ಚುನಾವಣೆ ಹೊಸ್ತಿಲಲ್ಲಿ ಸಿಎಂಗೆ ನಗರ ನೆನಪಾಗಿದೆ

Team Udayavani, Jan 16, 2018, 11:40 AM IST

ಕೆ.ಆರ್‌.ಪುರ: ಬೆಂಗಳೂರುನ್ನು ದೇಶದ ಎರಡನೇ ರಾಜಧಾನಿಯನ್ನಾಗಿಸುವ ಮುಖ್ಯಮಂತ್ರಿಗಳ ಪ್ರಸ್ತಾಪಕ್ಕೆ ಮಾಜಿ ಶಾಸಕ ನಂದೀಶ್‌ ರೆಡ್ಡಿ ವಿರೋಧ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, “ಚುನಾವಣೆಯ ಹೊಸ್ತಿಲಲ್ಲಿ ಮುಖ್ಯಮಂತ್ರಿಗಳಿಗೆ ನಗರದ ನೆನಪಾಗಿದೆ,’ ಎಂದು ಟೀಕಿಸಿದ್ದಾರೆ.

ದೊಡ್ಡನಕ್ಕುಂದಿಯ ಸ್ವಗೃಹದಲ್ಲಿ ಮಕರ ಸಂಕ್ರಾಂತಿ ಅಂಗವಾಗಿ ಗೋವುಗಳಿಗೆ ಪೂಜೆ ಮಾಡಿ ಕಿಚ್ಚು ಹಾಯಿಸಿದ ನಂತರ ಸುದ್ದಿಗಾರರ ಜತೆ ಮಾತನಾಡಿದ ಅವರು, ಚುನಾವಣೆ ಸಮೀಪಿಸುತ್ತಿರುವಂತೆ ಮುಖ್ಯಮಂತ್ರಿಗಳು ತಮ್ಮ ಮತ್ತು ಪಕ್ಷದ ವರ್ಚಸ್ಸು ಹೆಚ್ಚಿಕೊಳ್ಳಲು ಬಳಸಿಕೊಳ್ಳುತ್ತಿದ್ದಾರೆ.

ನಗರದ ಅಭಿವೃಧಿœಗೆ ಶೂನ್ಯ ಕೊಡುಗೆ ನೀಡಿರುವ ಸಿಎಂ ಸಿದ್ದರಾಮಯ್ಯ ಅವರಿಗೆ ಬೆಂಗಳೂರನ್ನು ದೇಶದ ಎರಡನೇ ರಾಜಧಾನಿ ಮಾಡುವ ಬಯಕೆ ಈಗ ಭುಗಿಲೆದ್ದಿದೆ. ನಾಡ ಧ್ವಜ, ಲಿಂಗಾಯತ ಪ್ರತ್ಯೇಕ ಧರ್ಮ, ಮಹಾದಾಯಿ ನದಿ ನೀರಿನ ಸಮಸ್ಯೆಯಂತಹ ಸೂಕ್ಷ್ಮ ವಿಚಾರಗಳೇ ಇವರ ಚುನಾವಣಾ ಪ್ರಣಾಳಿಕೆಯ ಬಂಡವಾಳವಾದಂತಿದೆ ಎಂದು ಹರಿಹಾಯ್ದರು.

ಸಾರ್ವಜನಿಕರ ಕಂದಾಯ ಹಣವನ್ನೆಲ್ಲ ವೈಟ್‌ ಟಾಪಿಂಗ್‌ಗೆ ಸುರಿಯುತ್ತಿರುವ ಸರ್ಕಾರ, ಸಾವಿರಾರು ಕೋಟಿ ರೂ. ಬಿಲ್‌ ಮಾಡಿ ಕಮೀಷನ್‌ ಪಡೆಯುವ ಮೂಲಕ ಕಿಕ್‌ಬ್ಯಾಕ್‌ ಸಂಸ್ಕೃತಿಯನ್ನು ಅಧಿಕರಗೊಳಿಸುತ್ತಿದೆ ಎಂದು ಶಾಸಕರು ಅರೋಪಿಸಿದರು.