ಮೆಟ್ರೋಗೆ ಹೊಸ ಬಣ್ಣದ 5 ಲಕ್ಷ ಟೋಕನ್‌

Team Udayavani, Oct 25, 2017, 1:00 PM IST

ಬೆಂಗಳೂರು: “ನಮ್ಮ ಮೆಟ್ರೋ’ ಟಿಕೆಟ್‌ ರೂಪದಲ್ಲಿ ನೀಡುವ ಟೋಕನ್‌ಗಳ ಬಣ್ಣ ಬದಲಾಗಿದೆ. ತಿಳಿನೀಲಿ ಬಣ್ಣದ ಸ್ವಲ್ಪ ಹೊಳಪು ಇರುವ ಹೊಸ ರೂಪದಲ್ಲಿ ಟಿಕೆಟ್‌ ಟೋಕನ್‌ಗಳನ್ನು ಪರಿಚಯಿಸಲಾಗಿದೆ. ಹಾಗಂತಾ, ಈ ಮೊದಲಿದ್ದ ಕಪ್ಪುಬಣ್ಣದ ಟೋಕನ್‌ಗಳ ಇರುವುದಿಲ್ಲ ಎಂದಲ್ಲ.

ಹಳೆಯ ಮತ್ತು ಹೊಸ ಟೋಕನ್‌ಗಳೆರಡೂ ಚಾಲ್ತಿಯಲ್ಲಿರುತ್ತವೆ ಎಂದು ಬಿಎಂಆರ್‌ಸಿ ಸ್ಪಷ್ಟಪಡಿಸಿದೆ. ಸುಮಾರು 5 ಲಕ್ಷ ಈ ಹೊಸ ಟೋಕನ್‌ಗಳು ಸೇರ್ಪಡೆಯಾಗಿವೆ. ಈ ಹಿಂದಿದ್ದ ಟೋಕನ್‌ಗಳ ಸಂಖ್ಯೆ ಐದು ಲಕ್ಷ. ಅಂದರೆ, ಹತ್ತು ಲಕ್ಷ ಟೋಕನ್‌ಗಳು ಲಭ್ಯ ಇವೆ.

ನೇರಳೆ ಮತ್ತು ಹಸಿರು ಮಾರ್ಗ ಸೇರಿ ನಿತ್ಯ ಮೆಟ್ರೋದಲ್ಲಿ ಓಡಾಡುವ ಪ್ರಯಾಣಿಕರ ಸಂಖ್ಯೆ ಸರಾಸರಿ 3.60 ಲಕ್ಷ. ಟೋಕನ್‌ ಬಣ್ಣ ಬದಲಿಸಲು ಕಾರಣ, ಸ್ವಲ್ಪ ಆಕರ್ಷಕವಾಗಿರಲಿ ಹಾಗೂ ಹೊಳಪಿನೊಂದಿಗೆ ಕೈಯಲ್ಲಿ ಮೃದುವಾಗಿರುತ್ತದೆ.

ಬಣ್ಣ ಹೊರತುಪಡಿಸಿದರೆ, ಉಳಿದಂತೆ ಅದರಲ್ಲಿನ ಮೆಟ್ರೋ ರಂಗೋಲಿ ಮತ್ತು ಬಿಬಿಎಂಪಿ ಗೋಪುರ ಲಾಂಛನ ಎಂದಿನಂತೆ ಇದೆ. ತಿಂಗಳ ಹಿಂದಿನಿಂದಲೇ ಈ ಹೊಸ ಟೋಕನ್‌ಗಳು ಚಾಲ್ತಿಯಲ್ಲಿವೆ ಎಂದು ನಿಗಮದ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.