ಶಾಸಕನ ವರ್ತನೆಗೆ ಕೋರ್ಟ್‌ ಕೆಂಡ

Team Udayavani, Mar 16, 2019, 6:33 AM IST

ಬೆಂಗಳೂರು: ನ್ಯಾಯಾಲಯಕ್ಕೆ ನಗುತ್ತಾ ಪ್ರವೇಶಿಸಿದ ಬಿಜೆಪಿ ಶಾಸಕ ಶಿವನಗೌಡ ನಾಯಕ್‌ ವರ್ತನೆಗೆ ನ್ಯಾಯಾಧೀಶರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಪ್ರಸಂಗ ಗುರುವಾರ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯದಲ್ಲಿ ಜರುಗಿತು.

2008 ರಿಂದ 2013ರ ಅವಧಿಯ ಪುಸ್ತಕ ಖರೀದಿ ಹಗರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಾಕ್ಷ್ಯ ಹೇಳಲು ಆಗಮಿಸಿದ್ದ ಶಾಸಕ ಶಿವನಗೌಡ ನಾಯಕ್‌, ನ್ಯಾಯಾಲಯಕ್ಕೆ ನಗುತ್ತಾ ಆಗಮಿಸಿದರು. ಶಾಸಕರ ಈ ವರ್ತನೆಗೆ ನ್ಯಾಯಾಧೀಶರಾದ ರಾಮಚಂದ್ರ ಡಿ. ಹುದ್ದಾರ್‌ ಅಸಮಾಧಾನ ವ್ಯಕ್ತಪಡಿಸಿದರು.

‘ನ್ಯಾಯಾಲಯದಲ್ಲಿ ಹೇಗೆ ನಡೆದುಕೊಳ್ಳಬೇಕು ಎಂಬ ಪರಿಜ್ಞಾನ ನಿಮಗಿಲ್ಲವೆ. ಶಾಸಕರಾಗಿ ಹೀಗೆ ಹಗುರವಾಗಿ ನಡೆದುಕೊಳ್ತೀರ? ಪೊಲೀಸ್‌ ಕಸ್ಟಡಿಗೆ ಒಪ್ಪಿಸಬೇಕೆ?’ ಎಂದು ಶಾಸಕರಿಗೆ ಎಚ್ಚರಿಕೆ ನೀಡಿದರು. ಈ ವೇಳೆ ಶಿವನಗೌಡ ಪರ ವಕೀಲರು ಮಧ್ಯಪ್ರವೇಶಿಸಿ, ನ್ಯಾಯಾಧೀಶರ ಕ್ಷಮೆ ಕೋರುವಂತೆ ಸಲಹೆ ನೀಡಿದರು. ಬಳಿಕ ಶಾಸಕರು ತಮ್ಮ ವಕೀಲರ ಮುಖೇನ ಕ್ಷಮಾಪಣೆ ಕೋರಿದರು.