ನಾಟಕಗಳು ನಶಿಸದಂತೆ ತಡೆಯಬೇಕು

Team Udayavani, Jan 7, 2022, 8:52 PM IST

ಕೆಂಗೇರಿ: ಸಮಾಜದಲ್ಲಿರುವ ಅಂಕು-ಡೊಂಕುಗಳನ್ನು ತಿದ್ದುವ ಕೆಲಸಗಳನ್ನು ನಾಟಕಗಳು ಮಾಡುತ್ತಿದ್ದು, ಜಾಗತೀ ಕರಣ, ಸಿನಿಮಾ, ಧಾರವಾಹಿಗಳ ಭರಾಟೆಯ ಮಧ್ಯೆ ನಾಟಕಗಳು ನಶಿಸಿಹೋಗುವುದನ್ನು ತಡೆಗಟ್ಟಬೇಕು ಎಂದು ನೀರಾವರಿ ನಿಗಮಗಳ ಸಂಪರ್ಕಾಧಿಕಾರಿ ಎಸ್‌.ಎನ್‌. ಶಂಕರ್‌ ಹೇಳಿದರು.

ಆರ್‌.ಆರ್‌. ನಗರ ವಿಧಾನಸಭಾ ಕ್ಷೇತ್ರದ ನಾಗರಬಾವಿ 2ನೇ ಹಂತದಲ್ಲಿರುವ ರಂಗಮಂದಿರದಲ್ಲಿ ರಂಗಪರಂಪರೆ ಟ್ರಸ್ಟ್‌ಯಿಂದ ಆಯೋಜಿಸಿದ್ದ 3 ದಿನಗಳ ರಾಷ್ಟ್ರಕವಿ ಕುವೆಂಪು ನಾಟಕೋತ್ಸವವನ್ನು ಉದ್ಘಾಟಿಸಿ ಮಾತನಾಡಿದರು. ನಾಟಕ ಅತ್ಯುತ್ತಮ ಅಭಿವ್ಯಕ್ತಿ ಮಾಧ್ಯಮವಾಗಿದ್ದು, ಗಾಂಧೀಜಿಯವರೂ ಸಹ ನಾಟಕಗಳಿಂದಲೇ ಪ್ರೇರಣೆ ಪಡೆದಿದ್ದರು.

ಕುವೆಂಪು ಅವರ ನಾಟಕಗಳು ವಿಶ್ವಮಾನವತೆಯನ್ನು ಸಾರುತ್ತದೆ. ನಮ್ಮ ಸಂಸ್ಕೃತಿ ಉದಾತ್ತವಾಗಿದ್ದರೂ ಜಾತೀಯತೆ, ಅಸ್ಪೃಶ್ಯತೆಗಳ ವಿರುದ್ಧ ಜಾಗೃತಿ ಮೂಡಿಸಲು ನಾಟಕಗಳು ಸಹಾಯಕವಾಗುತ್ತದೆ. ಸಮಾಜದಲ್ಲಿರುವ ಅಂಕು ಡೊಂಕುಗಳನ್ನು ತಿದ್ದಲೂ ನಾಟಕಗಳು ಸಹಕಾರಿ ಎಂದು ತಿಳಿಸಿದರು. ಕನ್ನಡ ರಂಗಭೂಮಿ ಪರಂಪರೆ ಅತ್ಯಂತ ಪ್ರಾಚೀನವಾಗಿದ್ದು, ರಂಗಭೂಮಿ ಕಲಾವಿದರನ್ನು ಪ್ರೋತ್ಸಾಹಿಸುವ ಮೂಲಕ ಕನ್ನಡ ಭಾಷೆ, ಕಲೆ ಮತ್ತು ಸಂಸ್ಕೃತಿಯನ್ನು ಉಳಿಸಿ ಬೆಳೆಸೋಣ ಎಂದು ತಿಳಿಸಿದರು.

ವಿಧಾನಪರಿಷತ್‌ ಸದಸ್ಯ ಅ.ದೇವೇಗೌಡ, ಪಾಲಿಕೆ ಮಾಜಿ ಸದಸ್ಯರಾದ ಮೋಹನ್‌ಕುಮಾರ್‌, ವೆಂಕಟೇಶ್‌ ಬಾಬು, ರಂಗಪರಂಪರೆ ಟ್ರಸ್ಟ್‌ ಮುಖ್ಯಸ್ಥ ಆಂಜನೇಯ, ವ್ಯವಸ್ಥಾಪಕ ಟ್ರಸ್ಟಿ, ರಂಗಕರ್ಮಿ ದನ್ವಂತ್ರಿ, ಹಿರಿಯ ಪತ್ರಕರ್ತ ಸುಧೀಂದ್ರರಾವ್‌, ವೆಂಕಟರಾಮಯ್ಯ ಸೇರಿದಂತೆ ಟ್ರಸ್ಟ್‌ನ ಉಸ್ತುವಾರಿ ಶಾಂತಲಾ ಹಾಗೂ ರಂಗ ಕಲಾವಿದರು ಭಾಗವಹಿಸಿದ್ದರು.