ಬೆಳಗಾವಿ ಜಿಲ್ಲೆಯಲ್ಲಿ ನಿಲ್ಲದ ಮಳೆ : ಸವದತ್ತಿ; 140 ಕ್ಕೂ ಹೆಚ್ಚು ಮನೆಗೆ ಹಾನಿ

Team Udayavani, Oct 15, 2020, 2:53 PM IST

ಸವದತ್ತಿ: ನಿರಂತರ ಸುರಿಯುತ್ತಿರುವ ಮಳೆಯಿಂದ ಆಣೆ ಅಗಸಿ, ಕುಂಬಾರ ಓಣಿ, ಬಸ್‌ ನಿಲ್ದಾಣ, ಬಜಾರ ಮಾರ್ಗ, ಬೆಣ್ಣಿಕಟ್ಟಿ
ಕೆಲ ಮನೆಗಳಲ್ಲಿ ನೀರು ತುಂಬಿ ಹಾಗೂ ಇತರೆ ಪ್ರದೇಶಗಳಲ್ಲಿ ನೀರು ನಿಂತು ಜನರು ತೊಂದರೆ ಅನುಭವಿಸುವಂತಾಯಿತು.
ಬುಧವಾರ ಸಂತೆ ದಿನದಂದು ಸಹಿತ ಮುಂಜಾನೆಯಿಂದ ಸುರಿದ ಮಳೆಯಿಂದ ವ್ಯಾಪಾರ ವಹಿವಾಟವು ಅಸ್ತವ್ಯಸ್ತಗೊಂಡಿತ್ತು.

ಮಳೆಯಿಂದಾಗಿ ಸ್ಥಳೀಯ ಪುರಸಭೆ ವ್ಯಾಪ್ತಿಯಲ್ಲಿ ಆಗಸ್ಟ್‌ದಿಂದ ಇಲ್ಲಿಯವರೆಗೆ ಒಟ್ಟು 190 ಮನೆಗಳು ಬಿದ್ದ ಬಗ್ಗೆ ಅರ್ಜಿ ಸಲ್ಲಿಕೆಯಾಗಿವೆ. ನಿನ್ನೆ ಸುರಿದ ಮಳೆಗೆ ಪಟ್ಟಣದಲ್ಲಿ 30ಕ್ಕೂ ಹೆಚ್ಚು ಮನೆಗಳು ಬಿದ್ದಿವೆ ಎಂದು ಸಮೀಕ್ಷೆಯಲ್ಲಿ ಅಂದಾಜಿಸಲಾಗಿದೆ. ಮಳೆಯಿಂದ ಮನೆ ಕಳೆದುಕೊಂಡ ಜನ ಬಾಡಿಗೆ ಮನೆ ಹುಡುಕಾಡುತ್ತಿದ್ದಾರೆ. ತಾಲೂಕಿನಾದ್ಯಂತ 140
ಕ್ಕೂ ಹೆಚ್ಚು ಮನೆಗಳು ಬಿದ್ದಿವೆ ಎಂದು ಕಂದಾಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ:ಧರಣಿ ನಿರತ ಉಪನ್ಯಾಸಕರಿಗೆ ಕಾಲೇಜು ಆರಂಭವಾದ ತಕ್ಷಣ ನೇಮಕಾತಿ ಆದೇಶ: ಅಶ್ವತ್ಥನಾರಾಯಣ

ತಾಲೂಕಿನ ಉಗರಗೋಳ ಗ್ರಾಮದ ಹರ್ಲಾಪುರ ರಸ್ತೆಯಲ್ಲಿರುವ ಟ್ರಾನ್ಸ್‌ಫಾರಮ್‌ ಕಂಬವು ಗಾಳಿ-ಮಳೆಗೆ ರಸ್ತೆಯಡಿಗೆ ಬಾಗಿದ್ದು ಓಡಾಡುವ ಜನತೆಯಲ್ಲಿ ಆತಂಕ ಸೃಷ್ಟಿಸಿದೆ. ತಾಲೂಕಿನಾದ್ಯಂತ ಕೃಷಿ, ತೋಟಗಾರಿಕೆ, ಕಂದಾಯ ಇಲಾಖೆಗಳಿಂದ ಜಂಟಿ ಬೆಳೆ ಹಾನಿ ಸಮೀಕ್ಷೆ ನಡೆಸಲಾಗಿದೆ. ಹೆಸರು, ಹತ್ತಿ, ಗೋವಿನಜೋಳ, ಸಜ್ಜೆ, ಉದ್ದು, ಸೊಯಾ, ಸೂರ್ಯಕಾಂತಿ ಸೇರಿದಂತೆ ಕಬ್ಬು ಬೆಳೆ ಸಹಿತ ಒಟ್ಟು 72406 ಹೆಕ್ಟೇರ್‌ ಭೂಮಿ ಬಿತ್ತನೆಯಾಗಿದೆ. ಅತಿವೃಷ್ಟಿಯಿಂದ ಇಲ್ಲಿಯವರೆಗೆ 45 ಸಾವಿರ ಹೆಕ್ಟೇರ್‌ ಪ್ರದೇಶಕ್ಕೂ ಹೆಚ್ಚು ಬೆಳೆ ಹಾನಿಯಾಗಿದೆ. ಹೆಸರು, ಹತ್ತಿ, ಗೋವಿನಜೋಳ ಅತೀ ಹೆಚ್ಚು ಪ್ರಮಾಣದಲ್ಲಿ ಹಾನಿಯಾಗಿದೆ. ಜೂನ್‌ 1 ರಿಂದ ಇಲ್ಲಿಯವರೆಗೆ 495 ಮಿಮೀ ಮಳೆ ಸುರಿಯಬೇಕಿತ್ತು. ಶೇ. 38 ಮಳೆ ಹೆಚ್ಚಾಗಿ 682 ಮಿಮೀ ಮಳೆ ಸುರಿದಿದೆ.