ಮಕ್ಕಳ ಹಬ್ಬಕ್ಕೆ ವಿಂಟೇಜ್‌ ವಾಹನಗಳ ಮೆರುಗು

Team Udayavani, Nov 12, 2018, 11:55 AM IST

ಬೆಂಗಳೂರು: ಮಕ್ಕಳ ದಿನಾಚರಣೆ ಅಂಗವಾಗಿ ನಗರದ ಕಬ್ಬನ್‌ ಉದ್ಯಾನದಲ್ಲಿ ನಡೆಯುತ್ತಿರುವ “ಮಕ್ಕಳ ಹಬ್ಬ’ಕ್ಕೆ ಭಾನುವಾರ ವಿಂಟೇಜ್‌ ಕಾರುಗಳು ಹಾಗೂ ಬೈಕ್‌ಗಳು ಮೆರಗು ನೀಡಿದ್ದವು. ರಜೆ ದಿನವಾಗಿದ್ದರಿಂದ ಭಾನುವಾರ ಸಾವಿರಾರು ಪೋಷಕರು ತಮ್ಮ ಮಕ್ಕಳನ್ನು ಹಬ್ಬಕ್ಕೆ ಕರೆತಂದಿದ್ದು, ಉದ್ಯಾನ ತುಂಬೆಲ್ಲಾ ಮಕ್ಕಳ ಸಂಭ್ರಮ ಮನೆಮಾಡಿತ್ತು.

ಈ ಹಬ್ಬಕ್ಕೆ ಇನ್ನಷ್ಟು ಮುದ ನೀಡಲು ಉದ್ಯಾನದಲ್ಲಿ ಹತ್ತಾರು ವರ್ಷಗಳ ಹಳೆಯ 25ಕ್ಕೂ ಹೆಚ್ಚು ವಿಂಟೇಜ್‌ ಕಾರುಗಳು ಮತ್ತು 15ಕ್ಕೂ ಹೆಚ್ಚು ಹಳೆಯ ಬೈಕುಗಳ ಪ್ರದರ್ಶನ ನಡೆಯಿತು. ಉದ್ಯಾನದ ಕೇಂದ್ರ ಬಿಂದು ಜಯಚಾಮರಾಜೇಂದ್ರ ಒಡೆಯರ್‌ ಪ್ರತಿಮೆ ಬಳಿ ಸಾಲಾಗಿ ವಾಹನಗಳನ್ನು ನಿಲ್ಲಿಸಲಾಗಿತ್ತು. ಹಬ್ಬಕ್ಕೆ ಆಗಮಿಸಿದ ನೂರಾರು ಮಕ್ಕಳು- ಪೋಷಕರು ಹಳೆಯ ವಾಹನಗಳ ಪಕ್ಕದಲ್ಲಿ ನಿಂತು ಅವುಗಳ ಮಾಹಿತಿ ಪಡೆದು ಛಾಯಾಚಿತ್ರಗಳನ್ನು ಕ್ಲಿಕ್ಕಿಕೊಂಡು ಸಂತಸಪಟ್ಟರು.

1930ರ ಸಂದರ್ಭದಲ್ಲಿ ಬೆಂಗಳೂರಿನಲ್ಲಿ ವಿದೇಶಿ ಕಾರುಗಳನ್ನು ಹೊಂದಿದ್ದ ಪ್ರತಿಷ್ಠಿತರು ಪ್ರತಿ ಭಾನುವಾರ ಸಂಜೆ ಕಬ್ಬನ್‌ ಉದ್ಯಾನದ ಬ್ಯಾಂಡ್‌ ಸ್ಟಾಂಡ್‌ ಬಳಿಗೆ ಬಂದು ತಮ್ಮ ವೈವಿಧ್ಯಮಯ ಕಾರುಗಳನ್ನು ವೃತ್ತಾಕಾರದ ರಸ್ತೆಯಲ್ಲಿ ನಿಲ್ಲಿಸಿ “ಮೈಸೂರು ಬ್ಯಾಂಡ್‌ ವೃಂದ’ದವರ ಸಂಗೀತವನ್ನು ಆಸ್ವಾದಿಸುತ್ತಿದ್ದರು. ಬ್ಯಾಂಡ್‌ ಸ್ಟಾಂಡ್‌ಗೆ 100 ವರ್ಷ ಪೂರೈಸಿರುವ ಹಿನ್ನೆಲೆ ಆ ನೆನಪನ್ನು ಮರುಕಳಿಸಲು ವಿಂಟೇಜ್‌ ಕಾರುಗಳ ಪ್ರದರ್ಶನ ಆಯೋಜಿಸಿದ್ದೇವೆ ಎಂದು ತೋಟಗಾರಿಕೆ ಇಲಾಖೆಯ ಉಪ ನಿರ್ದೇಶಕ ಮಹಾಂತೇಶ್‌ ಮುರಗೋಡ ತಿಳಿಸಿದರು.

ಮೂರುವರೆ ಲಕ್ಷಜನ ಭೇಟಿ: ಎರಡು ದಿನಗಳ ಕಾಲ ನಡೆದ ಹಬ್ಬಕ್ಕೆ ಮಕ್ಕಳು ಹಾಗೂ ಪೋಷಕರು ಸೇರಿದಂತೆ ಮೂರುವರೆ ಲಕ್ಷ ಜನ ಭೇಟಿ ನೀಡಿದ್ದಾರೆ. ಮೊದಲ ದಿನವಾದ ಶನಿವಾರ ಒಂದು ಲಕ್ಷ ಹಾಗೂ ಎರಡನೇ ದಿನವಾದ ಭಾನುವಾರ ಬರೋಬ್ಬರಿ ಎರಡೂವರೆ ಲಕ್ಷ ಜನ ಭೇಟಿಕೊಟ್ಟು ಹಬ್ಬವ ಸೊಬಗನ್ನು ಆಸ್ವಾದಿಸಿದ್ದಾರೆ. ಕಳೆದ ಬಾರಿಗಿಂತ ಈ ಬಾರಿ ಹೆಚ್ಚು ಜನ ಹಬ್ಬದಲ್ಲಿ ಭಾಗವಹಿಸಿದ್ದು,

ಯಾವುದೇ ಅಹಿತಕರ ಘಟನೆ ನಡೆಯದೆ ಹಬ್ಬ ಯಶಸ್ವಿಯಾಗಿದೆ. ಇನ್ನು ಹೆಚ್ಚು ಜನ ಭೇಟಿ ಕೊಟ್ಟಿದ್ದರಿಂದ ಉದ್ಯಾನದಲ್ಲಿ ಪ್ಲಾಸ್ಟಿಕ್‌, ಪೇಪರ್‌ ಕಸ ಹೆಚ್ಚಾಗಿದ್ದು, ಉದ್ಯಾನ 40 ಸ್ವತ್ಛತಾ ಸಿಬ್ಬಂದಿಗಳು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಗಳ 20 ಸಿಬ್ಬಂದಿಗಳ ಬೆಂಬದೊಂದಿಗೆ ರಾತ್ರಿ ಇಡೀ ಸ್ವತ್ಛತಾ ಕಾರ್ಯವನ್ನು ನಡೆಸಲಿದ್ದಾರೆ ಎಂದು ಕಬ್ಬನ್‌ ಉದ್ಯಾನ ಅಧಿಕಾರಿಗಳು ಮಾಹಿತಿ ನೀಡಿದರು.