Arrested: ನಗರದಲ್ಲಿ ಮೂವರು ಆನೆ ದಂತಚೋರರ ಬಂಧನ

Team Udayavani, Aug 18, 2024, 11:17 AM IST

ಬೆಂಗಳೂರು: ಬೆಂಗಳೂರಿನ ಅರಣ್ಯ ಇಲಾಖೆಯ ಅಧಿಕಾರಿಗಳು ಕಾರ್ಯಾಚರಣೆ ನಡೆಸಿ ಮೂವರು ಆನೆದಂತ ಚೋರರನ್ನು ಬಂಧಿಸಿದ್ದಾರೆ.

ಆರೋಪಿಗಳಿಂದ 8.5 ಮತ್ತು 9 ಕೆ.ಜಿ ತೂಕದ ಬೆಲೆ ಬಾಳುವ 2 ದಂತಗಳನ್ನು ಜಪ್ತಿ ಮಾಡಲಾಗಿದೆ.

ಮೋಹನ್‌, ಆನಂದ್‌ ಹಾಗೂ ವಿನೋದ್‌ ಬಂಧಿತರು. ಆರೋಪಿಗಳು ಶನಿವಾರ ಆನೆಯ ದಂತಗಳನ್ನು ಮಾರಾಟಕ್ಕಾಗಿ ಹೊರ ಜಿಲ್ಲೆಗಳಿಂದ ಬೆಂಗಳೂರಿಗೆ ತರುತ್ತಿರುವ ಬಗ್ಗೆ ಬೆಂಗಳೂರು ನಗರ ವಿಭಾಗ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳಿಗೆ ಖಚಿತ ಮಾಹಿತಿ ಬಂದಿತ್ತು. ಬೆಂಗಳೂರು ಹಾಗೂ ಯಲಹಂಕ ವಲಯ ಅರಣ್ಯಾಧಿಕಾರಿಗಳನ್ನು ಒಳಗೊಂಡ 2 ಪ್ರತ್ಯೇಕ ತಂಡ ರಚಿಸಿಕೊಂಡು ರಾಜನುಕುಂಟೆ ಏರ್‌ಪೋರ್ಟ್‌ ರಸ್ತೆಯ ಸಾದರಹಳ್ಳಿ ಬಳಿ ಆರೋಪಿಗಳಿಗಾಗಿ ಕಾಯುತ್ತಿದ್ದರು. ಆರೋಪಿಗಳ  ಕಾರಿನ ನಂಬರ್‌ ಮೊದಲೇ ಅರಿತಿದ್ದ ಅರಣ್ಯ ಇಲಾಖೆ ಸಿಬ್ಬಂದಿ ಅವರ ವಾಹನ ಬರುತ್ತಿದ್ದಂತೆ ಅಡ್ಡಗಟ್ಟಿ ಪರಿಶೀಲಿಸಿದ್ದಾರೆ. ಈ ವೇಳೆ ವಾಹನದಲ್ಲಿ 2 ಆನೆ ದಂತಗಳು ಪತ್ತೆಯಾಗಿವೆ.