ಬಿಜೆಪಿ ಮುಖಂಡನ ಬಂಗಲೆ ಭಸ್ಮ

Team Udayavani, Mar 26, 2019, 1:04 PM IST

ನೆಲಮಂಗಲ: ತಾಲೂಕಿನ ಯಂಟಗಾನಹಳ್ಳಿ ಪಂಚಾಯತಿ ವ್ಯಾಪ್ತಿಯ ಮಲ್ಲರಬಾಣವಾಡಿಯ ತಾಲೂಕು ಬಿಜೆಪಿ ಮುಖಂಡ ಹಾಗೂ ಮಾಗಡಿ ತಾಲೂಕು ಬಿಜೆಪಿ ಅಧ್ಯಕ್ಷ ರಂಗಧಾಮಯ್ಯರ ಐಶಾರಾಮಿ ಬಂಗಲೆ ಬೆಂಕಿಗಾಹುತಿಯಾಗಿದೆ.

ಘಟನೆ ವಿವರ: ಬೆಂಗಳೂರು ಮಂಗಳೂರು ತುಮಕೂರು ರಾಷ್ಟ್ರೀಯ ಹೆದ್ದಾರಿ 75 ರಲ್ಲಿನ ಮಲ್ಲರಬಾಣವಾಡಿ ಗ್ರಾಮದ ರಂಗಧಾಮಯ್ಯರ ಮನೆಯಲ್ಲಿನ ಹವಾನಿಯಂತ್ರಿತ ಯಂತ್ರೋಪಕರಣದ ಶಾರ್ಟ್‌ ಸರ್ಕ್ನೂಟ್‌ನಿಂದಾಗಿ ಅವಘಡ ಸಂಭವಿಸಿರಬಹುದು ಎಂದು ಶಂಕಿಸಲಾಗಿದೆ.

ಬೆಂಕಿ ಅವಘಡ ಸಂಭವಿಸಿದ್ದನ್ನು ಮನೆಗೆಲಸದವರು ನೋಡಿ ಬೆಂಕಿಹಾರಿಸುವ ಪ್ರಯತ್ನ ಮಾಡುವ ಹೊತ್ತಿಗೆ ಬೆಂಕಿ ಕೆನ್ನಾಲಗೆಗೆ ಮನೆಯಲ್ಲಿದ್ದ ಲಕ್ಷಾಂತರ ರೂ.ಗಳು ಬೆಲೆಬಾಳುವ ಪೀಠೊಪಕರಣ,ಪ್ಲಾಸ್ಟಿಕ್‌-ಮರದ ವಸ್ತುಗಳೆಲ್ಲವೂ ಸುಟ್ಟುಕರಕಲಾಗಿದೆ.

ಪಟ್ಟಣ ಅಗ್ನಿಶಾಮಕ ಠಾಣೆ ಸಿಬ್ಬಂದಿಗಳು ಧಾವಿಸಿ 2 ಗಂಟೆ ಕಾಲ ಬೆಂಕಿಯನ್ನು ಹಾರಿಸುವಲ್ಲಿ ಯಶಸ್ವಿಯಾದರು. ಮನೆಯಲ್ಲಿದ್ದ ಬೆಲೆಬಾಳುವ ವಸ್ತುಗಳು ಸುಟ್ಟುಕರಕಲಾದರೆ ಲಾಕರ್‌ನಲ್ಲಿಡಲಾಗಿದ್ದ ಬಂಗಾರ ಬೆಲೆಬಾಳುವ ಆಭರಣ, ದಾಖಲೆ, ಬೆಂಕಿಯ ಕೆನ್ನಾಲಗೆಯಿಂದ ಬಚಾವಾಗಿದ್ದು ಮನೆಯೊಡೆಯ ರಂಗಧಾಮಯ್ಯ ಅವರ ಕೈಸೇರಿವೆ ಎನ್ನಲಾಗಿದೆ.

ಅಂತೆಕಂತೆ: ಬೆಂಕಿ ಅವಘಡ ಹವಾನಿಯಂತ್ರಿತ ಯಂತ್ರೋಪರಣದಿಂದ ಆಯಿತಂತೆ, ದೇವರ ಮನೆಯಲ್ಲಿ ಹಚ್ಚಿದ್ದ ದೀಪದಲ್ಲಿ ಸಮಸ್ಯೆ ಉಂಟಾಗಿ ಬೆಂಕಿ ಅವಘಡ ಸಂಭವಿಸದೆಯಂತೆ, ಇನ್ಯಾವುದೋ ಕಡೆ ವಿದ್ಯುತ್‌ ಅವಘಡದಿಂದ ಬೆಂಕಿ ಅವಘಡ ಸಂಭವಿಸದೆಯಂತೆ ಎಂಬ ಮಾತುಗಳು ಕೇಳಿ ಬಂದವು.

ಸಾವಿರಾರು ಜನ: ಘಟನೆ ತಿಳಿಯುತ್ತಿದ್ದಂತೆ ಒಂದೆಡೆ ಸಾರ್ವಜನಿಕರು ಕುತೂಹಲದಿಂದ ಓಡಿಬಂದರೆ ಮತ್ತೂಂದೆಡೆ ರಂಗಧಾಮಯ್ಯರ ಅಭಿಮಾನಿಗಳು, ಹಿತೈಷಿಗಳು ಧಾವಿಸಿ ಬಂದಿದ್ದರು. ಇನ್ನು ಘಟನೆ ಕುರಿತಾಗಿ ಮಾತನಾಡಲು ಮಾಲಿಕ ರಂಗಧಾಮಯ್ಯ ನಿರಾಕರಿಸಿದ್ದಾರೆ. ಘಟನೆಗೆ ನಿಖರ ಕಾರಣ ತಿಳಿದುಬಂದಿಲ್ಲ. ಸ್ಥಳಕ್ಕೆ ಗ್ರಾಮಾಂತರ ಠಾಣೆ ಅಧಿಕಾರಿಗಳು ಉಪಸ್ಥಿತರಿದ್ದರು.