ಬಹುಮನಿ ಉತ್ಸವ ಆಚರಣೆ ಇಲ್ಲ: ಸಚಿವೆ ಉಮಾಶ್ರೀ

Team Udayavani, Feb 16, 2018, 6:30 AM IST

ಬೆಂಗಳೂರು: ಬಹುಮನಿ ಉತ್ಸವದ ಆಚರಣೆ ವಿಷಯಕ್ಕೆ ರಾಜಕೀಯ ರಂಗು ಬಂದ ಬೆನ್ನಲ್ಲೇ, ಈ ಉತ್ಸವ ಆಚರಣೆ ಕುರಿತ ಪ್ರಸ್ತಾವನೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಮುಂದಿಲ್ಲ ಎಂದು ಸಚಿವೆ ಉಮಾಶ್ರೀ ಸ್ಪಷ್ಟನೆ ನೀಡಿದ್ದಾರೆ.

ಬಹುಮನಿ ಉತ್ಸವ ಆಚರಣೆಯ ಕುರಿತು ಮಾಧ್ಯಮಗಳಲ್ಲಿನ ವರದಿಯನ್ನು ಗಮನಿಸಿದ್ದೇನೆ. ಆದರೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಮುಂದೆ ಅಂತಹ ಯಾವುದೇ ಪ್ರಸ್ತಾಪ  ಇಲ್ಲ. ಅಲ್ಲದೆ, ಈ ಬಗ್ಗೆ ಯಾವುದೇ ಆದೇಶವನ್ನು ಹೂರಡಿಸಿಲ್ಲ. ಜತೆಗೆ ಬಹುಮನಿ ಉತ್ಸವಕ್ಕೆ ಹಣ ಕೂಡ  ಬಿಡುಗಡೆ ಮಾಡಿಲ್ಲ ಎಂದಿದ್ದಾರೆ.

ಕಲಬುರ್ಗಿ ಜಿಲ್ಲೆಯ ಸೇಡಂ ತಾಲೂಕಿನ ಮಾಳಖೇಡದಲ್ಲಿ ರಾಷ್ಟ್ರಕೂಟ ಉತ್ಸವ ಆಚರಣೆ ಮಾಡುವ ಪ್ರಸ್ತಾವನೆ ಸರ್ಕಾರದ ಮುಂದಿದೆ. ಈ ಹಿನ್ನೆಲೆಯಲ್ಲಿ 30 ಲಕ್ಷ ರೂ.ಗಳನ್ನು ಮಾತ್ರ ಬಿಡುಗಡೆ ಮಾಡಲಾಗಿದೆ. ಈ ಸಂಬಂಧ ಜನವರಿ 25 ರಂದೇ ಸರ್ಕಾರಿ ಆದೇಶ ಹೊರಡಿಸಲಾಗಿದೆ. ಇದರಲ್ಲಿ ಬಹುಮನಿ ಉತ್ಸವ ಕುರಿತಂತೆ ಯಾವುದೇ ರೀತಿಯ ಅಂಶ ಇಲ್ಲ ಎಂದು ಪತ್ರಿಕಾ ಹೇಳಿಕೆಯ ಲ್ಲಿ ಸ್ಪಷ್ಟಪಡಿಸಿದ್ದಾರೆ.

ಈ ಹಿಂದೆ ಮಾಳಖೇಡದಲ್ಲಿ ರಾಷ್ಟ್ರಕೂಟ ಉತ್ಸವ ಆಚರಿಸುವ ಸಂಬಂಧ 50 ಲಕ್ಷ ಬಿಡುಗಡೆ ಮಾಡುವಂತೆ ವೈದ್ಯಕೀಯ ಶಿಕ್ಷಣ ಸಚಿವ ಶರಣ ಪ್ರಕಾಶ್‌ಪಾಟೀಲ್‌ ಅವರು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಗೆ ಮನವಿ ಸಲ್ಲಿಸಿದ್ದರು. ಈ ಮನವಿಯನ್ನು ಪರಿಶೀಲಿಸಿ  ರಾಷ್ಟ್ರಕೂಟ ಉತ್ಸವಕ್ಕಾಗಿ 30 ಲಕ್ಷ ರೂಪಾಯಿಗಳನ್ನು ಬಿಡುಗಡೆ ಮಾಡಲಾಗಿದೆ ಎಂದಿದ್ದಾರೆ.

ಇದಕ್ಕೂ ಮೊದಲು ಕೆಲ ಕನ್ನಡಪರ ಸಂಘಟನೆಗಳು ರಾಜಕೀಯ ಉದ್ದೇಶಕ್ಕಾಗಿ ಸರ್ಕಾರ ಕಲಬುರ್ಗಿಯಲ್ಲಿ ಬಹುಮನಿ ಉತ್ಸವಕ್ಕೆ  ಮುಂದಾಗಿದೆ ಎಂದು ಆರೋಪಿಸಿದ್ದವು. ಯಾವುದೇ ಕಾರಣಕ್ಕೂ ಕಲಬುರ್ಗಿಯಲ್ಲಿ ಬಹುಮನಿ ಉತ್ಸವಕ್ಕೆ ಅವಕಾಶ ನೀಡುವುದಿಲ್ಲ. ಒಂದು ವೇಳೆ ಬಹುಮನಿ ಉತ್ಸವಕ್ಕೆ ಸರ್ಕಾರ ಮುಂದಾದರೆ ಬೀದಿಗಿಳಿದು ಹೋರಾಟ ನಡೆಸುವುದಾಗಿ ಎಚ್ಚರಿಸಿದ್ದವು.

ಬಹುಮನಿ ಸುಲ್ತಾನರು ಈ ನಾಡಿನ ಸಂಸ್ಕೃತಿಗೆ ಧ‌ಕ್ಕೆಯನ್ನುಂಟು ಮಾಡಿದ್ದಾರೆ. ಇಂತವರ ಉತ್ಸವ ಆಚರಣೆ ಮಾಡುವ ಬದಲು. ನಾಡಿನ ಸಾಂಸ್ಕೃತಿ ಹಿರಿಮೆಗೆ ತಮ್ಮದೇ ಆದ ಕೊಡುಗೆಯನ್ನು ನೀಡಿರುವ ರಾಷ್ಟ್ರಕೂಟ ಉತ್ಸವನ್ನು ಮಾಳಖೇಡದಲ್ಲಿ ಆಚರಿಸುವಂತೆ   ಸರ್ಕಾರವನ್ನು ಆಗ್ರಹಿಸಿದ್ದವು.ಇದಾದ ಬಳಿಕ ಈ ವಿಷಯಕ್ಕೆ ರಾಜಕೀಯ ಸ್ವರೂಪ ಬಂದಿತ್ತು.