ತಾಯಿ ಕೊಂದ ಟೆಕ್ಕಿ, ಪ್ರಿಯಕರ ಬಂಧನ

Team Udayavani, Feb 6, 2020, 3:08 AM IST

ಬೆಂಗಳೂರು: ತಾಯಿಯನ್ನು ಬರ್ಬರವಾಗಿ ಕೊಂದು ಪರಾರಿಯಾಗಿದ್ದ ಪುತ್ರಿ ಹಾಗೂ ಆಕೆಯ ಪ್ರಿಯಕರನನ್ನು ಕೆ.ಆರ್‌.ಪುರ ಪೊಲೀಸರು ಅಂಡಮಾನ್‌ ವಿಮಾನ ನಿಲ್ದಾಣದಲ್ಲಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದು, ಆರೋಪಿಗಳನ್ನು ಗುರುವಾರ ನಗರಕ್ಕೆ ಕರೆತರಲಿದ್ದಾರೆ.

ಕೆ.ಆರ್‌.ಪುರದ ಅಕ್ಷಯ ನಗರದ ನಿವಾಸಿ ಅಮೃತಾ ಚಂದ್ರಶೇಖರ್‌(32) ಮತ್ತು ಆಕೆಯ ಪ್ರಿಯಕರ ಶ್ರೀಧರ್‌ ರಾವ್‌(35) ಬಂಧಿತರು. ಆರೋಪಿಗಳನ್ನು ಬುಧವಾರ ಬೆಳಗ್ಗೆ ಅಂಡಮಾನ್‌ ವಿಮಾನ ನಿಲ್ದಾಣ ಸಮೀಪದಲ್ಲಿ ಬಂಧಿಸಲಾಗಿದೆ. ಕೃತ್ಯಕ್ಕೆ ಪ್ರೀತಿಯೇ ಕಾರಣ ಎಂಬುದು ಗೊತ್ತಾಗಿದ್ದು, ಆರೋಪಿಗಳನ್ನು ವಿಚಾರಣೆ ನಡೆಸಿದಾಗ ಇನ್ನಷ್ಟು ಮಾಹಿತಿ ತಿಳಿದು ಬರಲಿದೆ.

ಅಮೃತಾ ಫೆ.2ರ ಮುಂಜಾನೆ ತಾಯಿ ನಿರ್ಮಲಾರನ್ನು ಬರ್ಬರವಾಗಿ ಕೊಂದು, ಬಳಿಕ ಕೋಣೆಯಲ್ಲಿ ಮಲಗಿದ್ದ ಸಹೋದರ ಹರೀಶ್‌ರನ್ನು ಹತ್ಯೆಗೆ ಯತ್ನಿಸಿ ಶ್ರೀಧರ್‌ರಾವ್‌ ಜತೆ ಪರಾರಿಯಾಗಿದ್ದಳು ಎಂದು ಪೊಲೀಸರು ಹೇಳಿದರು. ದಾವಣಗೆರೆ ಮೂಲದ ನಿರ್ಮಲಾ ಕೆಲ ವರ್ಷಗಳಿಂದ ಕೆ.ಆರ್‌.ಪುರದ ಅಕ್ಷಯನಗರದಲ್ಲಿ ಪುತ್ರಿ ಅಮೃತಾ ಮತ್ತು ಪುತ್ರ ಹರೀಶ್‌ ಜತೆ ವಾಸವಾಗಿದ್ದರು.

ಅಮೃತಾ ಮಾರತ್ತಹಳ್ಳಿಯ ಕಂಪನಿಯೊಂದರಲ್ಲಿ ಸಾಫ್ಟ್ವೇರ್‌ ಎಂಜಿನಿಯರ್‌ ಆಗಿದ್ದರು. ಹರೀಶ್‌ ಕೂಡ ಸಾಫ್ಟ್ವೇರ್‌ ಎಂಜಿನಿಯರ್‌ ಆಗಿದ್ದಾರೆ. ಆದರೆ, ಹತ್ತು ತಿಂಗಳ ಹಿಂದೆ ಅಮೃತಾ ಬೇರೆ ಕಂಪನಿಯಲ್ಲಿ ಕೆಲಸಕ್ಕೆ ಸೇರಿದ್ದು, ಮನೆಯಲ್ಲೇ ಕುಳಿತು ಲ್ಯಾಪ್‌ಟಾಪ್‌ನಲ್ಲಿ ಕೆಲಸ ಮಾಡುವುದಾಗಿ ತಾಯಿ ಬಳಿ ಹೇಳಿಕೊಂಡಿದ್ದಳು. ಆದರೆ, ಯಾವುದೇ ಕೆಲಸ ಮಾಡದೆ ಸ್ನೇಹಿತರ ಜತೆ ಚಾಟಿಂಗ್‌ ಮಾಡಿಕೊಂಡಿದ್ದಳು.

ಮಾಸಿಕ ಇಂತಿಷ್ಟು ಹಣ ಮನೆಗೆ ಕೊಡುತ್ತಿದ್ದಳು. ಅಂದು ಕಂಪನಿ ಸಂಬಳವೇ ಅಥವಾ ಸಾಲದ ರೂಪದಲ್ಲಿ ಪಡೆದ ಹಣವೇ ಎಂಬುದು ತಿಳಿದು ಬಂದಿಲ್ಲ ಎಂದು ಪೊಲೀಸರು ಹೇಳಿದರು. ಇತ್ತೀಚೆಗೆ ಅಮೃತಾ, ತನಗೆ ಹೈದರಾಬಾದ್‌ನ ಪ್ರತಿಷ್ಠಿತ ಕಂಪನಿಯೊಂದರಲ್ಲಿ ಉದ್ಯೋಗ ಸಿಕ್ಕಿದ್ದು, ಇಬ್ಬರನ್ನು ಹೈದರಾಬಾದ್‌ ಪ್ರವಾಸಕ್ಕೆ ಕರೆದೊಯ್ಯುವುದಾಗಿ ಸಹೋದರ ಮತ್ತು ತಾಯಿಗೆ ಹೇಳಿದ್ದಳು.

ಫೆ.1ರ ರಾತ್ರಿ ಎಲ್ಲರೂ ಒಟ್ಟಿಗೆ ಊಟ ಮಾಡಿ ನಿದ್ರೆಗೆ ಜಾರಿದ್ದರು. ಹರೀಶ್‌ ಕೋಣೆಯಲ್ಲಿ ಮಲಗಿದ್ದರು. ತಾಯಿ ನಿರ್ಮಲಾ ಜತೆ ಮಲಗಿದ್ದ ಅಮೃತಾ, ಮುಂಜಾನೆ ನಾಲ್ಕು ಗಂಟೆ ಸುಮಾರಿಗೆ ಎದ್ದು ಚಾಕುವಿನಿಂದ ತಾಯಿಯನ್ನು ಬರ್ಬರವಾಗಿ ಹತ್ಯೆಗೈದಿದ್ದಾಳೆ. ಎಚ್ಚರಗೊಂಡ ಸಹೋದರನ ಮೇಲೂ ಹಲ್ಲೆ ನಡೆಸಿದ್ದಾಳೆ ಎಂದು ಪೊಲೀಸರು ಹೇಳಿದರು.

ವಿಮಾನ ನಿಲ್ದಾಣದಲ್ಲಿ ವಾಹನ ಪತ್ತೆ: ಮುಂಜಾನೆ ಐದು ಗಂಟೆ ವೇಳಗೆ ಕೃತ್ಯವೆಸಗಿ ಬ್ಯಾಗ್‌ ಸಮೇತ ತೆರಳಿದ ಅಮೃತಾ, ದ್ವಿಚಕ್ರ ವಾಹನದಲ್ಲಿ ಪ್ರಿಯಕರ ಶ್ರೀಧರ್‌ರಾವ್‌ ಜತೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ತೆರಳಿದ್ದಾರೆ. ಅಲ್ಲಿಂದ ಮಂಜಾನೆ 6.30ಕ್ಕೆ ಬೆಂಗಳೂರಿನಿಂದ ಅಂಡಮಾನ್‌ಗೆ ಹೊರಡುವ ವಿಮಾನದಲ್ಲಿ ಪರಾರಿಯಾಗಿದ್ದರು. ಶ್ರೀಧರ್‌ ಬೈಕ್‌ ವಿಮಾನ ನಿಲ್ದಾಣ ಸಮೀಪದಲ್ಲಿ ಪತ್ತೆಯಾಗಿದೆ ಎಂದು ಪೊಲೀಸರು ಹೇಳಿದರು.

ಒಂದೇ ಕಂಪನಿಯಲ್ಲಿ ಕೆಲಸ, ಒಂದು ತಿಂಗಳ ಸಂಚು: ಪ್ರಕರಣದ ಆರೋಪಿಗಳಾದ ಅಮೃತಾ ಮತ್ತು ಶ್ರೀಧರ್‌ರಾವ್‌ ಈ ಮೊದಲು ಒಂದೇ ಸಾಫ್ಟ್ವೇರ್‌ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಈ ವೇಳೆ ಇಬ್ಬರ ನಡುವೆ ಪ್ರೇಮಾಂಕುರವಾಗಿದೆ. ಆದರೆ, ಈ ವಿಚಾರ ತಾಯಿ ನಿರ್ಮಲಾಗೆ ಇಷ್ಟವಿರಲಿಲ್ಲ. ಹೀಗಾಗಿ ಒಂದು ತಿಂಗಳ ಹಿಂದೆಯೇ ತಾಯಿ ಹಾಗೂ ಸಹೋದರನ್ನು ಕೊಂದು ಅಂಡಮಾನ್‌ನಲ್ಲಿ ಮೋಜು-ಮಸ್ತಿ ಮಾಡಿಕೊಂಡು, ಬಳಿಕ ಮುಂಬೈನಲ್ಲಿ ಹೊಸ ಬದುಕು ಕಟ್ಟಿಕೊಳ್ಳಲು ಸಿದ್ದತೆ ನಡೆಸಿದ್ದರು.

ಈ ಮಧ್ಯೆ ವಿಮಾನ ಟಿಕೆಟ್‌ ಬುಕ್‌ ಕಾಯ್ದಿರಿಸುವಾಗ ಅಮೃತಾ ತನ್ನ ಹೆಸರನ್ನು ಅಮೃತಾ ಸಿ ಶ್ರೀಧರ್‌ ಎಂದು ನಮೂದಿಸಿ ಬೇರೆಯದ್ದೆ ನಂಬರ್‌ ಉಲ್ಲೇಖೀಸಿದ್ದರು. ಹೀಗಾಗಿ ಆರಂಭದಲ್ಲಿ ಗೊಂದಲ ಉಂಟಾಗಿ, ಮುಂಬೈಗೆ ತೆರಳಿ ಪರಿಶೀಲಿಸಿದಾಗ ನಿಜವಾದ ಅಮೃತಾ ಅಲ್ಲ ಎಂಬುದು ಖಾತ್ರಿಯಾಗಿ ಬಳಿಕ ಅಂಡಮಾನ್‌ಗೆ ತೆರಳಿ ಆರೋಪಿಗಳನ್ನು ಬಂಧಿಸಲಾಯಿತು ಎಂದು ಪೊಲೀಸರು ಹೇಳಿದರು.

ಅಂಡಮಾನ್‌ನಲ್ಲಿ ಬಂಧನ: ಸಹೋದರ ಹರೀಶ್‌ರಿಂದ ಪ್ರಾಥಮಿಕ ಮಾಹಿತಿಯನ್ನು ಕಲೆ ಹಾಕಿದ ಕೆ.ಆರ್‌.ಪುರ ಠಾಣೆ ಇನ್‌ಸ್ಪೆಕ್ಟರ್‌ ಅಂಬರೀಶ್‌ ಮತ್ತು ತಂಡ, ವಿಮಾನ ಮೂಲಕ ಅಂಡಮಾನ್‌ಗೆ ತೆರಳಿ ಅಲ್ಲಿನ ವಿಮಾನ ನಿಲ್ದಾಣ ಸಮೀಪದಲ್ಲೇ ಬುಧವಾರ ಬೆಳಗ್ಗೆ ಇಬ್ಬರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದು, ಸ್ಥಳೀಯ ಕೋರ್ಟ್‌ಗೆ ಹಾಜರು ಪಡಿಸಿ ಗುರುವಾರ ನಗರಕ್ಕೆ ಕರೆ ತರಲಾಗುವುದು ಎಂದು ಪೊಲೀಸರು ಹೇಳಿದರು.