ವಿವಾಹವಾಗುವಂತೆ ನಟಿ ಪೀಡಿಸುತ್ತಿದ್ದವನ ಬಂಧನ

Team Udayavani, Oct 31, 2017, 12:08 PM IST

ಬೆಂಗಳೂರು: ಚರ್ಚ್‌ನಲ್ಲಿ ಪರಿಚಯವಾದ ಮಲೆಯಾಳಂ ನಟಿಗೆ ಮದುವೆ ಆಗುವಂತೆ ಪೀಡಿಸುತ್ತಿದ್ದ ಭಗ್ನಪ್ರೇಮಿ ಮಡಿವಾಳ ಪೊಲೀಸರ ಅತಿಥಿಯಾಗಿದ್ದಾನೆ. ಎಲೆಕ್ಟ್ರಾನಿಕ್‌ ಸಿಟಿ ನಿವಾಸಿ ಫ್ರಾಂಕ್ಲಿನ್‌ (28) ಬಂಧಿತ. ಕೇರಳ ಮೂಲದ ಫ್ರಾಂಕ್ಲಿನ್‌ 12 ವರ್ಷಗಳಿಂದ ನಗರದ ನಿವಾಸಿ, ಬಸವನಗುಡಿ ಖಾಸಗಿ ಕಂಪನಿ ಉದ್ಯೋಗಿ.

ಈ ಮಧ್ಯೆ ಕೋರಮಂಗಲದಲ್ಲಿ ತಮ್ಮ ಪೋಷಕರೊಂದಿಗೆ ವಾಸಿಸುತ್ತಿರುವ ಮಲೆಯಾಳಂ ನಟಿ ರೆಬೋ ಮೋನಿಕಾ ಅವರನ್ನು ಆರೋಪಿ ಚರ್ಚ್‌ನಲ್ಲಿ ಪ್ರಾರ್ಥನೆಗೆ ಬಂದಾಗ ಪರಿಚಯಸಿಕೊಂಡಿದ್ದಾನೆ. ಆತ್ಮೀಯತೆ ಬೆಳೆಸಿಕೊಂಡು ಆಕೆಯ ಮೊಬೈಲ್‌ ನಂಬರನ್ನು ಪಡೆದುಕೊಂಡಿದ್ದ.

ನಂತರ ಒಮ್ಮೆ ಅದೇ ಚರ್ಚ್‌ ಬಳಿ ತನ್ನ ಪ್ರೇಮನಿವೇದನೆ ಮಾಡಿಕೊಂಡಿದ್ದಾನೆ. ಇದಕ್ಕೆ ಮೇನಿಕಾ ನಿರಾಕರಿಸಿದ್ದಾರೆ. ಆರಂಭದಲ್ಲಿ ಸಂದೇಶಗಳ ಮೂಲಕ ಮನವಿ ಮಾಡುತ್ತಿದ್ದ ಫ್ರಾಂಕ್ಲಿನ್‌, ಬಳಿಕ ಸಾರ್ವಜನಿಕವಾಗಿ ಮದುವೆಯಾಗುವಂತೆ ಪೀಡಿಸಿದ್ದ.

ಇದರಿಂದ ಬೇಸತ್ತ ನಟಿ ಆತನನ್ನು ಕರೆಸಿ ಬುದ್ದಿ ಹೇಳಿದ್ದಾರೆ. ಎಚ್ಚರಿಕೆ ನೀಡಿದ್ದಾರೆ. ಆದರೂ ಬಿಡದ ಭಗ್ನಪ್ರೇಮಿ ನಿತ್ಯ ನಟಿಯನ್ನು ಹಿಂಬಾಲಿಸುತ್ತಿದ್ದ. ಕೊನೆಗೆ ಕೋಪಗೊಂಡ ನಟಿ ಮಡಿವಾಳ ಠಾಣೆಗೆ ದೂರು ನೀಡಿದ್ದಾರೆ. ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.