ಇಂದು ಸೂರ್ಯ ಕಿರಣ್‌ ಪ್ರದರ್ಶನ

Team Udayavani, Feb 23, 2019, 6:23 AM IST

ಬೆಂಗಳೂರು: ಈ ಬಾರಿಯ ಏರೋ ಇಂಡಿಯಾ ಪ್ರದರ್ಶನ ಆರಂಭದ ದಿನದಿಂದಲೂ ಬಾನಂಗದಿಂದ ಮರೆಯಾಗಿದ್ದ ಸೂರ್ಯ ಕಿರಣ್‌ ತಂಡ ಶನಿವಾರ ಪ್ರದರ್ಶನ ನೀಡಲಿದೆ. ಸಂಜೆ 4:30ಕ್ಕೆ ಸೂರ್ಯ ಕಿರಣ್‌ತಂಡದ ಏಳು ಜೆಟ್‌ ಟ್ರೇನರ್‌ (ತರಬೇತಿ ಯುದ್ಧ ವಿಮಾನ)ಗಳು 14 ನಿಮಿಷಗಳ ಕಾಲ ಹಾರಾಟ ನಡೆಸುವ ಮೂಲಕ ಪ್ರೇಕ್ಷಕರನ್ನು ರಂಜಿಸಲಿವೆ ಎಂದು ಆಯೋಜಕರು ಮಾಹಿತಿ ನೀಡಿದ್ದಾರೆ.

ಏರೋ ಇಂಡಿಯಾ-2019ರ ಉದ್ಘಾಟನೆಯ ಮುನ್ನಾ ದಿನ (ಫೆ.19ರಂದು) ಅಭ್ಯಾಸ ನಡೆಸುವ ಸಂದರ್ಭದಲ್ಲಿ ಸೂರ್ಯ ಕಿರಣ್‌ ತಂಡದ ಒಂಬತ್ತು ವಿಮಾನಗಳ ಪೈಕಿ ಎರಡು ವಿಮಾನಗಳ ನಡುವೆ ಘರ್ಷಣೆ ಸಂಭವಿಸಿ ಪಥನಗೊಂಡಿದ್ದವು. ಘಟನೆಯಲ್ಲಿ ಪೈಲಟ್‌ ಒಬ್ಬರು ಮೃತಪಟ್ಟಿದ್ದರು.

ಈ ಹಿನ್ನೆಲೆಯಲ್ಲಿ ಮೊದಲ ಮೂರು ದಿನ ಸೂರ್ಯ ಕಿರಣ್‌ ತಂಡ ಪ್ರದರ್ಶನ ನೀಡಿರಲಿಲ್ಲ. ಎರಡು ವಿಮಾನಗಳು ಪಥನಗೊಂಡಿರುವ ಕಾರಣ, ಶನಿವಾರ ಏಳು ಜೆಟ್‌ ಟ್ರೇನರ್‌ಗಳಷ್ಟೇ ಪ್ರದರ್ಶನ ನೀಡಲಿವೆ ಎಂದು ಆಯೋಜಕರು ಸ್ಪಷ್ಟಪಡಿಸಿದ್ದಾರೆ.