ಆಧಾರ್‌ ಸೇವೆ ಆರಂಭಕ್ಕೆ ಆಗ್ರಹ

Team Udayavani, Jun 3, 2019, 10:39 AM IST

ಬಸವಕಲ್ಯಾಣ: ಕೋಹಿನೂರ ಗ್ರಾಮದ ಅಟಲ್ ಜೀ ಜನಸೇವಾ ಕೇಂದ್ರದ ಕಟ್ಟಡ.

ವೀರಾರೆಡ್ಡಿ ಆರ್‌.ಎಸ್‌.
ಬಸವಕಲ್ಯಾಣ: ಸರ್ಕಾರಿ, ಖಾಸಗಿ ಕೆಲಸ ಸೇರಿದಂತೆ ಪ್ರತಿಯೊಂದಕ್ಕೂ ಆಧಾರ ಕಾರ್ಡ್‌ ಕೇಳಲಾಗುತ್ತದೆ. ಆದರೆ ಕೋಹಿನೂರ ಜಿಪಂ ವ್ಯಾಪ್ತಿಗೆ ಬರುವ ಜನರು ಆಧಾರ್‌ ಕಾರ್ಡ್‌ ಪಡೆಯಲು ಮತ್ತು ಸಣ್ಣ ತಿದ್ದುಪಡಿ ಮಾಡಿಕೊಳ್ಳಬೇಕಾದರೂ ಸುಮಾರು 35 ಕಿ.ಮೀ. ದೂರದ ಬಸವಕಲ್ಯಾಣ ನಗರಕ್ಕೆ ಬರುವ ಸ್ಥಿತಿ ಇದೆ.

ಹೋಹಿನೂರ ವ್ಯಾಪ್ತಿಗೆ ಒಳಪಡುವ ಸುತ್ತಮುತ್ತಲಿನ ಗ್ರಾಮಸ್ಥರಿಗೆ ಪಹಣಿ, ಜಾತಿ ಪ್ರಮಾಣಪತ್ರ ಹಾಗೂ ಆಧಾರ್‌ ಕಾರ್ಡ್‌ ಸಿಗಬೇಕೇಂಬ ಉದ್ದೇಶದಿಂದ ಆರಂಭಿಸಲಾದ ಅಟಲ್ಜೀ ಜನಸೇವೆ ಕೇಂದ್ರ ಕೇವಲ ಪಹಣಿ ಮತ್ತು ಜಾತಿಪ್ರಮಾಣ ಪತ್ರ ನೀಡುವುದಕ್ಕೆ ಸೀಮಿತವಾದರೆ, ಉಪ ಅಂಚೆ ಕಚೇರಿಯಲ್ಲಿ ನೆಟ್ವರ್ಕ್‌ ಸಮಸ್ಯೆ ಹೇಳಿ ಆಧಾರ್‌ ಕಾರ್ಡ್‌ ಸೇವೆಯನ್ನು ಬಂದ್‌ ಮಾಡಿರುವುದೇ ಈ ಸಮಸ್ಯೆಗೆ ಕಾರಣವಾಗಿದೆ.

ಕಳೆದ ನಾಲ್ಕು ವರ್ಷಗಳಿಂದ ಅಟಲ್ಜೀ ಸೇವಾ ಕೇಂದ್ರದಲ್ಲಿ ಖಾಯಂ ಕಂಪ್ಯೂಟರ್‌ ಸಿಬ್ಬಂದಿ ನೇಮಕ ಮಾಡಿಕೊಳ್ಳದೇ ತಾತ್ಕಾಲಿಕವಾಗಿ ನೇಮಕ ಮಾಡಿಕೊಳ್ಳತ್ತ ಬರಲಾಗುತ್ತಿದೆ. ನೇಮಕವಾದ ಸಿಬ್ಬಂದಿ ಲಾಗಿನ್‌ ಆಗಲು ಕೆಲವು ತಿಂಗಳು ಬೇಕಾಗುತ್ತದೆ. ಒಂದು ವೇಳೆ ಲಾಗಿನ್‌ ಆದರೂ ಕೆಲವು ತಿಂಗಳ ಒಳಗೆ ಅವರಿಗೆ ಇಲ್ಲಿಂದ ಬೇರೆ ಕಡೆಗೆ ವರ್ಗಾವಣೆ ಮಾಡಲಾಗುತ್ತಿದೆ. ಇದರಿಂದ ಜನಸವೇವಾ ಕೇಂದ್ರ ಹೆಸರಿಗೆ ಮಾತ್ರ ಎನ್ನುವಂತಾಗಿದೆ ಎಂಬುದು ಜನರ ಆರೋಪವಾಗಿದೆ.

ವಿದ್ಯಾರ್ಥಿಗಳು ಬ್ಯಾಂಕ್‌ ಅಕೌಂಟ್ಗಾಗಿ, ವಿಧವೇಯರು ವಿಧವಾ ವೇತನ ಪಡೆಯಲು, ಪಡಿತರ ಚೀಟಿ ಮಾಡಿಸಿಕೊಳ್ಳಲು, ಪಾಸ್‌ಪೋರ್ಟ್‌, ವಿಳಾಸ ಹಾಗೂ ಹೆಸರು ಬದಲಾವಣೆ ಮಾಡಿಕೊಳ್ಳಬೇಕಾದರೂ ವೃದ್ಧರು, ವಯಸ್ಕರು, ಅಂಗವಿಕಲರು ಬಸವಕಲ್ಯಾಣ ನಗರಕ್ಕೆ ಬಂದು ಆಧಾರ ಕಾರ್ಡ್‌ ಮಾಡಿಸಿಕೊಳ್ಳಬೇಕಾದ ಅನಿವಾ ರ್ಯತೆ ಇದೆ ಎಂಬುದು ಜನರ ಅಳಲು.

ಗ್ರಾಮದಲ್ಲಿ ಸಮಸ್ಯೆ ಇದ್ದರೂ ಸಂಬಂಧ ಪಟ್ಟವರು ತಾಲೂಕಿನಿಂದ ಸುಮಾರು 35 ಕಿ.ಮೀ. ದೂರ ಇರುವ ಈ ಗ್ರಾಮದ ಅಟಲ್ ಜೀ ಸೇವಾ ಕೇಂದ್ರದಲ್ಲಿ ಶಾಶ್ವತ ಸಿಬ್ಬಂದಿ ನೇಮಕ ಮಾಡುವುದಾಗಲಿ ಅಥವಾ ಉಪ ಅಂಚೆ ಕಚೇರಿಯಲ್ಲಿ ಆಧಾರ್‌ ಸೇವೆ ನಿಲ್ಲಿಸಿರುವುದರ ಬಗ್ಗೆ ಚಕಾರ ಎತ್ತುತ್ತಿಲ್ಲ ಎಂಬುದು ಜನರ ಆರೋಪವಾಗಿದೆ.

ಅಧಿಕಾರಿ ಹಾಗೂ ಸಿಬ್ಬಂದಿ ನಡುವೆ ಗ್ರಾಮದ ವೃದ್ಧರು ಮತ್ತು ವಿದ್ಯಾರ್ಥಿಗಳು ಆಧಾರ್‌ ಕಾರ್ಡ್‌ಗಾಗಿ ತಹಶೀಲ್ದಾರ್‌ ಕಚೇರಿಗೆ ಮತ್ತು ಪಕ್ಕದ ಊರಿಗೆ ಸುತ್ತಾಡುವಂತಾಗಿದೆ. ಹೀಗಾಗಿ ಸಂಬಂಧ ಪಟ್ಟವರು ಶೀಘ್ರವಾಗಿ ಆಧಾರ್‌ ಸೇವೆ ಪ್ರಾರಂಭಿಸಿ ಸಮಸ್ಯೆಯಿಂದ ಮುಕ್ತಿಗೊಳಿಸಬೇಕು ಎಂಬುವುದು ಜನರ ಒತ್ತಾಯವಾಗಿದೆ.

ನಗರದಿಂದ ಕೋಹಿನೂರ ಗ್ರಾಮ ಸುಮಾರು 35 ಕಿ.ಮೀ. ಅಂತರದಲ್ಲಿದೆ. ಹೀಗಾಗಿ ಸಂಬಂಧ ಪಟ್ಟವರು ಆದಷ್ಟು ಬೇಗ ಅಟಲ್ ಜೀ ಸೇವಾ ಕೇಂದ್ರದಲ್ಲಿ ಮತ್ತು ಉಪ ಅಂಚೆ ಕಚೇರಿಯಲ್ಲಿ ಆಧಾರ್‌ ಕಾರ್ಡ್‌ ಸಿಗುವಂತೆ ವ್ಯವಸ್ಥೆ ಮಾಡಬೇಕು. ಇಲ್ಲದಿದ್ದರೆ ಹೋರಾಟ ಮಾಡಲಾಗುವುದು.
•ರತಿಕಾಂತ, ಗ್ರಾಪಂ ಸದಸ್ಯರು