ಜಿಪಂ ಉಪಾಧ್ಯಕ್ಷರ ಕಾರು “ಖಯಾಲಿಗೆ’ ಬ್ರೇಕ್‌

Team Udayavani, Apr 2, 2017, 11:25 AM IST

ಬೆಂಗಳೂರು: ಜಿಲ್ಲಾ ಪಂಚಾಯ್ತಿ ಉಪಾಧ್ಯಕ್ಷರ ಐಷಾರಾಮಿ ಕಾರು “ಖಯಾಲಿ’ಗೆ ಬ್ರೇಕ್‌ ಬಿದ್ದಿದೆ. ವಾಹನ ಖರೀದಿ ವೆಚ್ಚದ ಮಿತಿಯನ್ನು ಹೆಚ್ಚಿಸಬೇಕೆಂಬ ಗ್ರಾಮೀಣಾಭಿವೃದ್ಧಿ ಇಲಾಖೆಯ ಪ್ರಸ್ತಾವನೆಯನ್ನು ಹಣಕಾಸು ಇಲಾಖೆ ತಿರಸ್ಕರಿಸಿದೆ. 

ಮಾರುಕಟ್ಟೆಯಲ್ಲಿ ವಾಹನದ ಬೆಲೆ ಹೆಚ್ಚಾಗಿರುವ ಕಾರಣ ಜಿಲ್ಲಾ ಪಂಚಾಯ್ತಿ ಉಪಾಧ್ಯಕ್ಷರ ಕಾರಿನ ವೆಚ್ಚದ ಮಿತಿಯನ್ನು ಈಗಿರುವ 9 ಲಕ್ಷ ರೂ.ನಿಂದ 11 ಲಕ್ಷ ರೂ.ಗೆ ಹೆಚ್ಚಿಸಬೇಕೆಂದು ಪ್ರಸ್ತಾವನೆ ಸಲ್ಲಿಸಲಾಗಿತ್ತು. ಆದರೆ, ಇದನ್ನು ಒಪ್ಪಲು ಸಾಧ್ಯವಿಲ್ಲ ಎಂದು ಆರ್ಥಿಕ ಇಲಾಖೆ ಸ್ಪಷ್ಟಪಡಿಸಿದೆ. ಜಿಲ್ಲಾ ಪಂಚಾಯ್ತಿ ಉಪಾಧ್ಯಕ್ಷರಿಗೆ ವಾಹನ ಖರೀದಿಗೆ ವೆಚ್ಚವನ್ನು 2010ರಲ್ಲಿ 6.50 ಲಕ್ಷ ರೂ.ಗೆ ಮಿತಿಗೊಳಿಸಲಾಗಿತ್ತು. ಮಾರುಕಟ್ಟೆಯಲ್ಲಿ ದರ ಹೆಚ್ಚಿರುವ ಹಿನ್ನೆಲೆಯಲ್ಲಿ ಈ ಮಿತಿಯನ್ನು 2017ರ ಜನವರಿ 27ರಂದು 9 ಲಕ್ಷ ರೂ.ಗೆ ಹೆಚ್ಚಿಸಲಾಗಿದೆ.

ಆದರೆ, ಜಿಪಂ ಅಧ್ಯಕ್ಷರಿಗೆ ನೀಡುತ್ತಿರುವ ಸೌಲಭ್ಯಗಳು, ವೇತನ-ಭತ್ಯೆಗಳ ಶೇ.75 ತಮಗೂ ನೀಡಬೇಕೆಂದು ಉಪಾಧ್ಯಕ್ಷರು ಮನವಿ ಸಲ್ಲಿಸಿದ್ದರು. ಜಿಪಂ ಅಧ್ಯಕ್ಷರಿಗೆ ರಾಜ್ಯ ಸಚಿವರ ಸ್ಥಾನಮಾನ ನೀಡಲಾಗಿದ್ದು, ಅವರ ವಾಹನ ಖರೀದಿ ವೆಚ್ಚದ ಮಿತಿಯನ್ನು 16 ಲಕ್ಷ ರೂ. ಗಳಿಗೆ ನಿಗದಿಪಡಿಸಲಾಗಿದೆ.