ಅಸಮಾನತೆ ತೊಡೆದ ಕನಕ ದಾಸರ ಕೀರ್ತನೆ

Team Udayavani, Nov 7, 2017, 1:25 PM IST

ಕೆಂಗೇರಿ: ಸಮಾಜದಲ್ಲಿ ಬೇರೂರಿದ್ದ ಅಸಮಾನತೆ, ಜಾತಿ ವ್ಯವಸ್ಥೆ ಹೋಗಲಾಡಿಸುವ ನಿಟ್ಟಿನಲ್ಲಿ ತಮ್ಮ ಕೀರ್ತನೆಗಳ ಮೂಲಕ ಜಾಗೃತಿ ಮೂಡಿಸಿದ  ಕನಕದಾಸರು, ಸಮಾಜದ ಅಂಕುಡೊಂಕು ತಿದ್ದಲು ಪ್ರಯತ್ನಿಸಿದ್ದರು ಎಂದು ಬೆಂಗಳೂರು ನಗರ ಜಿಲ್ಲಾ ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ಬಿ.ಅರ್‌.ಶಿವಮಾದಯ್ಯ ಹೇಳಿದರು.

ಹೆಮ್ಮಿಗೆಪುರ ವಾರ್ಡ್‌ನ ಚಿಕ್ಕೇಗೌಡನಪಾಳ್ಯದಲ್ಲಿ ಕನಕ ಸೇವಾ ಸಮಿತಿ ಆಯೋಜಿಸಿದ್ದ ಕನಕ ಜಯಂತಿ ಹಾಗೂ ಕನ್ನಡ ರಾಜ್ಯೋತ್ಸವ ಸಮಾರಂಭದಲ್ಲಿ ಮಾತನಾಡಿ, ಬಾಲ್ಯದಲ್ಲಿಯೇ ಮಕ್ಕಳಿಗೆ ಸಂತರು, ದಾರ್ಶನಿಕರು, ನೀಡಿ ಹೋದ ಉನ್ನತ ವಿಚಾರಧಾರೆ ತಿಳಿಸುವ ಮೂಲಕ ಸಮ ಸಮಾಜ ನಿರ್ಮಿಸಲು ಪೋಷಕರು ಮುಂದಾಗಬೇಕು ಎಂಧರು.

ಇದೇ ವೇಳೆ ನಾಗೇಗೌಡನಪಾಳ್ಯ, ಗಾಣಕಲ್ಲು, ಮೈಲಸಂದ್ರ ಬಡಾವಣೆಗಳಲ್ಲಿ ಕನಕ ಜಯಂತಿ ನಡೆಯಿತು. ಬೆಂಗಳೂರು ನಗರ ಜಿ.ಪಂ ಮಾಜಿ ಸದಸ್ಯ ಎ.ಶಿವಕುಮಾರ್‌, ಬೆಂಗಳೂರು ದಕ್ಷಿಣ ತಾ.ಪಂ ಮಾಜಿ ಅಧ್ಯಕ್ಷ ನಾಗರಾಜ್‌, ಗ್ರಾ.ಪಂ ಸದಸ್ಯ ಕುಮಾರ್‌ ಭಾಗವಹಿಸಿದ್ದರು.