Arrested: ಮದುವೆ ಮನೆಗೆ ಎಂಟ್ರಿ ಕೊಟ್ಟು ಕಳವು ಮಾಡುತ್ತಿದ್ದವನ ಬಂಧನ

Team Udayavani, Jan 25, 2024, 10:37 AM IST

ಬೆಂಗಳೂರು: ಮದುವೆ ಮನೆಯಲ್ಲಿ ಲಕ್ಷಾಂತರ ರೂ. ಮೌಲ್ಯದ ಚಿನ್ನಾಭರಣ ದೋಚಿ ಪರಾರಿಯಾಗಿದ್ದ ಕಳ್ಳನೊಬ್ಬ ಮಾಗಡಿ ರಸ್ತೆ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.

ನಿಖಿಲ್‌ ಬಂಧಿತ ಆರೋಪಿ. ಆತನಿಂದ 1.80 ಲಕ್ಷ ಮೌಲ್ಯದ ಚಿನ್ನಾಭರಣವನ್ನು ವಶಕ್ಕೆ ಪಡೆಯಲಾಗಿದೆ.

ಯಾರದ್ದೊ ಮದುವೆ ಮನೆಗೆ ಟಿಪ್‌ ಟಾಪ್‌ ಆಗಿ ಯಾರಿಗೂ ಅನುಮಾನ ಬಾರದಂತೆ ಬೆಲೆ ಬಾಳುವ ಉಡುಗೆ ಜತೆಗೆ ಎಂಟ್ರಿ ಕೊಡುತ್ತಿದ್ದ. ವಿಶ್‌ ಮಾಡುವ ನೆಪದಲ್ಲಿ ವಧು ಅಥವಾ ವರರ ರೂಮ್‌ ಗೆ ತೆರಳುತ್ತಿದ್ದ. ವರ ಅಥವಾ ವಧುವಿನ ಸಂಬಂಧಿಗಳ ಸೋಗಿನಲ್ಲಿ ನೇರವಾಗಿ ಡ್ರೆಸಿಂಗ್‌ ರೂಮ್‌ ಗೆ ಹೋಗುತ್ತಿದ್ದ. ಸಮಯ ನೋಡಿಕೊಂಡು ಚಿನ್ನಾಭರಣ ಕದ್ದು ಪರಾರಿಯಾಗುತ್ತಿದ್ದ. ಈ ಹಿಂದೆ ಇದೇ ರೀತಿ ಕಳ್ಳತನ ನಡೆಸಿ ಜೈಲಿಗೆ ಹೋಗಿ ಜಾಮೀನಿನ ಮೇಲೆ ಹೊರಬಂದಿದ್ದ.

ಮತ್ತೆ ಹಳೆ ಚಾಳಿ: ಪಶ್ಚಿಮ ಕಾರ್ಡ್‌ ರಸ್ತೆಯಲ್ಲಿರುವ ಜಲರಾಂ ಭವನ ಕಲ್ಯಾಣ ಮಂಟಪದಲ್ಲಿ 2023 ನ.28ರಂದು ರಾತ್ರಿ ವಿವಾಹ ಸಮಾರಂಭಕ್ಕೆ ಎಂಟ್ರಿ ಕೊಟ್ಟಿದ್ದ. ಜನಸಂದಣಿ ಇದ್ದ ಸಮಯದಲ್ಲಿ ಮಧುವಿನ ಕೋಣೆಗೆ ನುಗ್ಗಿ 1.81 ಲಕ್ಷ ರೂ. ಬೆಲೆ ಬಾಳುವ ಚಿನ್ನಾಭರಣ ಲಪಟಾಯಿಸಿ ಮತ್ತೆ ಹಳೆ ಚಾಳಿ ಮುಂದುವರೆಸಿದ್ದ. ಮಾಗಡಿ ರಸ್ತೆ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿ ಆರೋಪಿಯನ್ನು ಬಂಧಿಸಿದ್ದಾರೆ.