಸಮುದಾಯ ಅವರ ಬೆಂಬಲಕ್ಕೆ ನಿಂತಿತ್ತು. ಯಡಿಯೂರಪ್ಪ ಹಾಗೂ ಸಿದ್ದರಾಮಯ್ಯ ಬೆಂಬಲಕ್ಕೆ ಅವರವರ ಸಮುದಾಯ ನಿಂತಿತ್ತು. ಅದೇ ರೀತಿ ಛಲವಾದಿ ಸೇರಿದಂತೆ ಇಡೀ ದಲಿತ ಸಮುದಾಯ ಪರಮೇಶ್ವರ್‌ ಬೆಂಬಲಕ್ಕೆ ನಿಂತು ಸಿಎಂ ಮಾಡಬೇಕು. ಇದೆ ವೇಳೆ ಮಲ್ಲಿಕಾರ್ಜುನ ಖರ್ಗೆಯವರನ್ನು ಪ್ರಧಾನಿ ಮಾಡುವ ನಿಟ್ಟಿನಲ್ಲಿ ಛಲವಾದಿ ಸಮುದಾಯ ಸಂಘಟಿತವಾಗಬೇಕು ಎಂದರು.