ಮಳೆಗೆ ತುಂಬುತ್ತಿದ್ದ ಶೇಷಾದ್ರಿಪುರ ಅಂಡರ್‌ಪಾಸ್‌ ದುರಸ್ತಿ

Team Udayavani, Mar 14, 2017, 12:13 PM IST

ಬೆಂಗಳೂರು: ಆನಂದ ರಾವ್‌ ವೃತ್ತದಿಂದ ಶೇಷಾದ್ರಿಪುರದ ಸ್ವಸ್ತಿಕ್‌ ಜಂಕ್ಷನ್‌ಗೆ ಸಂಪರ್ಕ ಕಲ್ಪಿಸುವ ಹಳೆಯ ಕಿನೋ ಚಿತ್ರಮಂದಿರ ಕೆಳಸೇತುವೆ ರಸ್ತೆಯಲ್ಲಿ ಮಳೆ ನೀರಿನಿಂದ ಆಗುತ್ತಿದ್ದ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡಲು ಬಿಬಿಎಂಪಿ ಕಾಮಗಾರಿ ಕೈಗೆತ್ತಿಕೊಂಡಿದೆ. ಹೀಗಾಗಿ ಮುಂದಿನ ಎರಡು ತಿಂಗಳು ಕಿನೋ ಚಿತ್ರಮಂದಿರ ರಸ್ತೆಯಲ್ಲಿ ವಾಹನ ಸಂಚಾರ ನಿಷೇಧಿಸಲಾಗಿದೆ. 

ಪ್ರತಿ ಬಾರಿ ಮಳೆ ಬಂದಾಗಲೂ ಇಲ್ಲಿನ ಕೆಳಸೇತುವೆಯಲ್ಲಿ ನೀರು ನಿಂತು ವಾಹನ ಸಂಚಾರಕ್ಕೆ ತೊಂದರೆಯಾಗುತ್ತಿತ್ತು. ಅದರ ಹಿನ್ನೆಲೆಯಲ್ಲಿ ಬಿಬಿಎಂಪಿಯಿಂದ 3 ಕೋಟಿ ರೂ. ವೆಚ್ಚದಲ್ಲಿ 900 ಎಂಎಂ ಅಳತೆಯ ಕೊಳವೆ ಅಳವಡಿಕೆ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಎರಡು ತಿಂಗಳೊಳಗೆ ಕಾಮಗಾರಿ ಪೂರ್ಣಧಿಗೊಳ್ಳಲಿದೆ. ನಂತರ ಭಾರೀ ಮಳೆಯಾದರೂ ನೀರು ಸುಲಭವಾಗಿ ಗುರುತ್ವಾಕರ್ಷಣೆ ಮೂಲಕ ರಾಜಕಾಲುವೆಗೆ ಹರಿದು ಹೋಗಲಿದೆ.

 ಕೆಳಸೇತುವೆಯಿಂದ ಕೃಷ್ಣ ಪ್ಲೋರ್‌ ಮಿಲ್‌ ಬಳಿಯ ರಾಜಕಾಲುವೆಗೆ ಕೊಳವೆ ಅಳವಡಿಕೆ ಮಾಡಲಾಗುತ್ತಿದ್ದು, ಅದರ ಹಿನ್ನೆಲೆಯಲ್ಲಿ ರಸ್ತೆಯನ್ನು ಸ್ಥಗಿತಗೊಳಿಸಲಾಗಿದೆ. ಧನ್ವಂತರಿ ರಸ್ತೆಯನ್ನು ಇತ್ತೀಚೆಗೆ ಸಾರ್ವಜನಿಕರಿಗೆ ಮುಕ್ತಗೊಳಿಸಿರುವುದರಿಂದ ಸಂಚಾರಕ್ಕೆ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ಬಿಬಿಎಂಪಿ ಅಧಿಕಾರಿಗಳು ತಿಳಿಸಿದ್ದಾರೆ. 

ಕಿನೋ ಚಿತ್ರಮಂದಿರ ಕೆಳಸೇತುವೆಯಲ್ಲಿ ಕಾಮಧಿಗಾರಿ ನಡೆಯುತ್ತಿರುವುದರಿಂದ ಸಾರ್ವ­ಜನಿಕರು ಪಯಾರ್ಯ ಮಾರ್ಗಗಳನ್ನು ಬಳಸು­ವಂತೆ ಪಾಲಿಕೆಯ ಅಧಿಕಾರಿಗಳು ಮನವಿ ಮಾಡಿದ್ದಾರೆ. ಶೇಷಾದ್ರಿಪುರದಿಂದ ಆನಂದ­ರಾವ್‌ ವೃತ್ತದ ಕಡೆಗೆ ಬರುವವರು ಧನ್ವಂತರಿ ರಸ್ತೆಯ ಮೂಲಕ ತೆರಳುವಂತೆ ತಿಳಿಸಿದ್ದಾರೆ. 

ಮತ್ತೆ ಬಂದ ಮಳೆ
ಕಳೆದ ನಾಲ್ಕೈದು ದಿನಗಳ ಹಿಂದೆ ಅಬ್ಬರಿಸಿ ಮರೆಯಾಗಿದ್ದ ಮಳೆ ನಗರದಲ್ಲಿ ಸೋಮವಾರ ರಾತ್ರಿ ದಿಢೀರ್‌ ಸುರಿದು ಬೇಸಿಗೆ ಕಾವು ತಣಿಸಿತು.  ರಾತ್ರಿ 8.15ರಸುಮಾರಿಗೆ ಶುರುವಾದ ಮಳೆ ಹದಿನೈದು ನಿಮಿಷಗಳ ಕಾಲ ಧಾರಾಕಾರವಾಗಿ ಸುರಿಯಿತು. ಇದರಿಂದ ನಗರದ ಅಲ್ಲಲ್ಲಿ ಸುಗಮ ಸಂಚಾರಕ್ಕೆ ವ್ಯತ್ಯಯ ಉಂಟಾಯಿತು.

ಮಳೆ ಹಿನ್ನೆಲೆಯಲ್ಲಿ ಕೆಲಹೊತ್ತು ಅಂಡರ್‌ಪಾಸ್‌ಗಳಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ವಾಹನಗಳ ಸಂಚಾರ ನಿರ್ಬಂಧಿಸಿದ್ದರಿಂದ ಪರ್ಯಾಯ ಮಾರ್ಗಗಳಲ್ಲಿ ವಾಹನಗಳ ದಟ್ಟಣೆ ಉಂಟಾಯಿತು. ಇನ್ನು ಜಂಕ್ಷನ್‌ಗಳು, ರಸ್ತೆ ಗುಂಡಿಗಳಲ್ಲಿ ನೀರು ತುಂಬಿದ್ದರಿಂದ ವಾಹನಗಳ ಸಂಚಾರ ನಿಧಾನಗತಿಯಲ್ಲಿತ್ತು. ನಂತರ ನೀರು ತೆರವುಧಿಗೊಳಿಸಿದ್ದರಿಂದ ವಾಹನ ಸಂಚಾರ ಮತ್ತೆ ಯಥಾಸ್ಥಿತಿಗೆ ಮರಳಿತು. 

ಎಲ್ಲಿ ಎಷ್ಟೆಷ್ಟು ಮಳೆ?
ರಾಜಾಜಿನಗರ, ಗಾಂಧಿನಗರ, ಯಶವಂತಪುರ ಸೇರಿದಂತೆ ವಿವಿಧೆಡೆ ಕನಿಷ್ಠ 2 ಮಿ.ಮೀ.ನಿಂದ ಗರಿಷ್ಠ 11.5 ಮಿ.ಮೀ.ನಷ್ಟು ಮಳೆ ದಾಖಲಾಗಿದೆ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಪತ್ತು ಉಸ್ತುವಾರಿ ಕೇಂದ್ರ (ಕೆಎಸ್‌ಎನ್‌ಡಿಎಂಸಿ) ತಿಳಿಸಿದೆ.