ಕಳ್ಳನ ಕೃತ್ಯ ಫೇಸ್‌ಬುಕ್‌ನಲ್ಲಿ ಬಯಲಾಯ್ತು

Team Udayavani, Jul 1, 2017, 11:19 AM IST

ಬೆಂಗಳೂರು: ಕಾರು ಸ್ವತ್ಛಗೊಳಿಸುವ ನೆಪದಲ್ಲಿ ಐಶಾರಾಮಿ ವಸ್ತುಗಳನ್ನು ಕಳವು ಮಾಡುತ್ತಿದ್ದ ವ್ಯಕ್ತಿಯೊಬ್ಬ, ತನ್ನ ಮಾಲೀಕರ ಬಳಿ ಕದ್ದಿದ್ದ ಬೆಲೆಬಾಳುವ ಕೂಲಿಂಗ್‌ ಗ್ಲಾಸ್‌ ಅನ್ನು ಮಗನಿಗೆ ತೊಡಿಸಿ ಫೋಟೊ ತೆಗೆದು ಫೇಸ್‌ಬುಕ್‌ನಲ್ಲಿ ಅಪ್‌ಲೋಡ್‌ ಮಾಡಿ ಸಿಕ್ಕಿಬಿದ್ದಿದ್ದಾನೆ. ಈ ಸಂಬಂಧ ಚಿತ್ರ ನಿರ್ಮಾಪಕ ಡಾ.ಕಿರಣ್‌ ತೋಟಂಬಳೆ ನೀಡಿರುವ ದೂರಿನ ಅನ್ವಯ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಆರೋಪಿ ನವೀನ್‌ ಎಂಬಾತನ ಬಂಧನಕ್ಕೆ ಬಲೆಬೀಸಿದ್ದಾರೆ.

ಆರೋಪಿ ನವೀನ್‌, ಕಾರು ಸ್ವತ್ಛಗೊಳಿಸುವ ಕೆಲಸ ಮಾಡಿಕೊಂಡಿದ್ದು, ನಿರ್ಮಾಪಕ ಕಿರಣ್‌ ಅವರ ಕಾರನ್ನೂ ಕಳೆದ ಎರಡು ವರ್ಷಗಳಿಂದ ಆಗಾಗ್ಗೆ ಸ್ವತ್ಛ ಮಾಡಿಕೊಡುತ್ತಿದ್ದ. ಆತನ ಸ್ವತ್ಛಗೊಳಿಸಲು ಬಂದಾಗೆಲ್ಲ ಬೆಲೆ ಬಾಳುವ ವಸ್ತುಗಳು ಕಾಣೆಯಾಗುತ್ತಿದ್ದವು. ಅದೇ ರೀತಿ ಜೂ.9 ರಂದು ಕಿರಣ್‌ ಕಾರು ಶುಚಿಗೊಳಿಸಲು ಬಂದಿದ್ದಾಗಲೂ 20 ಸಾವಿರ ಮೌಲ್ಯದ ಮೊಬೈಲ್‌ ಮತ್ತು ಕೂಲಿಂಗ್‌ ಗ್ಲಾಸ್‌ ನಾಪತ್ತೆಯಾಗಿತ್ತು.

ಕೆಲ ದಿನಗಳ ಬಳಿಕ ನವೀನ್‌ ತನ್ನ ಮಗನಿಗೆ ಕೂಲಿಂಗ್‌ ಗ್ಲಾಸ್‌ ಹಾಕಿ, ಫೋಟೋ ತೆಗೆದು ಫೇಸ್‌ಬುಕ್‌ಗೆ ಅಪ್ಲೋಡ್‌ ಮಾಡಿದ್ದ. ಇತ್ತೀಚೆಗೆ ಫೇಸ್‌ಬುಕ್‌ ನೋಡುತ್ತಿದ್ದ ಕಿರಣ್‌, ತನ್ನ ಗ್ಲಾಸ್‌ನ್ನು ನವೀನ್‌ ಮಗ ಹಾಕಿರುವುದನ್ನು ಖಚಿಪಡಿಸಿಕೊಂಡಿದ್ದರು. ಅಲ್ಲದೆ ಅನುಮಾನದ ಮೇರೆಗೆ ಮನೆಯ ಹತ್ತಿರವಿದ್ದ ಸಿಸಿಟಿವಿ ಫ‌ೂಟೇಜ್‌ ಪರಿಶೀಲಿಸಿದಾಗ, ಆರೋಪಿ ನವೀನ್‌ ಕಾರು ಸ್ವತ್ಛಗೊಳಿಸುವಾಗ ವಸ್ತುಗಳನ್ನು ಕದಿಯುತ್ತಿರುವ ದೃಶ್ಯಗಳು ಕಂಡು ಬಂದಿವೆ. ಈ ಸಂಬಂಧ ಕೂಡಲೇ ನವೀನ್‌ ವಿರುದ್ಧ ಕುಮಾರಸ್ವಾಮಿ ಲೇಔಟ್‌ ಠಾಣೆಗೆ ದೂರು ನೀಡಿದ್ದಾರೆ.