ಹೆತ್ತ ಮಗುವಿಗೆ ಪುನರ್‌ಜನ್ಮ ನೀಡಿದ ತಾಯಿ!

Team Udayavani, Mar 8, 2017, 11:45 AM IST

ಬೆಂಗಳೂರು: ನಾಲ್ಕು ವರ್ಷದ ಹೆಣ್ಣು ಮಗುವಿಗೆ ತಾಯಿಯೇ ಮೂತ್ರಪಿಂಡ ದಾನ ಮಾಡಿ ಜೀವ ಉಳಿಸಿದ ಅಪರೂಪದ ಘಟನೆ ನಗರದಲ್ಲಿ ನಡೆದಿದೆ. ಮೂತ್ರಪಿಂಡ ಸಮಸ್ಯೆಯಿಂದ ಬಳಲುತ್ತಿದ್ದ 4 ವರ್ಷದ ಹೆಣ್ಣು ಮಗು ವಿಗೆ ಅಗತ್ಯವಿದ್ದ ಮೂತ್ರಪಿಂಡ ದಾನ ಮಾಡಲು ಯಾರೂ ದೊರಕ ದಿದ್ದಾಗ ಆ ಮಗುವಿನ ತಾಯಿ ಪ್ರಿಯಾಂಕ (31) ತಾನೇ ಮುಂದಾಗಿ ಹೊಸ ಜೀವನ ನೀಡಿದ್ದಾರೆ.

ಆಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ಅಂಗವಾಗಿ ರೈನ್‌ಬೋ ಮಕ್ಕಳ ಆಸ್ಪತ್ರೆಯಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮೂತ್ರಪಿಂಡ ದಾನ ಮಾಡಿದ ಪ್ರಿಯಾಂಕ ಅವರನ್ನು ಸನ್ಮಾನಿಸಲಾಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ರೈನ್‌ಬೋ ಆಸ್ಪತ್ರೆಯ ಡಾ.ಸೌಮಿಲ್‌ ಗೌರ್‌, ನಾಲ್ಕು ವರ್ಷದ ಮಗು ನೆಫೊಟಿಕ್‌ ಸಿಂಡ್ರೋಮ್‌ನಿಂದ ಬಳಲುತ್ತಿತ್ತು.

ಒಂದೂವರೆ ವರ್ಷ ದಿಂದ ಪೆರಿಟೋನಿಯಲ್‌ ಡಯಾಲಿಸಿಸ್‌ಗೆ ಒಳಗಾಗಿತ್ತು. ಆ ಮಗುವಿಗೆ ಮೂತ್ರಪಿಂಡ ಕಸಿ ಮಾಡುವ ಸವಾಲು ನಮ್ಮ ಮುಂದಿತ್ತು. ಬೇರೆ ಯಾರೂ ದಾನ ಮಾಡವವರು ದೊರಯದಿದ್ದಾಗ ಆ ಮಗುವಿನ ತಾಯಿಯೇ ಮೂತ್ರಪಿಂಡ ದಾನ ಮಾಡಲು ಮುಂದಾದರು. ಆಸ್ಪತ್ರೆಯಲ್ಲಿ ಯಶಸ್ವಿ ಚಿಕಿತ್ಸೆ ಮೂಲಕ ಜೋಡಣೆ ಮಾಡಲಾಯಿತು. ಈಗ ತಾಯಿ ಮತ್ತು ಮಗ ಆರೋಗ್ಯವಾಗಿದ್ದಾರೆ ಎಂದು ತಿಳಿಸಿದರು.