ರಾಜಧಾನಿಯಾದ್ಯಂತ ವೈಕುಂಠ ಏಕಾದಶಿ ವೈಭವ

Team Udayavani, Dec 30, 2017, 12:05 PM IST

ಬೆಂಗಳೂರು: ಕೊರೆಯುವ ಚಳಿ ನಡುವೆಯೂ ಸಿಲಿಕಾನ್‌ ಸಿಟಿಯ ಹಲವು ದೇವಾಲಗಳು ಶುಕ್ರವಾರ ವೈಭವದ ವೈಕುಂಠ ಏಕಾದಶಿ ಸಂಭ್ರಮಕ್ಕೆ ಸಾಕ್ಷಿಯಾದವು. ವೈಕುಂಠ ಏಕಾದಶಿ ದಿನದಂದು ಸ್ವರ್ಗದ ಬಾಗಿಲು ತೆರೆದಿರುತ್ತದೆ ಎಂಬ ಪ್ರತಿತಿ ಇದೆ. ಈ ಹಿನ್ನೆಲೆಯಲ್ಲಿ ನಗರದ ದೇವಾಲಯಗಳು ಭಕ್ತರಿಂದ ತುಂಬಿದ್ದವು.

ಒಂದೆಡೆ ಮಬ್ಬುಗತ್ತಲು, ಮತ್ತೂಂದೆಡೆ ಚಳಿ. ಇದರ ನಡುವೆ ದೇವರ ದರ್ಶನ ಪಡೆಯಲು ಕಿಲೋಮೀಟರ್‌ ಗಟ್ಟಲೆ ಸಾಲು. ಇದ್ಯಾವುದನ್ನು ಲೆಕ್ಕಿಸದ ಅಸಂಖ್ಯಾತ ಭಕ್ತ ಸಮೂಹ ಮುಂಜಾನೆ 3 ಗಂಟೆಯಿಂದಲೇ ದೇವರ ದರ್ಶನ ಪಡೆಯಲು ಮುಂದಾಗಿದ್ದರು. ಅಸಂಖ್ಯ ಭಕ್ತರು ದೇವಸ್ಥಾನಕ್ಕೆ ಆಗಮಿಸುವ ನಿರೀಕ್ಷೆ ಇದ್ದ ಹಿನ್ನೆಲೆಯಲ್ಲಿ ನಗರದ ದೇವಾಲಯಗಳಲ್ಲಿ ಭಕ್ತರ ಸುಗಮ ದರ್ಶನಕ್ಕಾಗಿ ಸಕಲ ವ್ಯವಸ್ಥೆ ಕಲ್ಪಿಸಲಾಗಿತ್ತು.

ತಡರಾತ್ರಿಯೇ ಸರತಿ ಸಾಲು: ಚಾಮರಾಜಪೇಟೆಯ ಕೆ.ಆರ್‌.ರಸ್ತೆಯಲ್ಲಿರುವ ಇತಿಹಾಸ ಪ್ರಸಿದ್ಧ ಕೋಟೆ ಪ್ರಸನ್ನ ವೆಂಕಟರಮಣ ಸ್ವಾಮಿ ದೇವಾಲಯದಲ್ಲಿ ಜಾತ್ರೆ ಚಿತ್ರಣ ಕಂಡುಬಂತು. ಪ್ರತಿ ವರ್ಷ ದೇವಾಲಯಕ್ಕೆ ಭಾರೀ ಸಂಖ್ಯೆಯಲ್ಲಿ ಭಕ್ತರು ಭೇಟಿ ನೀಡುವ ಹಿನ್ನೆಯಲ್ಲಿ ಈ ಬಾರಿ ಗುರುವಾರ ಮಧ್ಯರಾತ್ರಿಯೇ ನೂರಾರು ಭಕ್ತರು ದೇವಾಲಯದೆದುರು ಸಾಲುಗಟ್ಟಿ ನಿಂತಿದ್ದರು.

ಬೆಳಗಾಗುತ್ತಿದ್ದಂತೆ ಈ ಸಾಲು ದೊಡ್ಡದಾಗುತ್ತಾ ಸಾಗಿತು. ಹೆಚ್ಚಿನ ಸಂಖ್ಯೆಯ ಭಕ್ತರು ಆಗಮಿಸುವ ಮುನ್ಸೂಚನೆ ಇದ್ದ ಹಿನ್ನೆಲೆಯಲ್ಲಿ ದೇವಾಲಯದ ಆಡಳಿತ ಮಂಡಳಿ, ಭಕ್ತರ ಸುಗಮ ದರ್ಶನಕ್ಕಾಗಿ ಎರಡು ಸಾಲುಗಳ ವ್ಯವಸ್ಥೆ ಮಾಡಿತ್ತು. ಶುಕ್ರವಾರ ದೇವಾಲಯಕ್ಕೆ 80 ಸಾವಿರಕ್ಕೂ ಅಧಿಕ ಭಕ್ತರು ಭೇಟಿ ನೀಡಿದ್ದಾಗಿ ಆಡಳಿತ ಮಂಡಳಿ ಸದಸ್ಯರೊಬ್ಬರು ತಿಳಿಸಿದರು.

ತಿರುಮಲ ಗಿರಿಯಲ್ಲಿ ಭಕ್ತರ ದಂಡು: ಜೆ.ಪಿ.ನಗರ 2ನೇ ಹಂತದಲ್ಲಿರುವ ಶ್ರೀ ತಿರುಮಲಗಿರಿ ಲಕ್ಷಿವೆಂಕಟೇಶ್ವರ ಸ್ವಾಮಿ ದೇವಾಲಯದಲ್ಲೂ ನಸುಕಿನ 3 ಗಂಟೆಯಿಂದಲೇ ವಿಶೇಷ ಪೂಜೆಗಳು ಆರಂಭವಾಗಿದ್ದವು. ವಿಶೇಷ ಅಲಂಕಾರದಿಂದ ಕಂಗೊಳಿಸುತ್ತಿದ್ದ ಸ್ವಾಮಿಯನ್ನು ಕಣ್ತುಂಬಿಕೊಳ್ಳಲು ಭಕ್ತರ ದಂಡೇ ನೆರೆದಿತ್ತು.

ಒಂದೆಡೆ ಪುರೋಹಿತರ ಮಂತ್ರ ಘೋಷಗಳು ಮತ್ತೂಂದೆಡೆ ಭಕ್ತರ ಸಾಲಿನಿಂದ ವೆಂಕಟೇಶ್ವರನ ಭಜನೆ ಕೇಳಿಬರುತ್ತಿತ್ತು. ಬಿಟಿಎಂ ಲೇಔಟ್‌, ಬನ್ನೆರುಘಟ ರಸ್ತೆ, ಜಯನಗರ, ಬನಶಂಕರಿ, ಹೊರಮಾವು, ಕುಮಾರ ಸ್ವಾಮಿ ಲೇಔಟ್‌, ಕೋಣನಕುಂಟೆ, ಪುಟ್ಟೇನಹಳ್ಳಿ ಸೇರಿ ವಿವಿಧ ಭಾಗಗಳ ನಿವಾಸಿಗಳು ನಸುಕಿನಿಂದಲೇ ದರ್ಶನಕ್ಕೆ ನಿಂತಿದ್ದಿ, 60 ಸಾವಿರ ಭಕ್ತರು ದರ್ಶನ ಪಡೆದಿರುವುದಾಗಿ ಆಡಳಿತ ಮಂಡಳಿ ತಿಳಿಸಿದೆ.

ಭಕ್ತರು ಸೆಲ್ಫಿಯಲ್ಲಿ ಬ್ಯುಸಿ: ರಾಜಾಜಿನಗರದ ಇಸ್ಕಾನ್‌ ದೇವಾಲಯದಲ್ಲಿ ವೈಕುಂಠ ಏಕಾದಶಿಯ ಶುಕ್ರವಾರ ನಸುಕಿನ 3 ಗಂಟೆಯಿಂದ ರಾತ್ರಿ 11 ಗಂಟೆವರೆಗೂ ವಿಶೇಷ ಪೂಜೆಗಳು ನೆರವೇರಿದವು. ಬೆಳಗ್ಗೆ 5 ಗಂಟೆಗೆ ವೈಕುಂಠ ದ್ವಾರಕ್ಕೆ ಶ್ರೀಲಕ್ಷಿನಾರಾಯಣ ಅಲಂಕಾರದಲ್ಲಿ ಶ್ರೀರಾಧಾ ಕೃಷ್ಣ ಚಂದ್ರರ ಪಲ್ಲಕ್ಕಿ ಉತ್ಸವ, ವೈಕುಂಠ ದ್ವಾರ ಪೂಜೆ,

ಕಲ್ಯಾಣೋತ್ಸವದ ಜತೆಗೆ ತೋಮಾಲೆ ಸೇವೆ, ಲಕ್ಷಾರ್ಚನೆ ಸೇರಿ ಹಲವು ಪೂಜಾ ವಿಧಿಗಳು ನೆರವೇರಿದವು. ವೈಕುಂಠ ದ್ವಾರ ಹಾಗೂ ದೇವಾಲಯದ ಹೊರಾಂಗಣದಲ್ಲಿ ಸೆಲ್ಪಿ ತೆಗೆದುಕೊಳ್ಳುವಲ್ಲಿ ಭಕ್ತರು ಬ್ಯುಸಿಯಾಗಿದ್ದರು. ಇದೇ ವೇಳೆ ಭಕ್ತರಿಗೆ 10 ಟನ್‌ ಸಕ್ಕರೆ ಪೊಂಗಲ್‌ ಮತ್ತು 1 ಲಕ್ಷ ಲಡ್ಡು ಪ್ರಸಾದ ವಿತರಿಸಲಾಯಿತು.

ಮಲ್ಲೇಶ್ವರದಲ್ಲಿ ಕಲ್ಯಾಣೋತ್ಸವ: ಮಲ್ಲೇಶ್ವರದ ಶ್ರೀ ಪಾಂಡುರಂಗ ವಿಷ್ಣುಸಹಸ್ರಾನಾಮ ಮಂಡಳಿಯಿಂದ ಮಲ್ಲೇಶ್ವರ ಆಟದ ಮೈದಾನದ ಎದುರು ಶ್ರೀನಿವಾಸ ಕಲ್ಯಾಣೋತ್ಸವದ ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳು ಜರುಗಿದವು. ಶುಕ್ರವಾರ ಮುಂಜಾನೆ 5 ಗಂಟೆೆಯಿಂದ ಸಾಮೂಹಿಕ ವಿಷ್ಣು ಸಹಸ್ರನಾಮ ಪಾರಾಯಣ ಆರಂಭವಾಗಿದ್ದು, ಶನಿವಾರ ಬೆಳಗ್ಗೆ 8 ಗಂಟೆವರೆಗೂ ನಡೆಯಲಿದೆ.

ರಾಜಾಜಿನಗರದ 5ನೇ ಬ್ಲಾಕ್‌ನ, ಶ್ರೀ ಕೈಲಾಸ ವೈಕುಂಠ ಮಹಾಕ್ಷೇತ್ರ, ಮಹಾಲಕ್ಷಿಪುರದ ಶ್ರೀ ಶ್ರೀನಿವಾಸ ದೇವಸ್ಥಾನ, ಜಯಮಹಲ್‌ ಬಡಾವಣೆಯ ಬಂಡೆ ಶ್ರೀ ಸತ್ಯ ಆಂಜನೇಯಸ್ವಾಮಿ ದೇವಸ್ಥಾನ, ಮಾಗಡಿ ರಸ್ತೆಯ ಶ್ರೀವಿನಾಯಕ ಶ್ರೀ ವೆಂಕಟೇಶ್ವರ ದೇವಸ್ಥಾನ ಸೇರಿದಂತೆ ನಗರದ ಎಲ್ಲ ದೇವಾಲಯಗಳಲ್ಲಿ ವೈಕುಂಠ ಏಕಾದಶಿ ಸಂಭ್ರಮ ಮುಗಿಲು ಮುಟ್ಟಿತ್ತು.