ರೇರಾ ಕಾಯ್ದೆ ದುರ್ಬಲಕ್ಕೆ ಹುನ್ನಾರ: ಕಾನೂನು ಹೋರಾಟಕ್ಕೆ ನಿರ್ಧಾರ

Team Udayavani, Jul 31, 2017, 11:53 AM IST

ಬೆಂಗಳೂರು: ಸಚಿವ ಸಂಪುಟದ ಕೆಲ ಸಚಿವರು ಹಾಗೂ ಕಾನೂನು ಬಾಹಿರವಾಗಿ ರಿಯಲ್‌ ಎಸ್ಟೇಟ್‌ ಉದ್ಯಮದಲ್ಲಿ ತೊಡಗಿಸಿಕೊಂಡಿರುವವರನ್ನು ರಕ್ಷಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಬಲಿಷ್ಠ “ರಿಯಲ್‌ ಎಸ್ಟೇಟ್‌ (ನಿಯಂತ್ರಣ ಮತ್ತು ಅಭಿವೃದ್ಧಿ) ಕಾಯ್ದೆಯನ್ನು (ರೇರಾ) ದುರ್ಬಲಗೊಳಿಸಿ ಜಾರಿಗೆ ತರುವ ರಾಜ್ಯ ಸರ್ಕಾರದ ಕ್ರಮದ ವಿರುದ್ಧ ಇನ್ನೆರಡು ವಾರಗಳಲ್ಲಿ ಕಾನೂನು ಹೋರಾಟ ಆರಂಭಿಸಲಾಗುವುದು ಎಂದು ಲಂಚ ಮುಕ್ತ ಕರ್ನಾಟಕ ನಿರ್ಮಾಣ ವೇದಿಕೆಯ ಅಧ್ಯಕ್ಷ ರವಿಕೃಷ್ಣಾ ರೆಡ್ಡಿ ಹೇಳಿದ್ದಾರೆ. 

ಲಂಚ ಮುಕ್ತ ಕರ್ನಾಟಕ ನಿರ್ಮಾಣ ವೇದಿಕೆ ಮತ್ತು ಯುನೈಟೆಡ್‌ ಲಾಯರ್ ಫೋರಂ ಜಂಟಿಯಾಗಿ ಭಾನುವಾರ ವೆಂಕಟಪ್ಪ ಆರ್ಟ್‌ ಗ್ಯಾಲರಿ ಸಭಾಂಗಣದಲ್ಲಿ “ರೇರಾ’ ಕಾಯ್ದೆ ಕುರಿತ ವಿಚಾರಸಂಕಿರಣದಲ್ಲಿ ಈ ನಿರ್ಣಯ ಕೈಗೊಳ್ಳಲಾಗಿದೆ. ಅದರಂತೆ, ಕಾಯ್ದೆಯಿಂದ ಬಾಧಿತರಾಗುವವರು ಕಾನೂನು ಹೋರಾಟದಲ್ಲಿ ದೂರುದಾರರಾಗುವ ಮೂಲಕ ಹೋರಾಟದಲ್ಲಿ ಕೈಜೋಡಿಸಬೇಕು ಎಂದು ರವಿಕೃಷ್ಣಾ ರೆಡ್ಡಿ ಮನವಿ ಮಾಡಿದರು. 

ರೇರಾ ಕಾಯ್ದೆಗೆ ಇತ್ತಿಚಿಗೆ ರಾಜ್ಯ ಸಚಿವ ಸಂಪುಟ ನಿಯಮಗಳನ್ನು ರೂಪಿಸಿದೆ. ಇದರಲ್ಲಿ ಶೇ.60ರಷ್ಟು ಪೂರ್ಣಗೊಂಡ ರಿಯಲ್‌ ಎಸ್ಟೇಟ್‌ ಯೋಜನೆಗಳನ್ನು ಕಾಯ್ದೆಯಿಂದ ಹೊರಗಿಡುವ ಹುನ್ನಾರ ಮಾಡಲಾಗಿದೆ. ರಾಜ್ಯ ಸಚಿವ ಸಂಪುಟದ 10ಕ್ಕೂ ಹೆಚ್ಚು ಸಚಿವರು ರಿಯಲ್‌ ಎಸ್ಟೇಟ್‌ ಉದ್ಯಮದಲ್ಲಿ ತೊಡಗಿಸಿಕೊಂಡಿರುವದು ಎಲ್ಲರಿಗೂ ಗೊತ್ತಿರುವ ವಿಚಾರ. ಈ ಸಚಿವರಿಗೆ ಮತ್ತು ಕಾನೂನು ಬಾಹಿರ ರಿಯಲ್‌ ಎಸ್ಟೇಟ್‌ ನಡೆಸಿ, ಅಮಾಯಕರಿಗೆ ವಂಚಿಸುತ್ತಿರುವ ಕೆಲವರ ರಕ್ಷಣೆ ಮಾಡಲು ರಾಜ್ಯ ಸರ್ಕಾರ ದುರ್ಬಲ ನಿಯಮಗಳನ್ನು ರಚಿಸಿದೆ.

ಈ ಬಗ್ಗೆ ಈಗಾಗಲೇ ರಾಜ್ಯಪಾಲರಿಗೆ ದೂರು ಸಲ್ಲಿಸಲಾಗಿದೆ. ಈಗ ಕಾನೂನು ಹೋರಾಟ ಸಹ ಆರಂಭಿಸಲಾಗುವುದು ಎಂದು ರವಿಕೃಷ್ಣಾ ರೆಡ್ಡಿ ಹೇಳಿದ್ದಾರೆ. ಸುಪ್ರೀಂಕೋರ್ಟ್‌ ವಕೀಲ ಕೆ.ವಿ. ಧನಂಜಯ, ರೇರಾ ಕಾಯ್ದೆ ಪರ ಹೋರಾಟಗಾರ ಅಜಿತ್‌ ನಾಯಕ್‌, ಪ್ರಜಾ ಡಾಟ್‌ ಆರ್ಗ್‌ನ ಮುರಳೀಧರ ಸೇರಿದಂತೆ ವಕೀಲರು ಸಾಮಾಜಿಕ ಕಾರ್ಯಕರ್ತರು ಚರ್ಚೆಯಲ್ಲಿ ಪಾಲ್ಗೊಂಡಿದ್ದರು.