ಜಾಹಿರಾತು ಅಕ್ರಮಕ್ಕೆ ಹೊಣೆ ಯಾರು?

Team Udayavani, Jul 31, 2017, 11:54 AM IST

ಬೆಂಗಳೂರು: ವ್ಯಾಪಕ ಅಕ್ರಮಗಳಿಂದಾಗಿ ಬಹಳಷ್ಟು ಚರ್ಚೆಗೆ ಗ್ರಾಸವಾಗಿದ್ದ ರಾಜಧಾನಿಯಲ್ಲಿನ ಜಾಹೀರಾತು ಮಾಫಿಯಾ ಹಗರಣದ ತನಿಖೆಯನ್ನು ಲೋಕಾಯುಕ್ತ ಪೊಲೀಸರು ಭಾಗಶ: ಪೂರ್ಣಗೊಳಿಸಿದ್ದಾರೆ. ಅಕ್ರಮದಲ್ಲಿ ಶಾಮೀಲಾದ ಬಿಬಿಎಂಪಿ ಅಧಿಕಾರಿಗಳು ಹಾಗೂ ಮಾಫಿಯಾ ಜೊತೆ ನಂಟು ಹೊಂದಿದವರ ವಿರುದ್ಧ ಲೋಕಾ ಪೊಲೀಸರು ಚಾರ್ಜ್‌ಶೀಟ್‌ ಸಲ್ಲಿಸಲು ಸಜ್ಜಾಗಿದ್ದಾರೆ. ಆದರೆ ಜಾಹೀರಾತು ಫ‌ಲಕಗಳ ನಿಯಂತ್ರಣ ಸಂಬಂಧ ಬಿಬಿಎಂಪಿ ಹೊರಡಿಸಿದ್ದ ದ್ವಂದ್ವ ಆದೇಶಗಳೇ ತನಿಖಾಧಿಕಾರಿಗಳಿಗೆ ತಲೆನೋವಾಗಿ ಪರಿಣಮಿಸಿವೆ.

ಜಾಹೀರಾತು ಅಕ್ರಮ ಹಗರಣದ ತನಿಖೆ ನಡೆಸುವಾಗ ಈ ಹಿಂದಿನ ಬಿಬಿಎಂಪಿಯ ಆಯುಕ್ತರುಗಳು ತಮ್ಮ ಅವಧಿಯಲ್ಲಿ ಪರವಾನಿಗೆ ನೀಡುವ ಆಧಿಕಾರವನ್ನು ಒಮ್ಮೆ ಬಿಬಿಎಂಪಿಯ ಕೇಂದ್ರ ಕಚೇರಿಯ ಅಧಿಕಾರಿಗಳಿಗೆ ನೀಡಿರುವುದು ಮತ್ತೂಮ್ಮೆ ವಲಯ ಅಧಿಕಾರಿಗಳಿಗೇ ಜವಾಬ್ದಾರಿ ವಹಿಸಿರುವುದು ಬೆಳಕಿಗೆ ಬಂದಿದೆ. ಪರಿಣಾಮ ಯಾರು ತಪ್ಪಿತಸ್ಥರು ಎನ್ನುವುದು ತನಿಖಾಧಿಕಾರಿಗಳಿಗೆ ಪತ್ತೆ ಹಚ್ಚುವುದು ಸವಾಲಾಗಿದೆ.

ಹೀಗಾಗಿ 2007ರಿಂದ 2015ರವರೆಗಿನ ಜಾಹೀರಾತು ಏಜೆನ್ಸಿಗಳಿಗೆ ಜಾಹೀರಾತು ಫ‌ಲಕಗಳನ್ನು ಅಳವಡಿಸಲು ಲೈಸೆನ್ಸ್‌ ನೀಡಿದ್ದ ಅಧಿಕಾರಿಗಳ ಮಾಹಿತಿ ನೀಡುವಂತೆ ಖುದ್ದು ಬಿಬಿಎಂಪಿ ಆಯುಕ್ತರಿಗೇ ಲೋಕಾ ತನಿಖಾಧಿಕಾರಿಗಳು ನೋಟೀಸ್‌ ಜಾರಿಗೊಳಿಸಿದ್ದಾರೆ. ನೋಟೀಸ್‌ ಪ್ರತಿ ” ಉದಯವಾಣಿ’ಗೆ ಲಭ್ಯವಾಗಿದೆ.

ಬಿಬಿಎಂಪಿ ಆಯುಕ್ತರಿಗೆ ನೀಡಿರುವ ನೋಟೀಸ್‌ನಲ್ಲಿ 2007ರಿಂದ 2015ಮಾರ್ಚ್‌ 7ರವರೆಗೆ ನಗರದಲ್ಲಿ ಜಾಹೀರಾತು ಅಳವಡಿಕೆ ಸಂಬಂಧ ಲೈಸೆನ್ಸ್‌ ನೀಡುವ, ನವೀಕರಿಸುವ ಅಧಿಕಾರ ಯಾರ ಬಳಿಯಿತ್ತು. ಕೇಂದ್ರ ಕಚೇರಿ ಅಧಿಕಾರಿಗಳ ಬಳಿಯಿತ್ತೇ ಅಥವಾ ಬಿಬಿಎಂಪಿ ವಲಯ ಅಧಿಕಾರಿಗಳ ಬಳಿಯಿತ್ತೇ? ಜೊತೆಗೆ ಅನಧಿಕೃತ ಜಾಹೀರಾತು ಫ‌ಲಕಗಳನ್ನು ತೆರವುಗೊಳಿಸುವ ಜವಾಬ್ದಾರಿ ಯಾರದಾಗಿತ್ತು.

ಈ ಪ್ರಕರಣದಲ್ಲಿ ಶಾಮೀಲಾಗಿದ್ದ ಅಧಿಕಾರಿಗಳ ವಿರುದ್ಧ ಯಾಕೆ ಕ್ರಮ ಜರುಗಿಸಿಲ್ಲ ಎಂಬ ವಿವರಣೆ, ಹಾಗೂ ಬಿಬಿಎಂಪಿ ಬೊಕ್ಕಸಕ್ಕೆ ನಷ್ಟವುಂಟು ಮಾಡಿದ ಅಧಿಕಾರಿಗಳ ಪಟ್ಟಿ ಹಾಗೂ ಇದರಿಂದ ಆದ ನಷ್ಟದ ಹಣದ ಮಾಹಿತಿ ನೀಡುವಂತೆ ಸೂಚನೆ ನೀಡಲಾಗಿದೆ.

ಬಿಬಿಎಂಪಿಯ ಆದೇಶಗಳಲ್ಲಿ ಏನಿದೆ?
2007ರಲ್ಲಿ ಬಿಬಿಎಂಪಿ ಆಯುಕ್ತರಾಗಿದ್ದ ಡಾ.ಎಸ್‌ ಸುಬ್ರಹ್ಮಣ್ಯ, ಅದೇ  ವರ್ಷ ಆಗಸ್ಟ್‌ 29ರಂದು ಆದೇಶ ಹೊರಡಿಸಿ, ಜಾಹೀರಾತು ಕಂಪೆನಿಗಳಿಗೆ ಲೈಸೆನ್ಸ್‌ ನೀಡಿಕೆ ಸೇರಿದಂತೆ ಎಲ್ಲಾ ವಿಚಾರಗಳಲ್ಲಿ ವಲಯ ಜಂಟಿ ಆಯುಕ್ತರೇ ನಿರ್ಧಾರ ಕೈಗೊಳ್ಳುವಂತೆ ತಿಳಿಸಿದ್ದಾರೆ. ಆದರೆ, 2010ರ ಆಗಸ್ಟ್‌ ತಿಂಗಳಿನಲ್ಲಿ ಅಂದಿನ  ಬಿಬಿಎಂಪಿ ಆಯುಕ್ತ ಸಿದ್ದಯ್ಯ, ಜಾಹೀರಾತುಗಳ ವಿಚಾರದಲ್ಲಿ  ಕೇಂದ್ರ ಕಚೇರಿ ಜಾಹೀರಾತು ವಿಭಾಗದ ಉಪ ಆಯುಕ್ತರ ಮೇಲ್ವಿಚಾರಣೆಯಲ್ಲಿ ವಲಯ ಅಧಿಕಾರಿಗಳು ನಿರ್ಧಾರ ತೆಗೆದುಕೊಳ್ಳಬಹುದು ಎಂದು ಸುತ್ತೋಲೆ ಹೊರಡಿಸುತ್ತಾರೆ.

ಇದಾದ ಬಳಿಕ  20011ರ ಜೂನ್‌ ತಿಂಗಳಿನಲ್ಲಿ  ಮತ್ತೂಂದು ಆದೇಶ ಹೊರಡಿಸಿ, ಜಾಹೀರಾತುಗಳಿಗೆ ಸಂಬಂಧಿಸಿದಂತೆ ನ್ಯಾಯಾಲಯದ ಪ್ರಕರಣಗಳು, ನಿರ್ವಹಣೆಯ ಅಧಿಕಾರ, ಬಾಕಿ ವಸೂಲಾತಿ ಸೇರಿದಂತೆ ಎಲ್ಲ ನಿರ್ಧಾರಗಳನ್ನು ವಲಯ ಜಂಟಿ ಆಯುಕ್ತರೇ ತೆಗೆದುಕೊಳ್ಳಬಹುದೆಂದು ಆದೇಶಿಸಿದ್ದಾರೆ. ಇದೇ ವಿಚಾರವಾಗಿ ಹಲವು ಬಾರಿ ದ್ವಂದ್ವ ಆದೇಶಗಳನ್ನು  ಹೊರಡಿಸಲಾಗಿದೆ.

ಹೀಗಾಗಿ ಯಾವ ಅಧಿಕಾರಿಗಳನ್ನು ಹೊಣೆ ಮಾಡಬೇಕು? ಪದೇ ಪದೇ ಆದೇಶಗಳು ಬದಲಾಗಿರುವುದರಿಂದ ಕೇಂದ್ರ ಕಚೇರಿ ಅಧಿಕಾರಿಗಳನ್ನು ಹೊಣೆ ಮಾಡಬೇಕೆ ಅಥವಾ ಜಂಟಿ ವಲಯ ಆಯುಕ್ತರನ್ನು ಹೊಣೆ ಮಾಡಬೇಕೆ ಎಂಬ ಬಗ್ಗೆ ಗೊಂದಲವುಂಟಾಗಿದೆ. ಈ ಬಗ್ಗೆ ವಿವರಣೆ ನೀಡುವಂತೆ ಬಿಬಿಎಂಪಿ ಆಯುಕ್ತರಿಗೆ ಕೋರಲಾಗಿದೆ ಎಂದು ಲೋಕಾಯುಕ್ತ ಪೊಲೀಸ್‌ ವಿಭಾಗದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.

ದಾಸರಹಳ್ಳಿ ವಲಯದಲ್ಲೇ ಹೆಚ್ಚು ಲೋಪ
ಪ್ರಕರಣದ ತನಿಖೆ ಪೂರ್ಣಗೊಳಿಸಿ ಆದಷ್ಟು ಬೇಗ ತಪ್ಪಿತಸ್ಥರ ವಿರುದ್ಧ ಚಾರ್ಜ್‌ಶೀಟ್‌ ಸಲ್ಲಿಸಲು ಲೋಕಾಯುಕ್ತ ಹಾಗೂ ಹೈಕೋರ್ಟ್‌ನ ಆದೇಶವಿದೆ. ಈ ಹಗರಣದಲ್ಲಿ ಭಾಗಿಯಾದ ಜಾಹೀರಾತು ಕಂಪೆನಿಗಳನ್ನು ಪಟ್ಟಿ  ಮಾಡಲಾಗಿದೆ. ಅಲ್ಲದೆ ಈ ಭಾರೀ ಹಗರಣದಲ್ಲಿ ಶಾಮೀಲಾಗಿರುವ ಕೆಲ ಜನಪ್ರತಿನಿಧಿಗಳನ್ನು ಗುರ್ತಿಸಲಾಗಿದೆ. ಆದರೆ ಬಿಬಿಎಂಪಿ  ಭಿನ್ನ ಆದೇಶಗಳಿಂದ ಯಾವ ಅಧಿಕಾರಿಗಳನ್ನು ಆರೋಪಿಗಳನ್ನಾಗಿ ಪರಿಗಣಿಸಬೇಕು ಎಂಬ ಬಗ್ಗೆ ಗೊಂದಲವಿದೆ.

ಈ ಮಾಹಿತಿಯನ್ನು ನೀಡಿ ಎಂದು ಕೋರಿ ಜುಲೈ 27ರಷ್ಟರಲ್ಲಿ ಸೂಚನೆ ನೀಡಲಾಗಿತ್ತು. ಆದರೆ ಇದುವರೆಗೂ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಬಿಬಿಎಂಪಿಯಿಂದ ವರದಿ ಬಂದ ಬಳಿಕ ದೋಷಾರೋಪ ಪಟ್ಟಿ ಸಲ್ಲಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ತನಿಖೆ ನಡೆಸಿರುವ ಹತ್ತು ವರ್ಷಗಳ ಅವಧಿಯಲ್ಲಿ ದಾಸರಹಳ್ಳಿ ವಲಯದಲ್ಲಿಯೇ ಹೆಚ್ಚು ಲೋಪವುಂಟಾಗಿರುವುದು ಕಂಡು ಬಂದಿದೆ. ಆದರೆ,  ದೋಷಾರೋಪ ಪಟ್ಟಿ ಸಲ್ಲಿಸುವವರೆಗೆ ಪ್ರಕರಣದ ಇತರೆ ಮಾಹಿತಿಯನ್ನು ನೀಡಲು ಸಾಧ್ಯವಿಲ್ಲ ಎಂದು ಅಧಿಕಾರಿಯೊಬ್ಬರು  ತಿಳಿಸಿದರು.

ತನಿಖೆಗೆ ಆದೇಶಿಸಿದ್ದ ಉಪಲೋಕಾಯುಕ್ತ ಸುಭಾಷ್‌ ಬಿ.ಅಡಿ 
ನಗರದಲ್ಲಿ ಅಕ್ರಮ ಜಾಹೀರಾತು ಫ‌ಲಕಗಳ ಭರಾಟೆ ಸಂಬಂಧ ನಾಲ್ಕು ಪ್ರತ್ಯೇಕ ದೂರುಗಳ ವಿಚಾರಣೆ ನಡೆಸಿದ್ದ ಉಪಲೋಕಾಯುಕ್ತ ಸುಭಾಷ್‌ ಬಿ.ಅಡಿ, ಅಕ್ರಮಗಳ ಬಗ್ಗೆ ಸಮಗ್ರ ವರದಿ ನೀಡುವಂತೆ ಬಿಬಿಎಂಪಿ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದರು, ಆದರೆ, ಯಾವುದೇ ಪ್ರತಿಕ್ರಿಯೆ ಬಂದಿರಲಿಲ್ಲ. ಈ ಹಿನ್ನೆಲೆಯಲ್ಲಿ  ಅಕ್ರಮ ಜಾಹೀರಾತು ಮಾಫಿಯಾ ಸಂಬಂಧ ತನಿಖೆ ನಡೆಸುವಂತೆ ಲೋಕಾಯುಕ್ತ  ಪೊಲೀಸರಿಗೆ 2015ರ ಫೆ.25ರಂದು ಆದೇಶಿಸಿದ್ದರು.

* ಮಂಜುನಾಥ ಲಘುಮೇನಹಳ್ಳಿ